¹ Nya th’amoithe berien, efefenai amaji aboithe ho fadiri hohittwak, ohobolok, ohoigerok karik elulung nahittok n’Ojudei. Thiya, athoryo isong Yesu, eyarai adi; afwoi ithafothohini inyong do Ponsio Pilato. ² Pilato efiyo inyong lo, “Iye Ohobu l’Ojudei?” Inyong lo etharangyo inyong, “Iye ijyo ahani.” ³ Ara ho fadiri hohittwaak elalodohyo inyong th’asang olwarai. ⁴ Pilato efiyo inyong, “Aang iye itharangyo? Idoro, baya asang helalodohok isong dohoi!” ⁵ Ti, kaang Yesu oindu itharangyo inyong; kombwo, ethafalangyo inyong. ⁶ Thene, d’omiru hule, d’ofaning l’amuno, ohohinda nya Pilato d’ohothing othulo lefitha aboithe lefiyu isong. ⁷ Owon nya othulo lefitha h’oimingejak ohottohok loilongoi ara Barabbas d’orii h’ edara athifoitho n’oyalu. ⁸ Elulung n’ohothing aindu do Pilato, aculuye efiyo inyong thoihandye iring nehandyecerek inyong. ⁹ Pilato etharangyo isong ajyo, “Iwak ithai ahohi nang ithai Ohobu l’Ojudei?” ¹⁰ Otek nya Pilato hijan ahaini isarak ho fadiri hohittwak ethafothohina Yesu donyong. ¹¹ Ti, ho fadiri hohittwak esusuhini elulung n’ohothing thoiikoro bebe hijaran Barabbas thohohini kombwo. ¹² Pilato etharang isong ikoti ajyo, “Ainyong iwak ithai ehandyo nang d’Ohobu l’Ojudei?” ¹³ Isong ekor bebe, “ Obehok inyong di kruce.” ¹⁴ Pilato ajyo dosong, “Ainyong namonyong ehandyo inyong?” Ti, isong ekor bebe, tholohide h’ekor, “Obehok inyong di kruce.” ¹⁵ Difong elulung n’Ojudei, Pilato ahohi Barabbas. Ethafodohyo Yesu, ethafothok inyong dosong dibehohina di kruce. ¹⁶ Ohoremok eyaru Yesu difwata h’oyalu (Amaji Nahittok n’Endafaitho Ahap), isong elongu asuduhe n’ohoremok nahittok amaji aboithe. ¹⁷ Ara isong ethayofok Yesu abongo anaporong, ehuhumye ehithang n’oyihwa abehohini dihu honyong. ¹⁸ Isong aculuyo emandayo inyong and ajyori, “Koruk kaa, Ohobu l’Ojudei!” ¹⁹ Ethabuho nya isong abahyo ahu nanyong th’amukok thon’othelek karik amicyo ahamilak donyong. Arigongoi karik adulai isong hulo dihithemi honyong. ²⁰ Athuhon nasong ethalubangyo inyong, ahouni adi thonyong abongo anaporong na, ethayofohini inyong abongo nanyong, eyarai inyong dibehohina di kruce. ²¹ Owon nya othulo lobo, Simone lo Cyrene, loindu tho miji, (Lomonye ho Alexander karik Rufus); eringahini inyong th’odohoro akruce. ²² Ohoremok eyanu Yesu, lwai d’amaji nelongoi ara Golgotha (Neloicye ara “Amaji n’Ahu”). ²³ Isong esarak donyong obalu loiharwo h’angenge n’ohiyani nangwuo kudarr, ti kabong homatha. ²⁴ Abehohini di kruce, ebwaye abongoitho hanyong th’arwasyo otenge dinyahina nani abongo olo ohoremoni dia loni iyaru. ²⁵ Orii oihaunihoi obehok isong inyong di kruce. ²⁶ Dihide ethaithit, isong negero a pal, “Ohobu l’Ojudei.” ²⁷ Honyong, isong abehok ohoholak areha, aboithe dinget honyong, aboithe dihothong. ²⁸ Amaninihio angoro hayyu ho Marko 15:28:Aindu amanini iwonan najyo, “Eherahini inyong h’ohothing haang obis,’ ²⁹ Ohothing hodaha thole, amorye inyong, eniningye ahosi hasong, ajyori, “Oco, aca ijyo iye itharohojo iye de ara iye iduhon a Templo ditha operok aunihoi, ³⁰ olwaha ahwan, icuru dihap tho kruce.” ³¹ Ahani dang, ethalubangyo inyong ho fadiri hohittwak, isong h’ohoigerok, ajyori, “Olwahyo homok, ti, aang ithalwahu ahwan nanyong. ³² Kristo, Ohobu lo Israele, icuru dihap tho kruce, ditehu ohoi ara ohoi iruk.” Ara ohothing hobehohini honyong hulo emomoryo inyong dang. ³³ Oriihio inde, ajyo ahap fodok risik tok d’orii oithasahale. D’orii oithahale, ekor Yesu, omurut dihide, “Eloi, Eloi, lama sabachthani?” ³⁴ Nawetha dimaji hajaran, “Ojok hindang, Ojok hindang, anyo irwasaru iye nang?” ³⁵ Ohothing howetha diya koko, ethaninguna arami hune, ajyori, “Idorotho, inyong lo lelongo Elijah.” ³⁶ Othulo aboithe lobo, angero,anywahu obalu lerwarwathanga, ahisak dibahandi, esarak inyong thomathai. Othulo lya ajyo, “Hedoryethek ara oindu Elijah idohuna dihap.” ³⁷ Thiya, Yesu ekor omurut dihide, aye. ³⁸ Ara emuhet na Templo aritha thoihiji, thohide lwai dihap. ³⁹ Atehuna na lahong l’ohoikyak, lowetha dihomong ho Yesu, hijan athuk inyong aye th’oyihoi tholya, ajyo inyong, “Diri othulo lya nya Olonyi l”Ojok.” ⁴⁰ Owoni nya dang angorwo hengengelyo olamarai. Owoni nya dihiji hosong, Maria magdalina, Maria (nahathingi ho Yakobo attwatti karik Joses) karik Salome. ⁴¹ Omiru inyong di Galilea, athifoithe karik egyemai donyong. Maria karik angorwo hamok nya dang afuni honyong di Yerusalem. ⁴² Athuhon nya athari ainduna, anyo, ofaning nya le loihuhumarik, ofaning lothohithemi h’ofaning Oithacofe, ⁴³ aindu Yoesfo lo Arimathea diya. Inyong lo nya othulo lobangi. Owon nya ara l’asuduhe n’ohothing hoithilayo ohobye l’Ojok. Ethakolyo inyong lo ahu, alo do Pilato difiyo ahwan no Yesu. ⁴⁴ Afalanga Pilato hijan athuk Yesu aye; elongo inyong lahong l’ohoremok hoikeyo ohothing hoifitha; efiyo, ara aye Yesu. ⁴⁵ Ethaninguna no Pilato th’ohoremok h’ohoikeyak h’ohoifithak, esarak ahwan no Yesu do Yosefo. Athuk Yosefo enyanguna abongo narere nemuhyerek ohoyak. ⁴⁶ Ethacuru inyong dihap tho kruce, emuhok th’abongo, ethaferik inyong dihilame, nanya obohohini ditha h’amorwong. Thiya, ara inyong eyafulangak amorwong dihuthuk h’ahilame. ⁴⁷ Maria Madalina karik Maria nahathingi ho Joses atehuni amaji namuhahinerek Yesu.