¹ Afithoro nya operok arehai dihithemi ofaning lodwa lonya ongerunerek Ojudei tho Egypto karik Amuno n’ofaning l’anyari naang otufo. Orimak nya ahibu ho fadiri hohittwak karik ohoigerok iduhumya arimahina oyihoi loindefunerek karik attohori Yesu ihoholai. ² Aca ithabuho nya isong ajaran, “Ikara th’ofaning thamuno, tek elulungir h’ohothing adothoi dingalafa.” ³ Yesu di Bethany dihang ho Simone l’atalulu, dinyari, aindu athulo naboling donyong, iyanu h’elethang nangwo kudarr dihulo nako enyanga nanyong. Abut inyong na ehulo, abuhok elethang dihu honyong. ⁴ Ti, owoni nya ohothing homok diya hengere bebe. Acama isong hamaring ajyori, “Aisong arami hetharohojerek elethang ne ahani? ⁵ Irahi ithanyangahina tha denario hakalu esihe aunihoi, esarahini d’ohoicanak.” Arai song eringyo athulo ne. ⁶ Ti, Yesu ajyo, “Idehina inyong na hamaring. Anyo ithathacianio ithai inyong? Athuk ehandyo aning nalibo donang. ⁷ Iwon ithai juui h’ohoicanak; ara iwak ithai, ocohi dothai dihandyo ara nayyu dosong, ti, aang ithai de iwon honang juui. ⁸ Athuk inyong na ehandyo aning nacohi inyong ehandyo. Athuk eyelyo ahwan hindang dinuhahinerek ⁹ Diri anyahi nang dothai, ara evanjelio nafuni inyahina dihap, ofuni de icama aning nathuk athulo ne ehandyo, diyuhinerek inyong na.” ¹⁰ Thiya, Juda Eskariote, aboithe tho tomon larehai, alo do fadirihio hohittwak, dithafothok inyong inyong dosong. ¹¹ Ethaninguna na fadiri arami hune, amunoi bebe, eruhohini esarahina inyong enyahwo. Inyong hathi atahitha oyihoi lethafothohinerek inyong inyong dosong. ¹² D’ofaning ohoithemoni l’Anyari Naang Otufo, athuhon nasong amudyo oker l’ofaning lohittok l’Ojudei, ajyori ohothifok honyong, “Dingai iwak iye ofwoi ihuhumyo amaji nefwo inyerek anyari n’ofaning lohittok l’Ojudei?” ¹³ Asulak inyong lo arehai h’ohothifok honyong, ajyo dosong, “Ifwatha ditha h’abore, irwangarik ithai de othulo loindafaitho oibithi l’ahari. Othifothik inyong. ¹⁴ Amaji najingahinerek inyong dihang, othifothik inyong, ara ithai ijyo do lomonye ahang, “Najang athwa hindang n’othohomononi, nanderek nang inyerek anyari d’ofaning loittok l’amuno l’Ojudei h’ohothifok hundang?” ¹⁵ Ithaithak ithai de athwa nalat nathuk ehuhuma dihide. Ihuhumahina dohothai amaji diya. ¹⁶ Ohothifok afwoi dibore. Arimak isong asang fodok iring nathuk inyong anyahinerek isong, ara isong ehuhumyo dosong anyari n’ofaning lohittok le diya. ¹⁷ Nya thathari, aindu h’ohothifahak honyong tomon lareha. ¹⁸ Diyokongi nya hosong dinyari, Yesu ajyo dosong, “Diri ajyo nang dothai, aboithe lothai, lonyo honang, ithangathak nang de adi. ¹⁹ Adihari nya othaja hosong bebeb, ara isong abok abok ajori donyong, “Paat acut, ikara nang?” ²⁰ Yesu etharangyo ajyo dosong, “Inyong lo aboithe tho tomon larehai, lya, letuhi ahinang honang ditha hoibithi l’anyari lya. ²¹ Aca olo de Olonyi l’Othulo, iring nathuhi egerorik thonyong. Ti, ara afuro, d’othulo loindu de ithafothohina Olonyi l’Othulo adi le! Ira nya iyiji, ara kabong