¹ Aden nya no Yesu adi tho Templo, aindu aboithe th’ohothifok honyong, ajyo donyong, “Ohoityenani, otiha alibori n’omorik karik athwahio hathuhi aduho!” ² Yesu ajyo donyong, “Itehu iye athwahio hahittwak hune? Aang de juk aboithe loindu isuka dihide holobo, kwong alafuhohina adihap.” ³ Awoni nanyong d’adonge n’Olives namijyo ada Templo, efiye inyong hamaring Petro, Yakobo, Yoanne karing Andrea, ⁴ “Inyahi ohoi, kanu de ofuni asang hune ifuhon? Aisong de ethaithitha hanyahi hijan aindek asang hune afuhon? ⁵ Yesu aculuyo ajaran dosong, “Omijyethek tuhudik, othulo lobo thaang hoithapnyaru ithai adi th’oyihoi lobis. ⁶ Ofuni de holwari th’ofure tholo hindang, ajyori, ‘Nang, inyong.’ afuni ithai de ithapanyaru th’oyihoi lobis. ⁷ Ara ethaningu ithai aremon dia olodok l’aremon, hoibangatha, ofuhi de asang hune, ti, kabong ecuhit hoindu. ⁸ Oindu de amiji idotho, aremorik amiji nabo, ara ahabwore eriborik ahabwore. Owon de arithirithihio karik ahure d’amasok olwarai. Isong hune aculwetha h’adihari n’athamana. ⁹ “Iwona ara abuhu nahwan nahoi. Iyarai ithai de d’elulungir h’ohithwaha karik abahye ithai de ditha synagogues. Iwetha ithai de dihithemi h’ohoindefak h’abottok karik h’ohobusi, thonang, ara nanyahinerek isong. ¹⁰ Ti, evanjelio thoilolongohini d’amisok bukulung ahithemi. ¹¹ Ara endafaithe, eyarai iye, hoihaya ainyong de ilo iye icama, anyo th’orii le, isarahini iye ainyong de ilo iye icama; ikara iye de ilo icama, ti, Ohoile Lodwa. ¹² Oindu de olai isarahina olai thottohori, oindu de omonye isarahina okalifonit thottohori. Ofuni de okalifinok iriborik omonye karik ahathingi, afuni isarahina isong thottohori ¹³ Ofuni de ohothing fodok imanan ithai, anyo, th’ofure tholo hindang. Ti, longongok tok dicuhit, oindu de ithalwahunu. ¹⁴ “Ara etehu ithai amana n’amiehunu owetha d’amaji naang inyong ira iwetherek” (Ohoihenani thoteha tuhudik) “ohothing ho Judea thoingero di dongiok, ¹⁵ Lowon dihide h’athwa, thaang hoicuru dihap dijingara ditha dia diduhuna aning nabo thothwa. ¹⁶ Lowon dimana, thaang honyahu dihang diyaru abongo nauk thomiji. ¹⁷ Omonyong de bebe d’ahathing hemoho karik ahathingie hethanahyo. ¹⁸ Omojyothik ecuhit nahap thaang hofuho th’ohomio. ¹⁹ Operok hule hethathaciana, hakang owonderek gee thoculwe h’ayeyo, nthuk Ojok ayeuna lwai hongorna, awang, aang hoindu iwonan. ²⁰ Ara kabong Ohobu hoindu ithasuhyo operok, awang mwai othulo loindu ithalwahunu. Ti, th’arami thoh’othulo logweluni, lathuk inyong anyimuna, obongyo operok honyong ara hosuk. ²¹ Thiya, ara ojyo lobo dohoi, ‘Otiha, Kristo lo!’ dia ‘Idoro,inyong lo lo!’ hoiruk.’ ²² Aca ofuni de ho Kristo karik ohocorok hoikela ileyori; ofuni de isarahina ethaithitha hafalangai, dithadwalyerek, ara ocohi, juk lanyimni lo. ²³ Omijyethek tuhudik! athuk nang anyahina ithai asang hune bukulung dihithemi h’omiru. ²⁴ Ti, diholu h’ethathacianitha h’operok hulo, oindu de oholong iriohon, aang de oyefa iinduna ifangan, ²⁵ ofuni de ohilyefi idoitha thohide, karik akolon nothohide, oindu de ithathanianga.’ ²⁶ Thiya ofuni de itehuna Olonyi l’Othulo oindu dith’adikolo, thakolon karik th’ablori thanahittok. ²⁷ Thiya oindu de isulahina anjelohio honyong disuduhun ohothing honyong hanyimuni th’ahomwathik arangwan th’ecuhitha h’ahap karik ecuhitha h’ahide. ²⁸ Iyeyenathik th’ohiyani l’ahayo. Ara athandak habunyu, aliji, otiha hijan aindek Ohiribo. ²⁹ Inyong nara dang, ara ithai hetehu asang hune afuhon, otihatha hijan aindek inyong, dipogo hoyihethik. ³⁰ Diri, anyahi nang dothai, awang de oper lya holing adi, lwai asang hune fodok afuhon. ³¹ Ofwoi de ahap karik ahide adi, ti, aangi de ocamitha hundang ofwo adi kwong. ³² Ti, operok dia omiru hule, aang othulo lotek, juk anjelohio hothohide, dia Olonyi, arahari Omonye. ³³ Otihatha tuhudik! Omijyethek, anyo aang ithai itek orii le. ³⁴ Ojahitha othulo lolo d’amaji nabo – idyaharu ahang nayong, esarak ohoigyemak honyong thoindefaithe, ngai h’egyema nanyong, anyahi ohoigyemani loindafaitho oyihet thomijye tuhudik. ³⁵ Ahana na, orathik, anyo, aang ithai itek kanu oindu lomonye h’ahang; thathari, dihiji oharie, disiret h’ohohorong dia thamoithe berien. ³⁶ Ara oindu nyurubut, hoisarahina thorimak ithai d’ajoo. ³⁷ Arami hajyo nang dothai hune, ajyo nang d’ohothing bukulung. Iririyethek!''