¹ Engohunu nya n’Ofaning Oithacofe, enyanguni Maria Madalina, Maria nahathingi ho Yakobo, karik Salome elethang nafuni isong eyelyerek ahwan no Yesu. ² Nya th’amoithe berien n’ofaning ohoithemoni l’esabit, afwoi dihilame ahibu oholong athuk ettoruna. ³ Acamai isong huna dihiji hosong, ajyori, “Ngai de olo iyafulanguna omorwong adi thohuthuk h’ahilame?” ⁴ Amijyo nasong adihide, atehuni omorwong athuhi eyafulanguna adi; obolo nya omorwong le bebe. ⁵ Isong ajingari dihilame, atehuni ottwathi loiyofo abongo abong, owoni d’oyirik l’enget; abangi isong huna. ⁶ Inyong lo ajyo dosong, “Hoibangatha. Ithai hethifeyo Yesu lo Nazarete, lonya obehohini di kruce lo. Ebuhu! Awang thene. Ottihatha amaji nethaferihinerek isong inyong. ⁷ Ti, ifwatha onyahina ohothifok honyong karik Petro, “Inyong lalo ahithemi nathai di Galilea. Itehu ithai de inyong diya, iring nanya arhuk inyong anyahinerek ithai. ⁹ [Nya th’amoithe berien d’ofaning ohoithemoni l’esabit, diholu h’ebuhuna nanyong, ecak inyong aleyori do Maria Madalina, nanya ongararik inyong ohoilehio cofa homonyong adi thonyong na. ¹⁰ Alo inyong na alo inyahina ohothing honya owoni honyong hulo ahibu isong ikori karik ethangerye ehiyo. ¹¹ Ethaningu isong hijan omijyo inyong karik atehu inyong na inyong, ti, kabong iruhi. ¹² Diholu h’asang hune, aleyo inyong thoyaitha hamaring d’arehai hosong, di daha hosong dith’amiji. ¹³ Isong anyaha, afwoi inyahina homok, ti, kabong iruhi dosong. ¹⁴ Nya diholu, Yesu aleyo d’ohothifok honyong ahibu isong dinyari; ara inyong eringyo isong, thaangan than’eruhon nasong karik akolon n’othaji, anyo, kabong hoiruhi d’ohothing holeyo inyong dosong diholu h’ebuhuna nanyong th’ohoyak. ¹⁵ Ara inyong ajyo dosong, “Ifwatha dihap fodok dityenio evanjelio d’ayeuna bukulung. ¹⁶ Loiruk abuhohini batisimo, ithalwahunu de; ara laang hoiruk,idari de dang inyong. ¹⁷ Ofwoi de ethaithitha hune h’ohothing hoiruk: th’ofure tholo hindang, ongaterek de isong ohoilehio omonyorok adi. Ocama de isong th’ahuthuhye angejuho. ¹⁸ Ohuro de isong amunuok th’ahas thahasong, karik juk amathai ehweri nethayeyo, aang de iryafu isong. Ithaye de ahas dihide h’ohodihak, ayiji.” ¹⁹ Athuhon n’Ohobu Yesu acama dosong, eyarai inyong dihide, awoni dinget h’Ojok. ²⁰ Ohothifok afwoi inyahina evanjelio dihap bukulung, ahibu Ohobu igyema hosong, ethakolyo ocame losong, thethaithitha thahafwo honyong.