¹ Da-byǎ, tɛ̀bɛ́ rǝ̀ súlí mú, á yě bǝ̀ nǝ́ byili ába á gǝ́ mǝ̌ s'á wɛ̀rhɛ́ nɛ́ mùnì ga á tùntwǝ̃̀ǝ̃̀ né yí Yi bùlǝ̀. Sǝ zhǝ̀n ga, á n'á wɛ̀rhɛ́ ǹdǝ nǝ́ gǝ́ byili ába né. Sǝ ce-nǝ jàn nɛ́ á j'á n'á wɛ̀rhɛ́ èta. Nǝ́ r'é lwǝ̀l ába ǹdǝ́ cícú mú mǝ̀myɛ́ Cinnǝ Yezu yil yilǝ. ² Á yě nyǝ́ né nyɛ̀bɛ́ nǝ́ pɔ ába Cinnǝ Yezu jàn yil mó. ³ Kɔn dɛ̀bɛ́ Yi n'ê yǎl mɔ́ wɔ́ b'ǎ yǝ̀ rǝ̀myɛ́ lyì námpúm, s'á dɛ̃̀ á cìn ǹdǝ́ fwǝ̌l tumǝ, ⁴ sǝ lò gakó lwar ǹ cìn zal cɛ̀nɛ̀ ǹdǝ kɔn gǝ́ mǝ̌ nɛ́, ⁵ s'á bǝ̀k'á yẽ̌ á cìn nì á pǝ shilǝ námmǝlwǎlsɛ́ nɛ ǹdǝ lyì byɛ̀bɛ́ bǝ̀ yǝ̀l Yi rí tɛ̀bɛ́ rǝ̀ wɔ́ zhǝ̀n mɔ́ pár ta yé. ⁶ Lò mǝ̀dù ga bǝ̀ká yúyǔ ǹ dõ, ráá ń myìnì mù yò w òmyɛ́ wẽ́ yé. Cinnǝ mó la còrhò-tum byɛ̀bɛ́ bǝ̀ n'ê wɛ̀rhɛ́ èta mɔ́ gakó ne pɔ. Nǝ́ byili ába rǝ̀myɛ́, nǝ́ k'á bwérhé. ⁷ Yi yǝ̀ nǝ́ba byẽ̀ bǝ̀ nǝ́ wɛ̀rhɛ́ fwǝ̌l tumǝ yé; rǝ̀ byẽ̀ nǝ́ba bǝ̀ nǝ́ yál rǝ̀myɛ́ lyì námpúm. ⁸ Wɔ́ rǝ̀myɛ́ è ce, lò mɔ̀bɔ́ ǹ cẽ nyǝ́ né nǝ̀myɛ́, è dǝ̀ numbyíní nyí ni ǹ cẽ né yé; wɔ́ Yi cìcì nyí ni ǹ cẽ né. Wɔ́ rǝ̀myɛ́ rǝ̀ n'ê pɛ ába rǝ̀ Eshirhǝ náàcɛ̀nɛ́ yá. ⁹ È gǝ wɔ́ dwã sónó w yilǝ, Yi cìcì byili ába á gǝ́ mǝ̌ s'á swéné dwã nɛ́. Rǝ̀myɛ́ ce, kɔn k'ê dǝ̀ nyɔ́ɔ́ bǝ̀ nǝ́ kɛ̃ sɛ́bɛ́ nǝ́ pǝ ába nǝ́ m'é byili rǝ̀myɛ́ yé. ¹⁰ Nǝ́ yě b'ǎ só Kristǝ-lyì bí byɛ̀bɛ́ bǝ̀ ŋwɛ́nɛ́ Masɛdwanɛ tǝnà y wẽ́ mó púlǝ́púlǝ́ ǹdǝ Yi gǝ́ byili ába né. Da-byǎ, nǝ́ r'é lwǝ̀l ába bǝ̀ cenǝ jàn nɛ́ á j'á n'á wɛ̀rhɛ́ èta twéé twéé. ¹¹ Ce-nǝ jàn nɛ́ á jòm ǹdǝ́ dwã ǹdǝ́ yǝ̀-zùlǝ́. Lò gakó sǝ́ nyǐ ǹ sǝ̀pwà tumǝ né yò, ń twĩ̀ ń nǝ ǹ nyí kùjú, ǹdǝ nǝ́ gǝ́ byili ába né. ¹² Á gǝ wɛ̀rhɛ́ èta, á t'á la lò yó w nyǔ yé, sǝ byɛ̀bɛ́ bǝ̀ dǝ̀ Kristǝ-lyì mú b'a nyɛ̀ ába. ¹³ Da-byǎ, nǝ́ r'é yǎl b'ǎ lwar kɔn gǝ́ la nɛ́ yál byɛ̀bɛ́ bǝ̀ cù mú yilǝ, mùnì ga á wun bǝ̀k'a zhìlì ǹdǝ lyì bí byɛ̀bɛ́ bǝ̀ t'â dɛ̃̀ kaka bǝ̀ cu kwã nɛ́ mɔ́ ta yé. ¹⁴ Nǝ́ r'é zwẽ nyí bǝ̀ Yezu cù n ká n bwìrhì; èta, nǝ́ r'é zwẽ nyí bǝ̀ Yi m'a bwìrhì byɛ̀bɛ́ bǝ̀ cù ǹdǝ́ bǝ̀ zù mù mú, bǝ yǝ̀ nɛ́ ǹdǝ́ mɔ. ¹⁵ Kɔn rɛ́ dɛ̀bɛ́ nǝ́ r'é yǎl nǝ́ byili ába mó wɔ́ ǹdǝ Cinnǝ mó gǝ́ byili ní: lwar-na bǝ̀ nǝ́myɛ̌ byɛ̀bɛ́ ń ká ń bàn zal ǹdǝ́ nǝ́ gwẽ̌ yǝ̀ cì mú t'á la byɛ̀bɛ́ bǝ̀ cù mú jɔ̀nɔ̀ ń sõ yé. ¹⁶ Cinnǝ mó gǝ ká n shí dɛ̃̌ yi w ń bànà, ń mà n pǝ nyí màlɛ́kabá yé né cǝ́bal mɔ́ nɛ n bwǝ̀l; Yi pɔ́lá y súlí e dom. Rǝ̀myɛ́ yó, byɛ̀bɛ́ bǝ̀ cù ǹdǝ́ bǝ̀ zù Kristǝ mó b'a jɛ̀rɛ̀ bǝ tó yé bǝ bwìrhì. ¹⁷ Rǝ̀myɛ́ yi ní, Yi b'a kwè nǝ́myɛ̌ byɛ̀bɛ́ nǝ́ gwẽ̌ yǝ̀ cì mú ǹdǝ́ bǝ̀myɛ́ ga nǝ́ vò bǝ́ban wẽ́ dɛ̃̌ yi wǝ, nǝ́ jǝl Cinnǝ. Èta, nǝ́ b'ǎ yǝ̀ nɛ́ ǹdǝ́ mɔ twéé twéé. ¹⁸ Zǝ-na zɔ̀mà nɛ́ nǝ̀myɛ́ á cící dwã.