¹ Da-byǎ, á cìcì yě bǝ̀ nǝ́ twírí á sõ mó yǝ̀ nánfò yàl yé. ² Á yě myɛ bǝ̀ bǝ̀ tùrh nǝ́ba, bǝ̀ nwɛ̀nɛ̀ nǝ́ba Shilipu cɔ w wa, fòró nǝ́ zɛ̃̀ nǝ́ yí á sõ. Sǝ, ǹdǝ́ lyì nánzhǝzhɔ̌ y'à bǝ nǝ́ba só ga, Yi pɔ nǝ́ba wu-jɔ̀ nǝ́ m'é bwǝ̀l yò-ècɔ̀nɔ̀ nyí rí nǝ́ byili ába. ³ Kɔn tɛ̀bɛ́ nǝ́ n'é bwǝ̀l nǝ́ byili lyì bí ni mú tɛ̀nɛ́ kɔma sɔ́má yó yé. Rǝ̀ dǝ̀ lwɛlɛ kɔn myɛ yé. rǝ̀ k'ê dǝ̀ lyì nǝ́ n'é yǎl nǝ́ yǔr myɛ yé. ⁴ Wɔ́ Yi rǝ̀ pwírí nǝ́ mǝ̌ ǹdǝ́ rǝ̀ yò-ècɔ̀nɔ̀ nyí rí bwǝ̌l, rǝ zɛ̃̀ rǝ cír nǝ́ba. Wɔ́ rǝ̀myɛ́ è ce, nǝ́ zɛ̃̀ nǝ́ n'é bwǝ̀l re ǹdǝ Yi gǝ́ n'ê yǎl nɛ́, bǝ̀ wɔ́ rǝ̀myɛ́ rǝ̀ yě nǝ́ wun bùlǝ̀ né; sǝ nǝ́ t'á bwǝ̀l re ǹdǝ numbyínǝ́ bé gǝ́ n'ê yǎl nɛ́ yé. ⁵ Á cìcì mú yě bǝ̀ nǝ́ zɔ̀mà nɛ́ dǝ̀ lyì jǝ́jòrɔ́ zɔ̀mà yé; è dǝ̀ wẽ̀ nǝ́ n'é yǎl á sõ è ce nǝ́ n'é zɔ̀m nɛ yé. Yi myɛ cìcì yě rǝ̀myɛ́. ⁶ Nǝ́ yǝ̀ còrhó pyà ámyɛ̌ ráá lyì dwã sõ yé; nǝ́ yǝ̀ pyà sǝ lò cèrhé nǝ́ba gaga yé, e jà nǝ́ gǝ́ wɔ́ Kristǝ tùntúmǝ́ mó ce, nǝ́ y'ǎ wɔ̌ nǝ́ ce á wɛ̀rhɛ́ rǝ̀myɛ́. ⁷ Ǹdǝ́ rǝ̀myɛ́ ga, nǝ́ gǝ́ y'ǎ ŋwɛ́nɛ́ á sõ yi ní, nǝ́ wɛ̀rhɛ́ wu-bɔ̀nɔ̀ ǹdǝ kɛ̃ gǝ́ yà n nyǐ ń bǝ̀sɔ́ná yò né. ⁸ Nǝ́ bwǝ̀l yò-ècɔ̀nɔ̀ nyí rí rǝ̀ shí Yi sõ mó nǝ́ byili ába, sǝ nǝ́ gǝ́ só ába dɛ̃́dɛ̃́ mɔ́ ce, nǝ́ y'ǎ só sǝ nǝ́ pǝ nǝ́ cìn námppúm á yilǝ, b'ǎ jǐrh nǝ́ lyì-twǝ̌rh. ⁹ Da-byǎ á gwẽ̌ yě bǝ̀, nǝ́ gǝ́ y'ǎ n'é bwǝ̀l yò-ècɔ̀nɔ̀ nyí rí rǝ̀ shí Yi sõ mó nǝ́ byili ába yi ní, nǝ́ twĩ̀ cǝcɛ̃ ǹdǝ́ nǝ̀nyɛ́nɛ́ ga, nǝ́ nwɛ̀nɛ̀ mùnì ga nǝ́ bǝ̀k'á lyɛ̀ɛ̀ ámyɛ̌ mǝ̀dù ga ǹdǝ́ nǝ́ nyí kùjú yé. ¹⁰ Nǝ́ zɔ nǝ́ cìn cɛ̀nɛ̀ ǹd'ámyɛ̌ byɛ̀bɛ́ á zù Kristǝ mó, nǝ́ yàl wu-cágá cìnǝ́, nǝ́ yǝ̀ dóó zal yé. Á yě rǝ̀myɛ́, Yi