¹ Thiya Yesu aculuyo etyenio isong th’aryamarihio. Inyong ajyo, “Owon othulo loidula amana n’ahayo. Aduho oilyethe, abohyo angulume namoyerek ahayo, abohok oilyethe loikeyerek karik ethanyangak d’ohoinyangak karik ohoithanyangak h’ahayo. Alo dipoco. ² D’omiru hocohini ahani, efahak ohoigyemani thoiyahak inyong ahayo hamok thomana. ³ Ti, isong eduhu inyong, abahye kark angararik inyong adi kwong aning nabo thohinang. ⁴ Koti, inyong asulak donyong ohoigyenai loboling. Isong ikoti dang eryafuni lya dihu. Ethajuhini ahu. ⁵ Inyong ikoti asulak hoigyemnani loboling. Isong attohori lya. Isong hulo ehandyo ahani dohomok, abahye homok ara homok attohori. ⁶ Afithoro othulo aboithe donyong disulahina, olonyi lomunoi. Ara inyong aboithe tong, osulalak inyong dosong. Inyong ajyo, “Obangi de isong olonyi hindang.” ⁷ “Ti, ohoromok h’ahayo h’obalu acama amonye, ‘Inyong lya ohoruthani. Ifuna, hattohoro inyong, dowon aruthahina ara nahothai.’ ⁸ Isong endefuni, attohori, amiroroi inyong adi thomana. ⁹ Ahani ne, ainyong de ihandyo lomonye amana? Oindu de, etharohojyo ohoromok hulya adi, esarak amana dohomok. ¹⁰ Kabong ithai ihena dith’amanini nagwa na? ‘Omorwong lonya edari ohoduhok lo, awon ara omorwong l’asihothe. ¹¹ Asang hune nya th’Ohobu, hamuji nya bwaya dihinde hohoi.” ¹² Diholu h’arami hune, ohithwaha h’Ojudei athifyo oyiho loindefunerek Yesu, anyo, atehi isong tuhudik hijan ocama aryamara ne ara namknyong thosong. Ti, obangi nya isong elulung n’ohothing. Inyong na, edyaharai inyong, afwoi adi. ¹³ Thiya efahak isong Ofarisei homok karik ohothifok ho Erode donyong, dilohuna inyong thocamitha. ¹⁴ Afuna nasong, ajyori donyong, “Ohoityenani, arami haang oyiji hegigilo ohothing, ikara hahoi, anyo, aang iye ikelyo. Ityenio iye diri oyihoi l’Ojok. Obis diduma Cesare enyahwa dia ipal? Owak iduma ohoi dia aang ohi iduma?” ¹⁵ Ti, otek Yesu adwala nasong, ajyo dosong, “Anyo ithemyo ithai nang? Iyanethek sede adenario ne atihyo nang.” ¹⁶ Eyanai aboithe do Yesu. Ara inyong ajyo dosong, “Hangai arijori karik oigeritha hothonyong huna?” Isong ajyori, “Ho Cesare.” ¹⁷ Yesu ajyo, “Isarahina do Cesare, asang ho Cesare, ara ithai isarak d’Ojok asang h’Ojok.” Afalangai thannayyu donyong. ¹⁸ Ara Osaduccees, hojyo awang ebuhuna, afuni donyong.Isong efiyo inyong, ajyori, ¹⁹ Ohoityenani, egero musa thohoi, “Ara othulo oye, edyaharu afure kwong oitho, ocohi d’olai l’ohayani aruthahina afure, ayisok inyong oduring. ²⁰ Owon nya olarok cofa; amuthayo ohoithemoni afure, thiya, aye kwong oitho. ²¹ Thiya, oitharehe aruthak, aye kwong oitho, oithaunihoi dang ahani. ²² Oithacofe dang, kaang hoidyaharu oitho. Dicuhit hosong fodok, athulo ne aye. ²³ Dibuhuna, ara ohothing hadotho ikoti, ara nafre hongai oindu inyong iwonan? Aca awon nya inyong ara afure n’olarok cofa hulya bukulung.” ²⁴ Yesu ajyo, “Ikara