¹ Rǝ̀myɛ́ ce, nǝ́ wàr nǝ́ b'ǎ yẽ̌ kɔn dɛnɛ yé. Nǝ́ j'ǎ pwírí kɔn mǝ̌ bǝ̀ àmyɛ̌ ǹdǝ́ Shǝlvɛ̃ mɛ̃ Antɛnnɛ nɛ́. ² Wɔ́ rǝ̀myɛ́ è ce nǝ́ twĩ̀ Timote á sõ. Ń wɔ́ nǝ́ da-byǐ ń nǝ́ ń tó nǝ́ba ń twĩ̀ yò-ècɔ̀nɔ̀ nyí rí tum rí Yi yilǝ. Nǝ́ twĩ̀ mu á sono mùnì ga n sɛ̃ ába á kwɛrhɛ á zhí Yi ni kẽkẽ, sǝ n súlí á wu-jɔ̀. ³ Èta, á mǝ̀dù ga bǝ̀ká n tǝ̀ lũ w kɔ̀bɔ́ nɔ̀nɔ̀ w yil n gǝ ń wu yé. Á cìcì mú yě bǝ̀ wɔ́ nɔ̀nɔ̀ w òmyɛ́ yil yil Yi byẽ̀ nǝ́ba. ⁴ Nǝ́ gǝ́ y'ǎ ŋwɛ́nɛ́ á sõ yi ní, nǝ́ y'ǎ n'é byili ába bǝ̀ nyǐ nǝ́ b'ǎ nwɛ̀nɛ̀, sǝ á yě bǝ̀ kɔn yàl ǹdǝ nǝ́ gǝ́ byili ní. ⁵ À y'à k'â wàr à b'a dɛ̃̀ yé. Wɔ́ rǝ̀myɛ́ è ce á twĩ̀ Timote á sõ, mùnì ga a lwar á gǝ́ zhí Yi ni ní. Ywẽ zhe ne. Dɛ̀ga Shǝtana swèlè ába, sǝ è gǝ swèlè ába, sǝ́ nyǐ tum rí nǝ́ twĩ̀ á sõ mó bǝ kùr zhe yé. ⁶ Sǝ èlǎsɛ̃́, Timote ká n shí Á sõ n bà. Ń byili nǝ́ba á gǝ́ zhí Kristǝ ne né, nd'á gǝ́ só dwã nɛ́. Rǝ̀myɛ́ ce nǝ́ wun nyɛ̀. Ń byili nǝ́ba b'ǎ yǝ̀ nǝ́ yò swě yé, sǝ á n'á yǎl á nǝ nǝ́ba, nǝ́myɛ j'ǎ n'é yǎl nǝ́ nǝ ába. ⁷ Da-byǎ, á gǝ́ zhí Kristǝ ne èta mɔ́ n'ê zal nǝ́ wun ni nǝ́ wu-zhùlù ǹdǝ́ nǝ́ nɔ̀nɔ̀ w wẽ́. ⁸ Èlǎsɛ̃́, nǝ́ wun k'â jě, á gǝ́ gwẽ̌ zhí Cinnǝ mó ne kẽkẽ mó yilǝ. ⁹ Nǝ́ yǝ̀l nǝ́ gǝ́ m'ǎ ce Yi nǝ̀bán nɛ́ á yil yé, b'ǎ n'á pɛ nǝ́ba wu-nyɔ̃̀ nánfɔ̀lɔ̀ rǝ̀ yé né. ¹⁰ Cǝcɛ̃ ǹdǝ́ nǝ̀nyɛ́nɛ́ ga, nǝ́ n'é lwǝ̀l Yi ǹdǝ́ nǝ́ wun gakó bǝ̀ rǝ̀ ce nǝ́ k'á nǝ ába, sǝ nǝ́ sɛ̃ ába á lwar kɔn dɛ̀bɛ́ á yǝ̀ ŋwɛ̀nɛ́ á lwar á Yi-ni-zhú mú shò-kwã nɛ́ mɔ́. ¹¹ Nǝ́ Da Yi cìcì ǹdǝ́ nǝ́ Cǐnnǝ Yezu b'a kwɛrhɛ nǝ́ sɔ́má y mùnì ga nǝ́ ŋwɛ̀nɛ́ nǝ́ b'ǎ sõ! ¹² Cǐnnǝ mó mà n ce á kwɛrhɛ á swéné dwã, s'á kwɛrhɛ á swéné lyì bí dwã bɛ́ twéé twéé, ǹdǝ nǝ́ gǝ́ só ába nɛ́ mɔ́. ¹³ Èta, ń mà n súlí á wu-jɔ̀. Nǝ́ Cǐnnǝ Yezu gǝ tú ǹdǝ́ ń lyì bí gakó yùwǝ̀, á b'ǎ yǝ̀ nǝ́ Da Yi lyì námpúm, dóó t'â la á á yó w jǒm yé.