¹ D’operok hule, owon nya ikoti elulung n’ohothing nahittok; aang howoni h’aning nabo dinyo. Yesu elongo ohothifok, ajyo dosong, ² “Amiehunu nang elulung n’ohothing, anyo, esukai honang operok aunihoi, aang aning nanyo isong. ³ Ara asulak nang isong dimiji kwong anyo, ofwoi de ipwaharu diyihoi. Ofuni homok hosong th’amaji nalama.” ⁴ Ohothifok honyong etharangyo inyong, “Dingai de irimak ohoi anyari d’amaji nalama ahani nefong ohothing hulya?” ⁵ Inyong efiyo isong, “Baya owoni elolongitha h’angiryang?” ⁶ Isong ajyori “cofa.” Anyahi elulung thowoni dihap. Eduhu elolongitha h’anyari cofa. amijyo dihide, afurak ahinwarang, apinyo, esarak d’ohothifok honyong thebwabwahi dosong. ⁷ Owoni nya isong h’ohom hottik tiibai; athuhon nafurahina ahinwarang thosong, anyahi dang ohothifok thoibwabwahi isong. ⁸ Isong anyo, efongi; ehuhuruni apinyu, pinyu hafithoro, isong ethafuthahini akatino hahitwak cofa. ⁹ Owoni nya ohothing indehai esihe arangwan. Thiya, inyong asulak isong thoifwa. ¹⁰ Kwak ahani, inyong ecurok di roko h’ohothifok honyong, afwoi ditha h’ahap no Dalmanutha. ¹¹ Thiya Ofarisei afuni dindak dilafere honyong; othifeyo isong thonyong ethamijani thohide, dithemyo inyong. ¹² Inyong ayiritha bebe, ditha h’ohoile lonyong, ajyo, “Ainyong owak oper lya athifeyo d’ethamijani?” Diri, ajyo nang dothai, aang ethamijani de nesarahini d’oper lya.” ¹³ Thiya inyong edyaharu isong, ecurok di roko ikoti, alo d’oyirik lobo. ¹⁴ Thene, athuhi ohothifok honyong akworo eyaru anyari hosong. Aang isong owoni h’elolonge n’anyari nakalu aboithe dith’aroko. ¹⁵ Inyong ethathaithak isong, thajaran, “Omijyethek tuhudik, karik idaratha omundo h’Ofarisei karik h’Erode.” ¹⁶ Ithabuho ohothifok elafere dihiji hosong arami haangan n’anyari. ¹⁷ Atehan nanyong arami hune tuhudik, ifiyo inyong isong, “Ainyong ilafere ithai aangan n’anyari? Kabong ithai itehu dia itek tuhudik? Iwon ithai h’othaja hoko? ¹⁸ Iwon ithai h’ahonde, ithai aang hoitehu? Ithai iwon h’eyoha, ithai aang hoithairu? Aang ithai hoiyu? ¹⁹ Epipinyahina nya hindang elolongitha miyet h’anyari d’ohothing esihe miyet, baya akatino hefut th’epipinyitha h’anyari nafithoro irimak ithai? Isong ajyo donyong, “tomon larehai.” ²⁰ “Epipinyahina nya hindang elolongitha cofa h’anyari d’ohothing esihe arangwan, baya akatino hefut th’epipinyitha h’anyari nafithoro irimak ithai?” Isong ajyori donyong, “Cofa.” ²¹ Inyong ajyo, “Kabong ithai itek tuhudik?” ²² Isong ahuni di Bethsaida. Ohothing hothiya eyanai donyong othulo longodo; amojyo Yesu thothino inyong. ²³ Yesu endep ongodoni lya th’ahinang, eyaru inyong adi thath’amiji. Athuhon nanyong amithahina ahamilak di honde honyong, ethahi ahas hanyong dihide honyong, efiyo inyong, ajyo, “Itehu iye aning nabo?” ²⁴ Inyong amijyo adihide, ajyo, “Atehu nang ohothing hojak oyandik hodaha.” ²⁵ Thiya, inyong ikoti ethahi ahas hanyong dihide h’ahonde hanyong; ara ongodoni abucyo ahonde hanyong, ara atehuna nanyong anyahak dimaji, ara inyong atehu asang fodok ara halibo. ²⁶ Yesu asulak inyong di hang honyong, ajyo, “Hoijinga di miji.” ²⁷ Yesu alo dindak isong h’ohothifok honyong d’amisok Caesarea Philippi. Diyihoi, efiyo ohothifok honyong, “Ngai ojyori ohothing, nang?” ²⁸ Isong etharangyo inyong ajyori, “Yoanne Batista.” Homok ajyori, “Elija,’ ara homok ajyori, “Lobo l’ohocorok.” ²⁹ Inyong efiyo isong, “Ti, ngai ijyo ithai nang?” Petro ajyo donyong, “Iye Kristo.” ³⁰ Yesu anyahi isong thaang honyahi lobo othulo ngai inyong. ³¹ Inyong aculuyo etyenio isong hijan owak Olonyi l’Othulo thoithahtacianie d’asang olwarai, karik ohobolok, ofadirihio hohitwak karik ohoigerok oifuni de idara inyong; ofuni de itohoro inyong, ara inyong ebuhu diholu h’operok aunihoi. ³² Inyong anyahi arami hune oleyoroi. Thiya Petro eyaru inyong arakang, aculuyo eringyo inyong. ³³ Ti, Yesu eloithok inyong ahurong, amijyo d’ohothifok; thiya, eringyo Petro, ajyo, “Ilo thlohurong honang, Sitan! Iye laang hoihuhumak ahu nahoi d’arami h’Ojok, ti, d’asang h’ohothing.” ³⁴ Thiya, Yesu elongu ohothifok honyong karik elulung n’ohothing amaji aboithe, ajyo dosong, “Ara owak loboling athifoitho nang, doidara ahwan nanyong, thoithai akruce nanyong, athifunu nang. ³⁵ Aca, lowak athalwahuna esu nanyong, ithalithok de; ara lethalithok esu nanyong thonang karik th’evanjelio, ethalwahu de inyong. ³⁶ Ainyong ayiji orimak othulo diwonan h’ahap fodok, ti, ethalithok esu nanyong? ³⁷ Ainyong ocohi d’othulo ebobolohina h’esu nanyong? ³⁸ Lojwu ahu thonang karik thocamitha thohundang ditha oper l’eleru karik l’eyau lya, oindu de dang ahu n’Olonyi l’Othulo ijwuon, ara laindu ditha h’abolori n’Omonye lonyong h’anjelohio hodwa.