arami hune hesarak ithai epalan huna hune, anyo, aang ithai itek amaninihio hadwa dia akolon n’Ojok? ²⁵ Aca ara isong hadotho th’ohoyak, aang homuthaye dia ithamuthahini isong, ti, afuni isong iwonan ara anjelohio dihide. ²⁶ Ti, ara th’arami thoh’ohothing hoibuhu, kabong ithai ihena amanini no Musa, d’arami h’omiyang, angai ocama Ojok donyong, ajyo, “Nang Ojok l’Abramo, lo Isako karik lo Yakobo’? ²⁷ Ikara inyong Ojok l’ohoyak, ti, Ojok l’ohoiswok. Epal ithai do ti.” ²⁸ Aboithe l’ohoigerok aindu, ethaningyo ofere losong; atehu inyong lo etharang isong Yesu tuhudik. Efiyo inyong, “Nani efahit nako, okalak isong fodok?” ²⁹ Yesu ethangyo, “Nako okalak bebe inyong na, “Ithairye, Israele, Ohobu, Ojok lohothai, Ohobu aboithe. ³⁰ Omunoi Ohobu, Ojok lohoi th’othaji tholohoi bukulung, th’ohoile tholohoi bukulung, th’ahu thanahoibukulung karik th’akolon thanahoi fodok. ³¹ Efahit etharehe inyong na, ‘Omunoi othulo dia athulo naindek dohoi iring ahwan nahoi.’ Aang naboling efahit nakalu hune.” ³² Ohoigeroni ajyo, “Oyyu. Ohoityenani! Ethuk iye ajaran tuhudik hijan Ojok aboithe, karik awang lobo arahari inyong. ³³ Thomunoi inyong th’othaji fodok, th’ahu fodok karik th’akolon fodok karik thomunoi othulo dia athul naindek donyong iring ahwan nanyong. okalu fodok adi esoritha karik ehumaitha hamudye.” ³⁴ Atehan no Yesu hijan athuk inyong lo esarahina etharangio nabis, ajyo donyong, “Aang iye ilama th’ohobye l’Ojok.” Diholu h’arami hua, aang lobo lefifiliyo efiyo Yesu. ³⁵ 35 Ahibu nya Yesu ityenio dimaji h’oyalu la Templo, ajyo, “Angai ojyori ohoigerok hijan Kristo, olonyi lo Davide? ³⁶ Daivide thahwa, ajyo ditha h’Ohoile Lodwa, “Ohobu ajyo d’Ohobu hindang, owoni dinget honang, tok nang esarahina omerok hohoi thohop h’ahejek hahoi.” ³⁷ Davide thahwan elongo inyong, ‘Hobu.’ inyong na, angai ocohi Kristo awonan ara olonyi lo Daivide?”Ethaningyo elulung anhittok donyong th’amuno. ³⁸ Dityenio honyong, Yesy ajyo, “Omijyethek tuhudik ohoigerok, howak adaha dith’abongoitho ahodorak karik emandaye isong d’amasok h’elulung, ³⁹ karik awoni h’okani h’abolori di synagogues karik d’amasok habolori h’amuno. ⁴⁰ Odilyo isong dang athwahio h’aharathak, amojyoi omojitha ohodorak dotehuni isong ohothing. Orimahini de ohothing hulya edara n’ohothing isong nahittok. ⁴¹ Yesu awoni dihithemi h’amaji namiryerek esoritha di templo; engengelyo ohothing homiryo enyahwo ditha epi. Omiryo ohobarak holwa enyahwo halwa. ⁴² Thiya, aharathani ehecanani aindu, amirok diya ebilat arehai, orijoroi iring agirisi arehai. ⁴³ Inyong elongu ohothifok honyong, ajyo dosong, “Diri, ajyo nang dothai, esarak aharathani ehecanani enyahwo hakalu h’ohothing fodok hamirok enyahwo dipi. ⁴⁴ Omirohini isong hulo thahalwa hasong; ti, aharathani ehecanani ne, eduhu th’eacan nanyong, esarak bukulung hahera inyong isworik''.