¹ Da-byǎ, kɔn dǝ̀ nyɔ́ɔ́ bǝ̀ nǝ́ kɛ̃ sɛ́bɛ́ nǝ́ m'é byili ába yi rí ǹdǝ́ dɛ̃ rɛ́ tɛ̀bɛ́ Cinnǝ mó bàn mɔ́ yé. ² Á cìcì mú yě pamparɛ̃ɛ̃ bǝ̀ dɛ̃ rɛ́ tɛ̀bɛ́ ń bàn mɔ́, ń mà n jàr nǝ́ba ǹdǝ ŋwɔ̀l-bal gǝ́ ya n bǝ̀ cǝcɛ̃ nɛ nɛ́. ³ Lwar-na bǝ̀ lyì bí gǝ tú bǝ̀ n'ê wǝ̀l bǝ̀ èlǎsɛ̃́ myɛ̌, yǝ̀-zùlǝ́ ŋwɛ́nɛ́, bǝ̀ kaka ywẽ bǝ bɛ zhe, wɔ́ rǝ̀myɛ́ yi ní cìcì zwini b'a zǝ bɛ ǹdǝ kɛ̃ pwǐ gǝ́ y'a yì ní. Bǝ̀ t'â la lú yé. ⁴ Da-byǎ, ámyɛ̌ tɛ̀nɛ́ cǝ-byín wẽ́ sǝ dɛ̃ rɛ́ rǝ̀myɛ́ b'e jàr ába ǹdǝ ŋwɔ̀l-bal ta yé. ⁵ Á gakó wɔ́ pwẽ̀ ǹdǝ́ nǝ̀nyɔ́nɔ́ lyì. Nǝ́ dǝ̀ cǝcɛ̃ ráá cǝ-byín lyì yé. ⁶ Rǝ̀myɛ́ ce, nǝ́ bǝ mǝ̌ sǝ nǝ́ dɛ̀ɛ̀ ǹdǝ lyì bí dwã bɛ́ ta yé. Nǝ́ mǝ̌ sǝ nǝ́ zǝ nǝ́ yírhǝ́, sǝ nǝ́ zǝ nǝ́ cìn cɛ̀nɛ̀. ⁷ Lyì bí byɛ̀bɛ́ bǝ̀ n'ê dɛ̀ɛ̀ mɔ́, wɔ́ cǝcɛ̃ nɛ bǝ̀ n'ê dɛ̀ɛ̀. Byɛ̀bɛ́ bǝ̀ n'ê nywɛ̀ sɛ̃́ bǝ̀ tutwi tɛ̃́ mɔ́, wɔ́ cǝcɛ̃ nɛ bǝ̀ n'ê nywɛ̀ mɔ̀. ⁸ Sǝ nǝ́myɛ̌ wɔ́ pwẽ̀ lyì; nǝ́ mǝ̌ sǝ nǝ́ zǝ nǝ́ cìnǝ̀. Nǝ́ mǝ̌ sǝ nǝ́ zǝ nǝ́ Yi-ni-zhú mú ǹdǝ́ nǝ́ sónó w rǝ yǝ̀ kɔn dɛ̀bɛ́ nǝ́ la b'é cǝ̀r nǝ́ cìcì yé ne búlǝ́ jàà wà. Nǝ́ r'é dɛ̃̀ nǝ́ vwǎrh mɔ́. Bà-nà nǝ́ zǝ rǝ̀myɛ́ rǝ yǝ̀ ǹdǝ shǝ̀dáá cɔ̀bɔ́ yǝ́-pú ta nǝ́ pú. ⁹ Yi yǝ̀ nǝ́ba byẽ̀ rǝ̀ la còrhò-tum pɔ yé. Rǝ̀ byẽ̀ nǝ́ba mùnì ga nǝ́ tó nǝ́ Cinnǝ Yezu Kristǝ dɛnnɛ nǝ́ nǝ vwǎrh. ¹⁰ Wɔ́ nǝ́myɛ̌ yil ń cùwǝ̀, mùnì ga, nǝ́ yírhǝ́ gǝ ŋwɛ́nɛ́, ráá nǝ́ gǝ cù myɛ, sǝ nǝ́ tó mo nǝ́ zù nyǔ mǝ̀ t'â la zhɔ̌ wẽ́. ¹¹ Rǝ̀myɛ́ ce, zǝ-na dwã wun ni, s'á j'á n'á sɛ̃ dwã nɛ ǹdǝ́ cícú ǹdǝ á gǝ́ n'á wɛ̀rhɛ́ nɛ́ dwǝ́l ga mɔ́. ¹² Da-byǎ, nǝ́ r'é lwǝ̀l ába bǝ̀ nyámna byɛ̀bɛ́ bǝ̀ ŋwɛ́nɛ́ á yé né bǝ̀ n'ê twĩ̀ mú, bǝ̀ wɔ́ Cinu ń cír be bǝ̀ bǝ̀ yál á yé né bǝ cící ába. ¹³ Nyám-na bɛ, s'á swéné be dɛ̃́dɛ̃́ tum rí tɛ̀bɛ́ bǝ n'ê twĩ̀ mú yilǝ. Jǒm-nǝ ǹdǝ́ dwã ǹdǝ́ yǝ̀-zùlǝ́. ¹⁴ Da-byǎ, nǝ́ r'é lwǝ̀l ába: cící-nǝ byɛ̀bɛ́ bǝ̀ n'ê wɛ̀rhɛ́ yààyàà mɔ́, s'á zǝ byɛ̀bɛ́ wu-zhìlù zhe mó wun ni. Sɛ̃-na byɛ̀bɛ́ bǝ̀ jàn bǝ já mɔ́ nɛ, s'á zǝ cìn-pyɔ́nɔ́ ǹdǝ́ lyì bí gakó. ¹⁵ Dɛ̃̌-na á cìnǝ̀, lò lò bǝ̀ká càrhh lwɛlɛ ǹ dõ ne yé, s'á pyà cɛ̀nɛ̀ ǹdǝ́ dwã, ǹdǝ́ lyì bí gakó. ¹⁶ Ce-nǝ á wun yǝ̀ nyɛ̀n twéé twéé. ¹⁷ Lwǝ̌l-nǝ Yi dɛ̃ gakó. ¹⁸ Ce-nǝ Yi nǝ̀bán kɔn gakó wẽ́. Wɔ́ èta rǝ̀ n'ê yǎl b'ǎmyɛ̌ byɛ̀bɛ́ á mù dwã nɛ ǹdǝ́ Yezu Kristǝ mó wɛ̀rhɛ́ nɛ́. ¹⁹ Á bǝ̀k'á cǝ̀r Eshirhǝ náàcɛ̀nɛ́ tum rí yé ne yé. ²⁰ Á bǝ̀k'á fulsi zɔ̀mà nɛ́ nyɛ̀bɛ́ è n'ê tó lyì bí dɛnnɛ è zɔ̀m mɔ́ yé. ²¹ Nyǐ-nǝ kɔn gakó náàcɛ̀nɛ́, s'á cír tɛ̀bɛ́ rǝ̀ càn mɔ́. ²² Dɛ̃̌-na á cìn ǹdǝ́ lwɛlɛ dwí gakó ²³ Wɔ́ Yi cìcì rǝ̀ n'ê pɛ yǝ̀-zùlǝ́. Rǝ̀ b'a ce á yǝ̀ rǝ̀myɛ́ lyì námpúm, sǝ rǝ yìlì á ywǝ́lsé ǹd'á wun ní ǹd'á yala nɛ́, á m'á dɛ̃̀ dɛ̃ rɛ́ tɛ̀bɛ́ nǝ́ Cinnǝ Yezu Kristǝ ká ń bàn mɔ́, mùnì ga dóó bǝ̀k'a jòm á yó w yé. ²⁴ Mɔ̀bɔ́ ń nǝ́ ń byẽ̀ ába mó wɔ́ zhǝ̀n-cí. Wɔ́ ńmyɛ̌ ń mà n wɛ̀rhɛ́ rǝ̀myɛ́ gakó. ²⁵ Da-byǎ, lwǝ̌l-nǝ Yi nǝ́myɛ yilǝ. ²⁶ Ce-nǝ Kristǝ-lyì bí gakó á pǝ nǝ́ba, bǝ̀ nǝ́ wɔ́ da-byǎ. ²⁷ À n'â lwǝ̀l ába Cinnǝ mó yil ré yilǝ, s'á kàrmǝ̀ sɛ́bɛ́ rɛ́ tɛ̀bɛ́ á byili Kristǝ-lyì bí gakó ne. ²⁸ Nǝ́ Cinnǝ Yezu Kristǝ mà n cĩ́ bwǝl á yó!