¹ Thene, afuna nasong di Yersalem, aindek isong di Bethphage karik Bethany di Donge h’Olives; Yesu asulak arehai ohothifok honyong, ² ajyori dosong, “Ifwatha d’amiji nothele hohothai nya. Ajingara nathai diya, irimak ithai de angaring n’ababut nakabong odohohini dihide honyong. Ohouna, ara ithai iyanu donang. ³ Ara ajyo othulo lobo dothai, ‘Anyo ihandyo ithai ahani?’ ijaratha, “Ohobu owak inyong na, inyahunu ohoi de kwak hine''. ⁴ Afwoi isong, afwoi irimahina angaring n’aluhumar ne oyena dihuthuk h’oyihet dipogo h’oyihoi lohittok, alahunai. ⁵ Ohothing homok honya owetha diya, ajyori dosong, “Ainyong ihandyo ithai, ilaharu ithai angaring n’aluhumar?” ⁶ Acama isong dosong, iring nadwo onyahinerek isong Yesu; ara ohothing hulya edehini isong thoifwa oyihoi losong. ⁷ Eyanu isong angaring n’aluhumar,amirohini abongoitho dihide honyong, inyong lo awoni dihide honyong. ⁸ Ohothing holwa afecyo abongoitho hasong diyihoi, homok afecyo athandak hayefunu isong thomandak. ⁹ Ohothing hofwo ahithemi karik hothiforo isong, elolongoi omurut dihide, “Hosanna! Loindu th’ofure thol’Ohobu, thomunoi. ¹⁰ Ohobye l’omonye lohothai Davide loindu thoborye! Hosanna dihide bebe!” ¹¹ Thiya, Yesu ajinga di Yerusalem, alo ditha a Tempolo didoryo asang fodok hothiya. Aangan n’orii, alo di Bethany h’ohothifok honyong tomon larehai. ¹² Nya moithe, afwan nasong adi tho Bethany, aleng inyong ahure. ¹³ Atehuna nanyong olamarai ohiyani l’ahayo loli abene, alo itihyo inyong ara owon h’ahayo dihide honyong; ainduna nayong d’ohiyani lya, aang orimak aning naboling, arahari abene hamaring. Ikara omiru hule h’oyandik h’ahayo. ¹⁴ Inyong acama d’ohiyani, “Aang othulo lolo inyo ahayocong thohoi ikoti.” Ara ohothifok honyong ethaningu arami hune. ¹⁵ Isong afuni di Yerusalem, ajingari di Templo, aculuye angaterek ohoithanyangak karik ohoinyangak adi tho Templo, alafuhyo obeleha h’ohoiloyithok h’enyahwo karik okani h’ohithanyangak h’amami. ¹⁶ Alwo ohothing bukulung eyaru asang hafwoi ithanyangyo athana Templo. ¹⁷ Etyenio isong, ajyo, “Aang hoigero, ‘Aang de ofuni ilongo athwa hindang, ara athwa n’amojo n’amisok bukulung’? Ti, awon dothai ara athwa n’ohohorok.” ¹⁸ Ethairuna no fadirihio hohittwak karik ohoigerok arami hacama inyong hune, athifeye oyihoi lowaharik etharohijyerek inyong. Aca obangi isong inyong, anyo, elulung bukulung n’ohothing ofalangai etyenio nanyong. ¹⁹ Edwongon n’athari, edyaharai abore. ²⁰ Adaha nasong nya thamoithe berien, atehuni olamarai ohjyani l’ahayo lo, ayoho adi tok dihade honyong. ²¹ Petro eyuu, ajyo donyong, “Ohoityenani, Idoro! Ohiyani l’ahayo, lefyethak iye lo, ayoho.” ²² Yesu ethangyo isong, “Owonatha h’eruhon d’Ojok. ²³ Diri ajyo nang dothai hijan ara ojyo loboling d’odonge lo, ‘Odothoi th’ahide, omirok ahwan nahoi dithah’ahari nahittok,’ ara aang hoiririhitha dithaji honyong, ti, eruk hijan aning nacamai ne, ofuk de, inyong ne aning de nehandyo Ojok. ²⁴ Iring ahani ne, ajyo nang dothai: Asang bukulung hemojyo ithai ara ithai ifiyo, ara ithai iruhu hijan efothu ithai, owon de aning nya ara nathai. ²⁵ Ara iwetha iye thahide, ara iye imojyo, omiehi asang fodok hedararik iye othulo loboling, domiehi iye dang lee Monye lowon dihide ohothing hoihandyo iye ara namonyong.” ^{26 27} Dihide h’adaha nya no Yesu ditha Templo, afuni h’ofadiri hohittwak, ohoigerok karik ohobolok donyong, ²⁸ Isong ajyori donyong, “Th’akolon thanangai ihandye asang hune, karik ngai isarak iye akolon nehandterek iye ne?” ²⁹ Yesu ajyo dosong, “Efiyo nang ithai efiet aboithe. Inyahina nang, anyahi nang de ithai th’akolon thanangai ehandyo nang asang hune. ³⁰ Abatisimo no Yoanne, inyong na thohide dia th’ohothing?” ³¹ Isong hulo elafereji dihiji hosong, anyahini ajyori, “Ara ejyo, ‘Thohide,’ ojyo de, “Anyo naang ithai iruk donyong?’ ³² Ti, ara ejyo, ‘Th’ohothing,’ Obangi nya isong ohothing, anyo. otehi isong nya tuhudik hijan Yoanne nya ohcoroni. ³³ Thiya, isong etharang Yesu ajyor, “Aang ohoi itek.”Thiya, Yesu ajyo dosong, “Aang nang dang anyahi ithai th’akolon thanangai ehandyo nang asang hune.”