nya kodien oyisuni inyong.” ²² Dihide nya hanyari nasong, eduhu Yesu elolonge n’anyari, amijyo dihide, aboroyo, apinyo, ethafothok inyong dosong karik ajyo, “Iyatttik na, ahwan hindang ne.” ²³ Eduhu oihutye, afurak ahinywarang, esarak inyong dosong, ara isong bukulung amatha thothonyong. ²⁴ Ara inyong ajyo dosong, “Ahotho hindang na, nemora angejuk, ahotho nabuhohini th’ohothing olwarai. ²⁵ Diri ajyo nang dothai, aang nang de amatha ikoti n’ahayocong na, tok d’ofaning le, ara nang lamatha angejuk dith’Ohobye l’Ojok.” ²⁶ Athuhon nasong edolo oyele, afwoi d’adonge n’Olives, ²⁷ Yesu ajyo dosong, “Ipwaharu ithai de fodok adi; aca igero, ‘Abak nang de ohoyohoni, ara akero athurohunu.’ ²⁸ Ti, diholu h’ethadothuna nang dihide, alo nang de ahithemi nathai di Galilea.” ²⁹ Petro ajyo donyong, “Juk apwaharu isong fodok adi, awang nang.” ³⁰ Yesu ajyo donyong, “Diri ajyo nang dohoi, ahanana – aa, oharie l’ahanana lya, dihithem h’esir n’ohohrong operok arehai, irisa iye nang de operok aunihoi.” ³¹ Ti, Petro enginyo, ajyo, “Ara awon ara aye hohoi, awang nang iye arisa.” Isong fodok eruhohini ahani donyong. ³² Isong afuni d’amaji nelongoi ara Gethsemane; ara Yesu ajyo d’ohothifok honyong, “Owoniera dini, ahibu nang amojyo.” ³³ Inyong eyaru Petro, Yakobo karik Yoanne honyong, aculuyo ejyoria bebe. ³⁴ Inyong anyahi isong, “Odiha othaji hindang bebe tok diye. Opwahatha dini, karik omijyethek tuhudik.” ³⁵ Aden nanyong tiibai ahani, Yesu apwaharu dihap; Inyong amojyo hijan ara dwo kodien ocahi, irahi omiru hulya ifwan adi thonyong. ³⁶ Inyong ajyo, “Abba, Monye, dohoi, ocohini asang bukulung awonan.” Iyaru oihutye lya adi thonang. Ti, ikara awahan hindang, ti, nahoi.” ³⁷ Inyong anyahu, orimak isong hojoothoi, inyong ajyo do Petro, “Simone, iye lohoijootho? Awang ocohi dohoi eririhina nang juk orii aboithe? ³⁸ Omijye tuhudik karik ara iye imojyo, daang iye ijingak ditha esusuitha. Owak kodien ohoile, ti, ilik ahwan. ³⁹ Koti alo dimojyo th’ocamitha thohodwo omojyorik inyong thohulo. ⁴⁰ Anyahuna nanyong dosong, oindu irimahina hoferori, ara houk ahonde. Awang isong hulo otehi, ainyong ojyo isong donyong. ⁴¹ Inyong aindu dosong operohothi oithaunihoi, ajyo dosong, “Ithai hohoijootho karik ithai hohoiyiri? Acohi! Edwongi omiru. Omijyethe! Athuhi ethafothohina Olonyi l’Othulo dihas h’ohoiyak. ⁴² Odothothik. Hafatha. Anyiha othulo loithafothok nang adi lo.” ⁴³ Hocama Yesu ahani, edwong Juda, aboithe tho tomon larehai, Oindu helulung ohothing nabolo h’odemio karik otheleho, tha fadiri hohittwak, ohoigerok karik ohobolok. ⁴⁴ Thene, onde lethafothok inyong adi lo, aithak, ajyo, “Aboithe lamandayo nang lya, inyong othulo. Indefuna inyong ara ithai ikiyaru inyong adi.” ⁴⁵ Edwong no Juda, aindu do Yesu, ajyo, “Ohoityenani,” emandayo inyong. ⁴⁶ Thiya, abahye karik endefuni inyong. ⁴⁷ Ti, aboithe losong lowetha indehai, ahethu ademi, esalu ehiok n’ohoigyemani lo fadiri lohittok. ⁴⁸ Yesu ajyo dosong, “Ifunu ithai iring hofuni