¹ Nyǐnə zɔmὲ rέ tὲbέ à la byilu mú wɔ zhən cìcì: Lò mɔbɔ ń nə ń yǎl n yə Kristə-lyì gùlú yé né cébal, wɔ tum tὲbέ rə càn ń nə ń yǎl n twĩ. ² Kristə-lyì gùlú w yé né cébal bə mə sə n zə yò bə n'ê byili yé, ń mə sə n yə kɛ mədù byal, sə n yə lò mɔbɔ ń zhe ń cìn cὲnὲ, ń tumə né myɛ j'à n'ê swí yírh, sə n yə lò mɔbɔ ń nə ń zwẽ zhələ cὲnὲ. Ń mə sə n yə lò mɔbɔ ń wɔ Yi zɔmὲ rέ ń nə ń byili. ³ Ń bə mə sə n yə sə-nyɔrɔ yé; ń bə mə sə n yə búlə cébal yé; ń mə sə n yə wu-bɔnɔ ǹdə sónó cébal. Ń bə mə sə n yə wέrέ yóm yé. ⁴ Ń mə sə n nyǐ ń kὲlέ y yò cὲnὲ, sə ń byǎ bέ yə lyì byὲbέ bə n'ê nyàm lò. ⁵ Lò gə wàr ǹ kὲlέ yò ǹ nə ǹ nyǐ cὲnὲ, etər ǹ b'ǎ tó né ń nyǐ Yi gùlú w yò cὲnὲ? ⁶ Ń bə mə sə n yə lò mɔbɔ ń zù Kristə dùlìdùlì yé, mùnì ga cìn-dɛ-zhõ bək'a ce n jǐrh ǹdə lyəlyǒ ta Yi nyəná nέ wẽ, n tó rəmyέ dɛnnɛ n nə còrhò-tum ǹdə Shətana ta yé. ⁷ Sə kɔn wɔ nyɔɔ bə lyì bí byὲbέ bə də Kristə-lyì mú tó ń tùntwəə né dɛnnɛ bə nyὲ mɔ. Rəmyέ m'a ce lò gakó zɔm ń yil náàcὲnέ, mùnì ń bəká n tu Shətana sòlò wẽ yé. ⁸ ristə-lyì gùúlí tùntùnnə bé myɛ mə sə lyì bí nyὲ bὲ bə tùntùnnə né yilə, sə bə j'a yə zhə-cìnə. Bə bə mə sə bə nyɔ dəvɛ kɔn lyɛ cɛ nɛ yé, sə bə bək'a pyà wársɛ ǹdə yǔyǔ tumə yé. ⁹ Bə mə sə bə zə kɔn dὲbέ Yi byili nə Yi-ni-zhú mú shò kwã nέ mɔ kẽkẽ ǹdə wu-põ zhən zhənà. ¹⁰ Bə mə sə bə jὲrὲ bə nyǐ bə tùntwĩĩ rí yò náàcὲnέ. Bə gə pwírí bə bə yò zhe bə la byilu, é fòró bə zὲ bə pə bέ sɔmá bə twĩ bə tum dí. ¹¹ Kana bέ byὲbέ bə wɔ Kristə-lyì gùúlí tùntùnnə mó myɛ mə sə lyì bí tó bə tùntwəə né dɛnnɛ bə nyὲ bὲ. Bə bə mə sə bə zɔm bə dwã bέ yil námməlwὲlέ yé. Bə mə sə bə zə bə zə bə cìn náàcὲnέ kɔn gakó wẽ. ¹² Kristə-lyì gùlú tùntùnnə mə sə n yə kɛ mədù byal. Ń mə sə n nyǐ ń kὲlέ y ǹdə ń byǎ bέ yò náàcὲnέ. ¹³ Kristə-lyì gùlú tùntùnnə bé gə n'ê twĩ bə tum dí náàcὲnέ, lyì bí gakó m'a cèrhé be. Bə gə zhí Yəzu Kristə ne mó ce, bə m'a ŋwὲnέ bə byili Yi zɔmὲ rέ ǹdə wu-jɔ. ¹⁴ À n'â yǎl a bə a nə mɔ dwã nέ nyὲbέ nyí ni, sə ǹdə rəmyέ ga, à n'â kɛ sέbέ rέ tὲbέ à la mɔ pɔ. ¹⁵ sə à gə yə twí làlà, ǹ gə kàrmə sέbέ rέ rəmyέ, ǹ b'ǎ lwar ǹ gə m'ǎ zə ǹ cìn ní ǹdə gùlú w ò wɔ Yi nãnyì kwálá y mɔ. Wɔ gùlú w òmyέ ò zhe Yi zhən dέ ò n'ô byili. ¹⁶ Zhənà, kɔn dέ dὲbέ nə Yi-ni-zhú mú ce nə lwar mɔ já dέdέ: Kristə jǐrh numbyíní n ce nə lwar ń párá. Ywələ náàcὲnέ byili pamparɛɛ bə ń bə dóó zhe yé. Màlέkabá myɛ cìcì nɔ mɔ. Bə bwəl ń yò w bə byili lyì bí gakó ne. Lyì bí zwẽ nyí bə zù mù cɛ yó, sə ń nɔ zùwə dɛ Arəzana wa.