¹ Inyong ajyo dosong, “Diri ajyo nang dothai, owoni homok hothai howetha dini, haang de opil aye dihitheni h’atehuna ohobye l’Ojok ainduna th’akolon.” ² Diholu operok inde, eyaru Yesu Petro, Yakobo karik Yoanne dihide hodonge lohodo, isong hamaring diya. Thiya, eloitho inyong dihithemi hosong. ³ Awuloi, abongoitho hanyong, awilang ara abongi pang pang; obwori tholohide hanera oilalayit adi l’opeceni ilalayerek. ⁴ Thiya Elijah ho Musa aleyori dosong; isong acama ho Yesu. ⁵ Petro etharangyo, ajyo do Yesu, “Ohoityenani, oyyu dohothai disuka dine. Ohoi thoduhoi athwahio aunihoi: aboithe dohoi, aboithe do Musa karik aboithe do Elijah.” ⁶ (Aca aang isong otek, ainyong ira isong icama. Abangi nya isong.) ⁷ Adiko aindu, emuhok isong. Thiya, oilolonge aindu thath’adiko, “Olonyi hindang lo lamuno nang. Ithaningyethe donyong.” ⁸ Kwak ahani, amijyo nasong eker karik ehiji nasong, aang horimahini othulo loboling hosong, arahari Yesu. ⁹ Ecuruna nya nasong thodonge, anyahi inyong isong thaang othulo lobo ainyong atehu isong tok Olonyi l’Othulo ebuhuna th’ohoyak. ¹⁰ Ahani ne, edehini arami hua dosong hamaring, ti, elafereji dihiji hosong, ainyong ojyo, “Ebuhuna th’ohoyak?” ¹¹ Isong efiyo inyong, “Anyo ojyo ohoigerok hijan Elijah de icak ainduna ahithemi?” ¹² Inyong ajyo dosong, “Oindu Elijah ahithemi, doindu inyahahina asang fodok dimaji hosong. Anyo hathi igero inyong hijan owak Olonyi l’Othulo thoithathacianai asang olwarai karik alauni inyong? ¹³ Ti, ajyo nang dothai hijan athuk Elijah ainduna; ehandyo isong ainyong owak isong thonyong, iring nathuhi egerorik thonyong. ¹⁴ Afuna nasong d’ohothifok, atehuni elulung nahittok n’ohothing, olihak isong, ahibu ohoigerok ilafereji hosong. ¹⁵ Atehuna nasong Yesu, afalangai, angerori donyong karik emandaye inyong. ¹⁶ Inyong efiyo ohothifok honyong, “Ainyong ilafere isong hosong?” ¹⁷ Lobo othulo thath’elulung etharangyo inyong, “Ohoityenani, eyanu nang oitho hindang dohoi. Owon h’ohoile laang ohorik inyong accama. ¹⁸ Indafaitho amirok inyong dihap, okofutok eyafutha dihuthuk karik erocyo ohala, eronghodoro. Efiyo nang ohothifok hohoi thongaterek inyong adi, ti, aang ocohini angaterek. ¹⁹ Inyong etharangyo isong, “Oper laang iruk lo; lwai kanu iwak ithai nang thoisukai hothai? Lwai kanu de angongyo nang hothai? Iyanethek inyong donang.” ²⁰ Isong eyanu oitho donyong. Atehuna n’ohoile Yesu, amirok kwak inyong ditha h’ehihira. Apwaharu oitho kwak dihap ara ahuthuk eyafutha ara okofuthot. ²¹ Yesu efiyo omonye, “Eyaru omiru baya dijahitha honyong ahani?” ²² Omonye ajyo, “Gee howon ara okalifonit, Omiryecyo nya inyong ditha h’ahimang, ahari dia karik athemyo engohina inyong adi. Ara ocohi iye ehandyo aning naboling, omiehunu ohoi karik olwaha ohoi. ²³ Jesu ajyo donyong, “Ara ocohi dohoi?” Acohohini asang bukulung dihandyo, d’othulo leruk. ²⁴ Kwak ahani, omonye l’okalifonit elulwo bebe, ajyo, “Eruk nang! Olwaha aangan hindang eruho!” ²⁵ Atehuna no Yesu elulung angeruna dosong, eringyo ohoile