¹ Edyaharu amaji nya, alo d’abore n’ahang nanyong; ohothifok honyong athiforo inyong. ² Ainduna n’Ofaning Oithacofe, etyenio di Synagogue. Ethaningyo inyong ohothing holwa, elilihai. Isong ajyori, “Thongai aorimak inyong oityenitha hulya? Honi olofioro hoisarahini donyong hulya?” “Aisong hafalangai hehandyo inyong th’ahinang thananyong hune?” ³ Aang hara olonyi l’ohoigyemani l’ahyek lo lya? Lolonyi ho Maria, lolai ho Yakobo, Jose, Juda karik Simone?” Ethamoryo isong Yesu. ⁴ Thiya Yesu ajyo dosong, “Aang ohocoroni laang howon h’ethahuyo, arahari dibore karik dihang honyong, dihiji h’ahathing hanyong, karik dithatha h’ahang nanyong holefeng.” ⁵ Aang ocohi donyong dihandyo egyema naboling nako, arahari ethahina nanyong ahas hanyong dihide h’ohothing tiibai hodiha, ethayijyo isong. ⁶ Afalanga inyong aangan nasong eruhon. Thiya alo ityetyenaru d’amisok haindek. ⁷ Thiya, inyong elongo ohoifahak tomon larehai hulo, arek, arek, esarak isong akolon n’endafaitho dihide h’ohoilehio hoibot. ⁸ karik emimingat isong thaang hoiyaru aning nabo d’adaha nasong, arahari ohoigyemani – ikara anyari, olohobon, dia enyahwa ditha h’erohitha hasong – ⁹ ti, thoifoi ahamuha, thaang hoiyofoi abongo nahittok nalibo bebe. ¹⁰ Ajyo dosong, “Ahang nejingarik ithai, isukathik diya, lwai ithai edehina. ¹¹ Ara aang abore nabo ifothu ithai karik dia aang ithaningyo dothai, ara ithai hedehi amaji naya, ithuthuina aturr tho hejek hothai adi, ara nanyahi dosong hijan arami hune diri. ¹² Afwoi dinyahina ohothing dindak thoburunu. ¹³ Angaterek isong ohoilehio homonyong adi, eyelahini ohothing olwarai hodiha elethang karik ethayijye isong. ¹⁴ Erode ethaningu arami hune, aca athuk ofure lo Yesu ahujon. ajyori nya homok, “Athuhi ethadothuna Yoanne Batista thoye, inyong negyema asang hafalangai hune dtha honyong.” ¹⁵ Homok ajyori, “Inyong Elijah.” Homok ikoti ajyori, “Inyong ohocoroni, iring lobo th’ohocorok ho berien.” ¹⁶ Ti, ethaninguna n’Erode arami hune, ajyo, “Athuhi ethadothuna thoye Yoanne, lonya athuk nang abonguna ahu adi lo.” ¹⁷ Aca efahak Erode Yoanne thoifithahini, th’arami thahamuthayerek erode Erodias, (afure no Fillippo, olai). ¹⁸ Aca anyahi Yoanne Erode, “Aang obis dohoi dimuthayo nafure holoilai.” ¹⁹ Ti, eringak Erodias ahwan th’engere, awak attohoro Yoanne, ti, aang orimak ayihoi, ²⁰ anyo, obang Erode Yoanne; otek hijaran inyong lo othulo lobis karin lodwa; esarak inyong thoisukai ara nayyu. Ethaningyo inyong, ethalicye ahu nanyong. ²¹ Thiya, afuni omiru hoyyu d’amuno n’ofaning loisunerek Erode; Ehuhumyo anyanri olwarai, elongo ohoigyemak, ohithwaha h’ohoremok karik hobolok ho Galilea. ²² Nangaring h’Erodias thahwan aindu, abala dosong; Ethamunoyo inyong na Erode karik ohothing hoilongo inyong bebe bebe. Ohobu ajyo donyong, “Ifiye nang aning newak iye; esarak nang de dohoi.” ²³ Erode epitha d’aitho na, ajyo, “Aning nefiyo iye nang, esarak nang de dohoi juk neyaru ohobye hindang adi thoihiji.” ²⁴ Alo adi, alo ijaran d’ahathingi, “Ainyong owak, efiyo nang donyong?” Ahathingi ajyo, “Ohu no Yoanne Batista.” ²⁵ Angaring na anyaha kwak d’ohobu, efiyo inyong ajyo, “Awak nang isarak iye nang thenene ahu no Yoanne Batista dith’attittoni na.” ²⁶ Juk arami hune odiha bebe d’ohobu, aang hocohi donyong didara aning nefiyo inyong ne. th’arami thah’epitha karik th’othohomonok thohonya ilongoi dinyari hulo. ²⁷ Ahani ne, ohobu asulak ohoremoni th’ohoikiyak honyong, anyahi