myɛ yě re. ¹¹ Á yě myɛ bǝ̀ nǝ́ zɔ nǝ́ cìn ǹd'ába ǹdǝ da gǝ́ yà n wɛ̀rhɛ́ nɛ ǹdǝ́ ń byǎ. ¹² Nǝ́ cící ába, nǝ́ zɔ á wun ni, nǝ́ co yǝ̀wǎl á kùr w twéé gakó, mùnì ga á zhǝ̀zhǝ̀ǝ̀lé yǝ̀ ǹdǝ Yi gǝ́ n'ê yǎl nɛ́. Wɔ́ Yi rí rǝ̀myɛ́ rǝ̀ n'ê byẽ̀ ába mùnì ga ámyɛ zù rǝ̀ tǝnà y ǹdǝ́ rǝ̀ zùwǝ́ y wǝ ¹³ Nǝ́k'é súlí nǝ́ n'é ce Yi nǝ̀bán myɛ, á gǝ́ yǝ̀ zɔ̀mɛ̀ rɛ́ nǝ́ tú nǝ́ bwǝ̀l nǝ́ byili ába mɔ́ zwẽ ǹdǝ numbyíní zɔ̀mɛ̀ ta mɔ́ yilǝ. Á zwẽ re b'ǎ yě bǝ̀ rǝ́ wɔ́ Yi zɔ̀mɛ̀ zhǝ̀n zhǝ̀nà. Sǝ rǝ̀ n'ê twĩ̀ ámyɛ̌ byɛ̀bɛ́ á zù Kristǝ mó wun ní wẽ́. ¹⁴ Da-byǎ, Zhwifubá nwɛ̀nɛ̀ Yi gùúlí rǝ̀ ŋwɛ́nɛ́ Zhide né, rǝ̀ lyì bí zù Yezu Kristǝ mó. Wɔ́ èta, ámyɛ dwí lyì bí wɛ̀rhɛ́ ába nɛ́. ¹⁵ Wɔ́ Zhwifubá bǝ̀myɛ́ bǝ̀ gu Cǐnnǝ Yezu ǹdǝ́ Yi nyì-zwennǝ bé, bǝ̀ nwɛ̀nɛ̀ nǝ́myɛ. Bǝ̀ t'â pyà Yi pùbùlǝ̀ wɔ̀rhɔ́ yé. Bǝ̀ wɔ́ lyì bí gakó zwǝ̀. ¹⁶ Bǝ̀ n'ê cǝ̀r nǝ́ba nǝ́ bǝ̀k'á bwǝ̀l Yi zɔ̀mɛ̀ rɛ́ nǝ́ byili lyì bí byɛ̀bɛ́ bǝ dǝ̀ Zhwifubá ne mùnì ga bǝ nǝ vwǎrh yé. Èta, bǝ̀ súlí bǝ̀ yǝ̀-bǝlwàálɛ́ bǝ̀ n'ê wɛ̀rhɛ́ twéé twéé mó, rǝ lyɛ̃ cɛ nɛ. Rǝ̀myɛ́ ce, Yi bɛ̃bɛ̃ rǝ ga, rǝ̀ lyim zɛ̃̀ ǹdǝ́ bɛ. ¹⁷ Da-byǎ, nǝ́ zhǐr nǝ́ yẽ̌ ába kɔn la yǝ̀ námpɔ́lɛ́, sǝ nǝ́ yǝ̀ á yò swě yé. Á shil zhe nǝ́ba zhǝ̀n zhǝ̀nà. Rǝ̀myɛ́ ce, nǝ́ r'é pyà ǹdǝ́ nǝ́ wu gakó, sǝ nǝ́ k'á bǝ̀ nǝ́ nǝ ába. ¹⁸ Zhǝ̀nà, nǝ́ y'ǎ n'é yǎl nǝ́ bǝ̀ á sõ. È gǝ wɔ́ àmyɛ́ Pwǝǝ yilǝ, à myɛrhɛ á sõ twírí y twǝr nánzhǝzhɔ̌. sǝ Shǝtana cǝ̀r nǝ́ba. ¹⁹ Wɔ́ ámyɛ̌ á súlí á ce nǝ́ zhe wu-nyɔ̃̀, á ce nǝ́ yě bǝ̀ nǝ́ b'ǎ nǝ yó-dɛ̃̌-zhõ̌ nǝ́ Cǐnnǝ Yezu yé né ń twírí y dɛ̃ rɛ́. ²⁰ Zhǝ̀nà, wɔ́ ámyɛ̌ á n'á zhẽ̌ nǝ́ yó dɛ̃̌, ámyɛ̌ á ce nǝ́ zhe wu-nyɔ̃̀.