loibot, ajyo, “Iye ohoile lodularu karik lothuho, anyahi nang dohoi, iindu adi thothnyong; hoinyak ajingahina ditha honyong ikoti.” ²⁶ Inyong lo ekor dindak, ethahihiryo okalifonit bebe karik thiya, aindu adi. Ajahitha oitho lathuk aye, ojararik ohothing holwa, “Aye inyong.” ²⁷ Ti, Yesu endefu inyong th’ahinang, adohu inyong dihide, ethawejik oitho thahide. ²⁸ Ainduna no Yesu dihang, efiyo inyong ohothifok honyong hamaring, “Anyo aang ohoi icohi angararik inyong adi?” ²⁹ Inyong ajyo dosong, “Opecen lya aang ocohi angararik dindak, arahari th’omojit.” ³⁰ Isong afwo dingwai thiya tholo Galilea. Aang howak othulo loboling thoteha dingai ofwo isong. ³¹ anyo, inyong nya lodityenio ohothifok honyong. Inyong ajyo dosong, “Ofuni de isarahina Olonyi l’Othul dihas h’ohothing, hofuni de ithayeyo inyong. Operok aunihoi diholu ethayeyo nanyong, oindu de ibuhuna thoye. ³² Ti, kabong isong otek tuhudik ocame lya. Abangi isong efiyo inyong. ³³ Thiya isong afuni di Kapernaum. Diholu h’ajingara nanyong dihang, efiyo inyong isong, “Ainyong dwo ilafere ithai diyihoi?” ³⁴ Ti, adularu isong. Aca ilafere isong nya arami ho ngai thosong lahong bebe. ³⁵ Awaniara nanyong dihap, elongu tomon larehai ara aboithe, ajyo dosong, “Ara owak lobo awonan ahithemi, thoiwona diholu, karik awon ara ohoigyemani losong fodok.” ³⁶ Eduhu okalifonit lotti, esarak dihiji hosong. Inyong adohu inyong dihinasik honyong, ajyo dosong, ³⁷ “loifothu okalifonit iring lya thofure tholohindang, ifothu nang; loifothu nang, ikara nang ifothu, ti, ifothu le, losulu nang.” ³⁸ Yoanne ajyo donyong, “Ohoityenani, etehu ohoi othulo loboling ongaterek ohoilehio homonyong th’ofure tholohoi; ethawejyo ohohi inyong, anyo, aang othifoitho ohothai.” ³⁹ Ti, Yesu ajyo, “Hoithwejyethek inyong, anyo, awang othulo loihandyo egyemathik hafalangai th’ofure tholohindang, diholu, acama thonang arami hamonyong. ⁴⁰ Laang ida ohothai, inyong lo lohothai. ⁴¹ Loisarak iye oibithi l’ahari thomathai th’ofure tholo hindang, anyo, iye lo Kristo, ajyo nang dohoi diri, aang ithalithok esorio nanyong. ⁴² Loisarak aboithe th’okalifinok hoiruhi donang hulo, thoibosoi, ira nya iyiji donyong efithahina omorwong dimurut honyong, amirohini ditha h’ahari nahittok. ⁴³ Ara isarak iye ahinang nahoi eboso, obongu adi. Oyyu dohoi dijingahina ditha hesu ara lopala, th’awonan h’ahas arehai, ara iye ilo ditha h’ahimang, naang odunya, ^{44 45} Ara isarak iye aheju nahoi eboso, obongu adi. Oyyu dohoi dijingara disu ara longura thawonan h’ahejek arehai, amirohini ditha ahimang. ^{46 47} Ara isarak iye ahonyek eboso, ikolouthu adi. Oyyu dohoi dijingara d’ohobye l’Ojok h’ahonyek aboithe, th’awonan h’ahonde arehai, amirohini iye dinferno. ⁴⁸ Amaji naang ohoteng lonyong oye. karik ahimang naang ithadunyunu. ⁴⁹ Aca ofuni de ithasilihyo ohothing fodok th’ahimang. ⁵⁰ Oyyu ahipere. Ti, ara athuk adwaran n’ahipere alitho, angai de horimahini adwaran n’ahipere ikoti? Owonatha h’ahiere dihiji hothai, karik isukathik h’elik dihwandek hothai.