¹ Yesu edyaharu amaji nya, alo dihap ho Judea karik d’oyirik thele h’Owor lo Jordano; ara elulungir h’ohothing afuni donyong ikoti. Etyenio inyong nya ikoti iring nanya ihandyecerek inyong. ² Thiya Ofarisei afuni ithemyo inyong, efiye, “Obis d’onde didara afure nanyong?” ³ Inyong etharangyo, “Ainyong nya onyahi Musa ithai thoihandye?” ⁴ Isong ajyori, “Ahorik Musa othulo thoigerye amanini nedararik afure, asulak inyong na adi.” ⁵ “Othaja hothai hoko ahani hulya isarak Musa egerohina ithai oyalu lojak ahani lya,” Yesu ajyo dosong. ⁶ “Ti, thoculwe h’ayeyo, ‘Ayeyo Ojok isong ara lobusuha karik nangorwo.’ ⁷ ‘Th’ahu thone, idehi de othulo omonye karik ahathingi, aindu imorihunu h’afure, ⁸ ara arehai afuni irahan ara ahwan aboithe. Aang harahi arehai, ti, ahwan aboithe. ⁹ Inyong nara, aning nathuk Ojok enuthahina aboithe, othulo lobo thaang horitha. ¹⁰ Omiru isong dihang, efiyo inyong ohothifok arami hune ikoti. ¹¹ Inyong ajyo dosong, “Longaterek afure, amuthayo athulo nabo, iyau h’athulo ne. ¹² Nedehi onde, amuthayo othulo loboling, iyau h’othulo lya. ¹³ Thiya isong eyanu okalifinot hosong hottik donyong, doindu inyong iyithin isong, ti, ohothifok eringyo isong. ¹⁴ Ti, edoruna no Yesu, engere, ajyo dosong, “Oburahina okalifinok hottik thoifunu donang, hoilwathik isong, aca ohobye l’Ojok losong, karik l’ohothing hojahitha isong. ¹⁵ Diri ajyo nang dothai, laang ifothu ohobye l’Ojok iring okalifonit lotti lo, aang de do ti hojinga ditha honyong.” ¹⁶ Thiya eduhu okalifinok dihinasik honyong, aboroyo isong ahibu inyong athuk esarahina isong dihinasik honyong. ¹⁷ Aculuyo nanyong adaha nanyong, othulo lobo angeru donyong, arigongo dihithemi honyong, efiyo inyong, “Ohoityenani loyyu, ainyong owak ehandyo nang, dirimahina ohobye lomanya mak?” ¹⁸ Yesu ajyo, “Anyo ilongo iye nang loyyu? Aang lobo loyyu, arahari Ojok hamaring. ¹⁹ Itek iye efahitha: Hoittoho, Hoiferorik afure dia onde lanabo, Hoihoholyo, Hoimangyo, Hoidwala karik Ithahabuye loimonye karik nehathingi.” ²⁰ Othulo lya ajyo, “Ohoityenani, athifoitho nang asang hune fodok hawon nang ara ottwathi. ²¹ Yesu amijyo donyong, amuno inyong. Inyong ajyo donyong, “Owon aning aboithe naang thohoi, ithanyangak attitto hahoi fodok ara iye isarak d’ohoicanak, ara iye de iwon h’ebarithi dihide. Thiya, iwong, othifunu nang.” ²² Ti, th’ocame tholya, amukutha, alo adi ara lejyorya, anyo, owon inyong lo h’asang olwarai. ²³ Yesu amijyo indehai arani, ajyo d’ohothifok honyong, “Angai oko d’ohobarak dijingahina d’ohobye l’Ojok!” ²⁴ Afalanga ohothifok ocamitha honyong. Ti, Yesu ajyo dosong ikoti, “Okalifinok, angai oko inyong dijingahina ditha h’ohobye l’Ojok!” ²⁵ Ilik d’akonkoni dijingara th’ohuthuk hoihwai, th’ajingara n’othulo lobara ditha h’ohobye l’Ojok. ²⁶ Afalanga nya isong bebe, acamai dihiji hosong, “Ara ahani, ngai ocohi ethalwahunu?” ²⁷ Yesu amijyo dosong, ajyo, “D’ohothing, aang ocohi, ti, ikara d’Ojok. D’Ojok aang aning naang ocohi!” ²⁸ Petro aculuyo acama donyong, “Ottiha, edehi ohoi asang fodok, karik ethuk ohoi athiforo Iye.” ²⁹ Yesu ajyo, “Diri, ajyo nang dothai, aang lobo ledehi ahang, olarok, ahanerok, ahathingi, omonye, okalifinok dia ahap thonang karik th’evanjelio, ³⁰ aang hoifothu esihe enyahitha olwarai thene d’oper lo: Ahangithek karik olarok, akalifinok karik ahap, h’ethagyemitha, karik ditha h’ahap naindu karik esu namanya mak.31 ³¹ Ti, ohothing holwarai howoni de ara ohoithemo, ofuni de dihholu, ara hothoholu, afuni ara ohoithemok.” ³² Isong nya d’oyihoi lolo di Yerusalem, ahibu Yesu ahithemi nasong. Afalanga ohothifok. ara ohothing hothiforo isong abangi. Thiya, Yesu ikoti eyaru tomon larehai, aculuyo anyahina isong ainyong nalo ifuhon donyong. ³³ “Idorotho, ohothai hoifwo di Yerusalem; Olonyi l’Othulo, lofwoi ithafothohini da fadiri hohittwak karik ohoigerok; obongok isong de inyong lo ara lottohori, ethafothohini d’ohothing hoikela th’Ojudei. ³⁴ Ithalubangyo isong de inyong, amicye ahamilak donyong, abahye inyong karik athayeye inyong. Ti, diholu h’operok aunihoi, oindu de ibuhuna.” ³⁵ Olonyirok ho Zebedeo, Yakobo karik Yoanne, afuni donyong, ajyori, “Ohoityenani, iwak ohoi ihandye dohoi aning nefiyo ohoi dohoi. ³⁶ Inyong ajyo dosong, “Ainyong iwak ithai ehandyo nang dothai?” ³⁷ Ara isong ajyori, “Ohorik ohoi thowoni hohoi di bolori hohoi, aboithe d’ahinang nenget karik loboling d’ahinang noihothong.” ³⁸ Ti, Yesu etharangyo isong, “Aang ithai itek ainyong ifiyo ithai. Icohi ithai de amatha oihutye lamatha nang de, dia efothuna batisimo, thanabuhohini de donang. ³⁹ Isong ajyori donyong, “Icohi ohoi,” Yesu ajyo dosong, “Oihutye lamatha de nang, imatha ithai de. karik batisimo nabuhohini de donang, obuhohini de dang dothai. ⁴⁰ Ti, ngai owoni dinget dia dihothong honang, ikara hindang disarahina, ti, n’ohothing, honya athuhi ehuhumahina ara nasong. ⁴¹ Ethaninguna n’ohothifok tomon hulo arami hune, aculuye engere bebe ho Yakobo karik Yoanne. ⁴² Yesu elongu isong donyong, ajyo, “Itek ithai ohothing hoiruhuni ara ohoindefak h’ohothing hoikela th’Ojudei, indafaithe isong ara nako, karik ohoigyemak hosong hohittwak, endafaithe ohigyemak hosong th’elahong. ⁴³ Ti, ikara ahani dihiji hothai. Lowak ainduna ara lahong lothai, thoiwona ara ohoigyemani lothai, ⁴⁴ karik lowak awonan dihithemi dihiji hothai, thoiwona ara ongaca lothai bukulung. ⁴⁵ Aca aang Olonyi l’Othulo oindu nya dithagyemayo, ti, digyema karik disarahina esu nanyong didumunerek ohothing holwa.” ⁴⁶ Isong afuni di Jeriko. Edehina nanyong Jeriko h’ohothifok honyong karik elulung nahottok, orimak ahibu lolonyi ho Timaeus, Bartimaeus, ohomojoni ongodoni, owoni diker h’oyihoi. ⁴⁷ Ethaninguna nanyong nya hijan Yesu la Nazarete le, aculuyo erwaha, ajyo, “Yesu, Lolonyi ho Davide, omiehi nang!” ⁴⁸ Ohothing olwarai eringyo othulo longodo lya, anyahini inyong thodularu. Ti, inyong lo ekor hathi bebe, “Lolonyi ho Davide, omiehi nang!” ⁴⁹ Yesu awetha, anyahi inyong thoilonguni. Isong elonguni othulo longodo, ajyori, “Ithangerejye ahwan! Odothoi thahide! Inyong lo, lethalongo iye.” ⁵⁰ Amirok abongo nanyong nauk arakan, awaa dihide, alo do Yesu. ⁵¹ Yesu etharangyo inyong ajyo, “Ainyong iwak iye ehandyo nang dohoi?” Othulo ongodoni ajyo, “Ojok hindang, awak nang efothuna atehuna hindang.” ⁵² Thiya Yesu ajyo donyong, “Ilo, ethayijyo iye eruhon nahoi.” Kwak ahani, acohi inyong atehuna ikoti. Inyong, athiforo inyong diyihoi.