¹ Asuduha Ofarisei karik ohoigerok homok hofuni tho Yerusalem diker honyong. ² Atehuni isong homok th’ohothifok ho Yesu onyo anyari th’ahas thahaibot - kaang hofinia. ³ Aca d’Ofarisei karik Ojudei bulung, aang honye th’ahas, ara kabong hofinia tuhudik, anyo, oisukaitha nya hulya h’ohobolok hosong. ⁴ (Ara Ofarisei hafuni tho maji-enyang-karik ethanyangio, aang onye ara kabong hohuyoroi; indafaithe dodo asang olwarai hathuk isong efothuna, iring: elalayo n’oihutyena, amoco karik attitto bukulung hanyerek isong.) ⁵ Ofarisei karik ohoigerok efiyo Yesu, “Anyo aang ohothifok hohoi othifoitho oisukaitha h’ohobolok, ti, anye anyari th’ahas thahaibot?” ⁶ Ti, ara inyong ajyo dosong, “Ocorok Isaia tuhudik thothai, odwalak, iring negerorik inyong, ‘Ithahabuyo nang ohothing hulo th’obiyuha thohosong, ti, olama othaji losong thonang. ⁷ Ija ahani, omojyo isong donang, hibu isong ityenio efahitha h’ohothing ara etyenitha hasong.’ ⁸ Erwasak ithai efahitha h’Ojok, ara ithai indafaitho rot rot oisukaith h’ohothing.” ⁹ Inyong dang ajyo dosong, “Angai iyinik ithai edara efahitha h’Ojok, dinfaitherek ithai oisukaitha hothai? ¹⁰ Aca, ajyo Musa, ‘ithahabuye lemonye karik nehathingi,’ karik, ‘Locama imonyoroi thomonye karik thahthingi thananyong, aang opwak, ottohori.’ ¹¹ Ti, ijyo ithai, ‘Ara othulo ojyo d’omonye dia d’ahathingi, “Alwahio nefothu iye thonang, inyong Korban (Corban).’” (‘Esorio’), ¹² thiya ithai aang hoihorik inyong thoihandye aning nabo d’omonye karik d’ahathingi. ¹³ Ethuk ithai elulucyo ocame l’Ojok thoisukaitha thohoifuthu ithai, ara ithai ithafothok d’oper lotho holu. Karik asang alwarai hehelaru hehandyo ithai.” ¹⁴ Elongo inyong lo ikoti elulung, ajyo dosong, “Ithaningyethek nang, ara ithei itek nang tuhudik. ¹⁵ Awang aning nabo nothondak h’othulo nethabocyo inyong, ara ojingak ditha honyong. Aning naindu thothwa h’othulo, inyong ithabocyo inyong.” ¹⁶ Tha hamok amaninihio angoro aang ocamitha: Ti, kwak} ¹⁷ Thiya, edehina no Yesu elulung n’ohothing, ajinga di hang, efiyo inyong ohothifok honyong arami h’aryamara. ¹⁸ Yesu ajyo, “Hoirasa ithai esuka kwong atehan tuhudik? Aang ithai itek hijan ara ojinga aning nabo ditha h’othulo thondak aang ithabocyo inyong, ¹⁹ anyo, aang olo dithaji honyong, ti, olo di hohye honyong; thiya alo dingwai?” Th’ocame tholya, anyahi Yesu hijan anyatha bukulung, olibori. ²⁰ Inyong ajyo, “Aning naindu thoth’othulo, inyong ithabocyo inyong. ²¹ Aca tholothwa h’othulo, tholondak h’othaji, ofuni egigilitha hamonyong, eleru, ahoholio, attohio, ²² aferorik afure no loboling, awahan asang h’ohothing dia h’ahathing hamok, awahan netharohojo, ethadwalio, amuno n’asang hawak ahwan, ahaini, amorio, etharohojo n’ofure, ethadara karik ananga dia adudufo. ²³ Asang fodok hamonyori hune ofuni thothwa; isong ithabocyo othulo.” ²⁴ Yesu adotho adi thiya, alo dihap ho Tyre karik Sidone. Thiya alo di hang. Aang howak othulo loboling thoteha hijan inyong lodingai, ti, aang nya ocohi donyong edimunu. ²⁵ Ti, kwak ahani, athulo, nawon angering nanyong natti h’ohoile lomonyong, ethairu, aindu, apwaharu dihejek honyong. ²⁶ Athulo ne nya, n’Agriki, n’amukok no Syrophoenicia. Amojyo donyong, thongaterek ohoile lomonyong adi th’angaring nanyong. ²⁷ Yesu ajyo donyong na, “Okalifinok thoithanye ahithemi. Aca, aang ocohi diduhuna anyari n’okalifinok abirohini d’ongohe.” ²⁸ Ti, inyong na, etharangyo, ajyo, “Aa, Hobu, aca juk ongohe, onye tholohop h’ ethawejit n’anyerek, anyari dedodoitha th’okalifinok.” ²⁹ Yesu ajyo donyong na, “Th’arami thah’ecama iye, ahohini iye, ilo. Athuk ohoile lomonyong anden adi th’enengaring.” ³⁰ Alo inyong na. alo irimahina angering oferi dijoothik, ahibu ohoile lomonyong athuk anden adi. ³¹ Thiya, inyong lo koti alo adi th’ahap no Tyre, alo tholo Sidone d’ahari nahittok no Galilea lwai ditha h’ahap no Dekapolis. ³² Isong eyau donyong othulo lothuho, loko acama donyong, Efiye inyong thoithahi dihide honyong ahinang nayong. ³³ Thiya eyaru inyong adi th’elulung; esarak ohifala honyong ditha h’eyoha hanyong, amithu ahamilak, athin ongadiep ³⁴ lonyong, ajyo donyong, “Ephphatha,” najyo, “Onga!” ³⁵ Eyoha hanyong anga, afothoho h’ongadiep lonyong alahai, aculuyo acama iliboroi. ³⁶ Ti, Yesu anyahi isong thaang honyahi d’othulo loboling. Ti, dihide hedara nanyong arami hune thonyahini, anyahini hathi okalak. ³⁷ Afalanga isong bebe, ajyori, “Athuk ehandyo asang bukulung ara nayyu. Esarak othuhok thoithairye, ara haang ocohi acama, thocamai.”