d’ohoholani th’odemio karik otheleho dindafaitho nang? ⁴⁹ Omiru hawonderek nang nya juui hothai karik nang etyenio di Templo, kabong ithai nang hoindafaitho. Ti, owon inya ahani dofuni arami hotho maninihio ifuhon.” ⁵⁰ Ohothing honya owoni ho Yesu bukulung, edyaharai inyong. angerori adi. ⁵¹ Owon nya diya othulo ottwathi lothifoitho Yesu; iyofo abongo narere hamaring dimuhohinerek ahwan nanyong. Endafaitho nya n’ohothing Yesu, edyaharu abongo, angero iluluyai. ⁵² Ethaitharai Yesu do fadiri lohittok. ⁵³ Osuduhai nya honyong, ofadirihio fodok hohittwak, ohobolok karik ohoigerok. ⁵⁴ Thene, Petro athiforo inyong; odaha ti, olamarai, lwai dipar ho fadiri lohittok. Inyong awoni dihiji h’ohoigyemak, asuja ahimang. ⁵⁵ Thene, ottahithi nya ho fadiri hohittwak karik elulung nahittok n’Ojudei aning nepal nehandyo Yesu, dottohorik inyong. Ti, kabong horimahini naboling. ⁵⁶ Aca ohothing holwa emangahini hijan epal Yesu, ti, emangio nasong aang hoiruhohunu. ⁵⁷ Ara homok adotho, emangahini hijan epal Yesu, ajyori, ⁵⁸ “Ethaningu ohoi inyong ajaran, ‘Etharohojo nang de a templo naduhoi th’ahas ne adi, ⁵⁹ Diholu h’operok aunihoi, aduhu nang de naboling naang ahas thiya.’” ⁶⁰ Fadiri lohittok adotho dihiji hosong, efiyo Yesu, “Aang etharangio nahoi?” Ainyong ojyori ohothing hulya nepal icama iye?” ⁶¹ Ti, inyong adularu, aang ocama. Koti, fadiri lohittok efiyo inyong, ajyo, “Iye Kristo, Loboithe Laborwa lo?” ⁶² Yesu ajyo,”Nang inyong; itehu ithai de Olonyi l’Othulo ara lawoni dinget h’akolon, aindu ditha h’adikolo hothohide.” ⁶³ Ara fadiri lohittok aricyo abongoitho hanyong, ajyo, “Hoiwak ohothai ohothing homok hotihak?” ⁶⁴ Ethuk ithai ethaninguna omorit l’asang hadwa. Ainyong iwak ithai ihandye? Edari isong fodok inyon, awahi hijan inyong thottohori. ⁶⁵ Aculuyo homok amicyo ahamilak donyong, emuhohini ahomong nanyong, anduhye inyong, ajyori donyong, “Ecorit!” Ohogyemak hohong h’ohoremok eyarai, afwoi ibahyo inyong. ⁶⁶ Orii ho Petro difwatha h’oyalu nothohop, aboithe n’aduring h’egyema do fadiri lohittok aindu donyong. ⁶⁷ Inyong na atehu Petro osuja ahimang. Amijyo donyong na iindehai, ajyo, “Iwon iye nya do ho Nazarene, Yesu,” ⁶⁸ Ti, eda arami hune, ajyo, “Aang nang atek dia aang nang atek tuhudik aisong arami icama iye. Thiya, aindu dindak, d’oyihet lohittok. Ara ohohorong esir. ⁶⁹ Ti, inyong eda arami hune ikoti. Ti, aitho ehegyemani ne atehu inyong, ajyo ikoti d’ohothing honya owetha diya iindehai, Othulo lya, lobo thosong. ⁷⁰ Ti, inyong arisa ikoti. Omiru tiibai ahani, ohothing honya awetha dini hulo, ajyori do Petro, “Aang opwak, iye aboithe losong. aca iye othulo lo Galilea.” ⁷¹ Ti, aculuyo esarak ahwan nanyong ditha epithathik karik dipitha. “Aang nang atek loni othulo lecamai iye thonyong lya. ⁷² Ohohorong esir operohothi oitharehe. Thiya Petro eyuu ocamitha hathuk Yesu anyahina donyong: “Dihithemi h’esir n’ohohorong operok arehai, irisa iye nang de operok aunihoi.” Ara inyong apwaharu dihap, abuhyo ehiyo.