inyong thoilo iyanu ahu no Yoanne. Ohoikiyani alo ibongunu ahu no Yoanne thomaji h’efitha. ²⁸ Eyanu ahu nanyong dittittoni, esarak d’aitho; ara aitho eyaru, alo isarahina d’ahathingi. ²⁹ Ethaninguna n’ohothifok ho Yoanne arami hune, Afuni iyaru ahwan nanyong, afwoi isarahina di hilame. ³⁰ Ohoifahak afuni ara aboithe ho Yesu, anyahini inyong asang fodok hathuk isong ehandyo karik etyenio. ³¹ Thiya, inyong ajyo dosong, “Ifuna adi, ithai th’ahwandek d’amaji nedyaharai, diyiri tiibai.” ³² Aca, ofuni karik afwoi ohothing olwarai, aang owoni h’omiru honyerek. Isong afwo adi th’ahwandek di roko d’amaji nathuhi edyaharu. ³³ Ti, atehu isong, isong ofwoi adi, otehi isong ohothing holwa; ongerori diya amaji aboithe th’ahejeha thobottok, edwongi diya dihithemi hosong. ³⁴ Afuna nasong difohor, atehu inyong elulung nahittok, ara inyong amiehunu isong, anyo, ajahithi akero kwong ohoyhoni. Ahani ne, aculuyo inyong etyenio isong asang olwarai. ³⁵ Nya th’athari, ohothifok honyong afuni donyong, ajyori, “Amaji ne nathuhi edyaharu, karik dang eriok aharie. ³⁶ Othurok isong isong thoifwa dith’amiji karik d’amisok haindek, dofwoi inyanga amonye aning nanyo isong.” ³⁷ Ti, inyong etharangyo, ajyo dosong, “Isarahina isong aning nabo dinyo.” Isong ajyori donyong, “Ocohi dohoi difwan inyangahina isong anyari n’adenario esihe arehai, esarahini isong thonye?” ³⁸ Inyong ajyo dosong, “Iwon ithai h’elolongitha h’anyari baya? Ifwatha otihatha.” Arimahina nasong, ajyori, “Elolongitha h’anyari miyet karik ohom arehai.” ³⁹ Inyong anyahi ohothing bukulung thowoni dihap dihide h’amiyang nail thelulungir. ⁴⁰ Isong awoniari di hap thelulungir thah’esihe aboithe karik athomonehio miyet. ⁴¹ Inyong eduhu elolongitha h’anyari miyet karik ohom arehai, amijyo dihide, aboroyo, apinyong elolongitha, esarak d’ohothifok thohorye d’ohothing. Inyong dang, ebwayo ohom arehai hulo dosong bukulung. ⁴² Anyo isong, efongi. ⁴³ Esusuduhye apinyupinyu h’anyari, ethafuthahini akatino tomon larehai, h’ohom diya. ⁴⁴ Arahi nya ohothing honyo alif miyet. ⁴⁵ Esarak kwak ohothifok honyong thoifwa ahithemi d’oyirik lobo, di Bethsaida, ahibu inyong osulak ohothing thoifwa adi. ⁴⁶ Diholu h’asara nanyong dosong, inyong lo adok di donge di mojyo. ⁴⁷ Edwong Athari, arimak aroko di hiji h’ahari nahittok, ahibu inyong hamaring dindak. ⁴⁸ Atehu inyong isong ithathalihini ekukuryo n’arok, aca, owam ahomwa bebe adosong. Dihiji h’oharie, aindu dosong, ahibu inyong odaha dihide h’ahari nahittok; owak anden tholosong. ⁴⁹ Ti, atehuna nasong inyong adaha dihide h’ahari nahittok, egigiloi ojyori ngona inyong ohoile; elululwoi, ⁵⁰ anyo, atehuni inyong, ara isong abangi. Inyong kwak acama, ajyo dosong, “Ithakolyethek ahwandek! Nanga lya! Hoibangatha!” ⁵¹ Inyong ecurok di roko hosong; ara ahomwa awetha. Afalanga isong fodok fodok. ⁵² Aca aang isong otehi tuhudik ainyong ojyori elolongitha h’anyari hune. Kombwo, ako hathi othaja hosong ndor ndor. ⁵³ Athuhon nasong alangitha, edwongi di hap ho Gennasaret, ethawejihini aroko. ⁵⁴ Adohuna nasong adi tho roko, atehi ohothing inyong kwak, ⁵⁵ isong angerori athan’ahap nya; aculuye adohoitho th’epeditha ohothing hodiha, d’amaji nateharik isong hijan inyong lodiya. ⁵⁶ Ajingara nanyong dith’amisok, abottok dia amiji nahittok, elengunai donyong ohodihak di fwata. Omojyo isong, isong thothino eker n’abongo nanyong; ayiji ohothing holwari, ieing hathin eker n’abongo nanyong.