koussoube-marc-lee_1ti_text

Kǝ̀kàl-fwɛ̀lɛ̀ 4

¹ Eshirhǝ náàcɛ̀nɛ́ n'ê byili pamparɛ̃ɛ̃ bǝ̀ lyì jàlà b'a zɛ̃̀ dwã nɛ́ nánkwaá nɛ́ wẽ́, bǝ yẽ̌ Yi-ni-zhú mú ni, bǝ tó kɔma cìnǝ́ ne bǝ zwẽ còchò mɔ̀bɔ́ mǝ̀ n'ê shí nǝ̀cílsi námmǝlwǎlsɛ́ sono mó. ² Lyì b'a yǔr bi ǹdǝ́ kɔma zɔ̀mà. Kaka k'ê t'â la bǝ̀ wun ní yál rǝ ce bǝ dùr cìzhìl ǹdǝ́ kɔn wɔ̀rhɔ́ yé. ³ Lyì bí bǝ̀myɛ́ mɔ́ n'ê wǝ̀l bǝ̀ kɛ̃-jú wɔ́ kɔ̀-bǝlwɛ̀lɛ́, bǝ̀ kùjúr jàlà ŋwɛ́nɛ́ rǝ̀ jú súlǝ́, e jà kùjúr rí rǝ̀myɛ́ wɔ́ Yi rǝ̀ wɛ̀rhɛ́ rɛ. Lyì bí byɛ̀bɛ́ bǝ̀ zhí Yi ni, bǝ̀ yě rǝ̀ zhǝ̀n rɛ́ gǝ́ wɔ́ nɛ́ mɔ́ wɔ̌ bǝ̀ jí wẽ̀ ré rǝ̀myɛ́, bǝ̀ m'ê ce rǝ̀ nǝ̀báná. ⁴ Zhǝ̀nà; kɔn dɛ̀bɛ́ Yi wɛ̀rhɛ́ mɔ́ gakó càn. Lò wàr ń vùr wẽ̀ ré rǝ̀myɛ́ òdù ga ń dwĩ̀ kwã nɛ́ yé. Ń mǝ̌ sǝ n jí rǝ̀ gakó n mǝ n ce Yi nǝ̀báná, ⁵ sǝ n lwǝ̀l re n mǝ n jí ri kɔn tó ǹdǝ rǝ̀ zɔ̀mɛ̀ rɛ́ gǝ́ n'ê byili ní. Èta, rǝ̀myɛ́ b'a ce kɔn gakó tó ǹdǝ rǝ̀ gǝ́ n'ê yǎl nɛ́. ⁶ Ǹ gǝ byili rǝ̀myɛ́ gakó nǝ́ da-byǎ bɛ́ nɛ, ǹ b'ǎ yǝ̀ Yezu Kristǝ tùntùnnǝ nántwǝ̌. Bǝ̀ b'a lwar bǝ̀ Yi-ni-zhú zɔ̀mɛ̀ rɛ́ ǹ zwẽ ǹ nǝ́ ǹ tó re mó pɔ mɔ́ jàn, bǝ̀ ǹ nǝ́ ǹ byili ri ǹdǝ bǝ̀ gǝ́ cèrhè mó Yi nyǝ̀ná nɛ́ zhǝ̀n rɛ́ nɛ́. ⁷ Sǝ́ zhɛ̃̀ kɔma zɔ̀mà nɛ́ nǝ̀ wɔ́ ǹdǝ sǝswaálsɛ nɛ mɔ́. Ce jàn nɛ́ ń zǝ yǝ̀wǎl ǹdǝ́ Yi-ni-zhú kẽkẽ. ⁸ Lò gǝ nǝ́ ń wɛ̀rhɛ́ ń yala nɛ́ cɛ̀nɛ̀, kɔn càn, sǝ nǝ̀ t'â sɛ̃ mɔ dɛ̃́dɛ̃́ yé. Wɔ́ Yi-ni-zhú kẽkẽ mú mǝ̀ zhe kùr du, bǝ̀ Yi bwǝl nyi bǝ̀ nǝ́ gǝ zhí ri kẽkẽ, rǝ̀ b'a pǝ nǝ́ba nyǔ, èlǎsɛ̃́ ǹdǝ́ byinǝ nǝ̀ bǝ zhɔ̌ zhe yilǝ. ⁹ Zɔ̀mɛ̀ rɛ́ rǝ̀myɛ́ wɔ́ zhǝ̀nà. Lyì bí gakó mǝ̌ sǝ bǝ zwẽ re. ¹⁰ Wɔ́ rǝ̀myɛ́ è ce, nǝ́ n'é pyɛ́nɛ́ nǝ́ cìn nǝ́ twĩ̀, nǝ́ n'é twĩ̀ jàn tumǝ, bǝ̀ nǝ́ zhí Yi nã́nyì y ni ǹdǝ́ nǝ́ wun gakó, nǝ́ n'é dɛ̃̀ rǝ̀ nyì-bwelé y pyǐrh mó. Rǝ̀ n'ê yǎl rǝ zwẽ lò gakó, sǝ wɔ́ lò mɔ̀bɔ́ ń zù ri mú rǝ̀ n'ê zwẽ ¹¹ Wɔ́ rǝ̀myɛ́ ǹ mǝ̌ sǝ́ byili lyì bí ni, sǝ́ ce bǝ zwẽ rǝ̀ nyí. ¹² Bǝ̀ká yẽ̌ lò mǝ̀gù ga fulsi mú ǹ gǝ́ wɔ́ bǝ̀sɔ́bwɛ̀lɛ́ yil yé. Ce ǹ zɔ̀mà nɛ́ ǹdǝ́ ǹ tùntwǝ̃̀ǝ̃̀ né, ǹdǝ́ ǹ sónó w ǹdǝ́ ǹ Yi-ni-zhú mú, ǹdǝ́ ǹ wu-põ̀ w yǝ̀ myɔrhɔ byɛ̀bɛ́ bǝ̀ zù Kristǝ mó gakó yilǝ. ¹³ Ce jàn nɛ́ ǹ nǝ́ ǹ kàrmǝ Yi zɔ̀mɛ̀ rɛ́ ǹ byili Kristǝ-lyì bí ni, ǹ mǝ́ ǹ zal bǝ̀ wun ní ǹdǝ́ cícú, ǹ mǝ́ ǹ dɛ̃̀ à twírí yǝ́. ¹⁴ Ǹ bǝ̀ká swě Eshirhǝ náàcɛ̀nɛ́ pɛnɛ́ y è pɔ mɔ́ yò yé. Ǹ nɔ pɛnɛ́ y èmyɛ́ mɔ́ Yi-nyì-zwennǝ bé gǝ́ zɔ̀m è yò w, Kristǝ-lyì gùlú w yé né cìnǝ́ bé zɛ̃̀ bǝ cèlè bǝ̀ jɛ̀sɛ́ ǹ yó w mó yi ní. ¹⁵ Twĩ̌ tum rí rǝ̀myɛ́ cɛ̀nɛ̀, sǝ́ twĩ̀ ri ǹdǝ́ ǹ wu gakó, mùnì ga lyì bí lwar bǝ̀ ǹ tum rí n'ê zhǝ̀l cɛ̀nɛ̀. ¹⁶ Dɛ̃̌ ǹ cìn ndǝ́ ǹ tùntwǝ̃̀ǝ̃̀ né ǹ kàrmɔ́ wɔ̀rhɔ́ mɔ́ wẽ́. Zhǝ̀nà, ǹ gǝ nǝ́ ǹ wɛ̀rhɛ́ èta, ǹ b'ǎ zwẽ ǹmyɛ́ cìcì, ǹdǝ́ byɛ̀bɛ́ bǝ̀ n'ê cili ǹ zɔ̀mà nɛ́ mɔ́ ga.