¹ Isong afuni d’oyirik lobo l’ahari nahittok, dihap ho Gerasene. ² Adohuna no Yesu thoroko, aindu othulo lowon h’ohoilehio homonyong tholame donyong. ³ Omanya othulo lya dilame. Awang othulo lepapahyo inyong; juk th’eririk aang othorunu. ⁴ Athorye nya inyong operok olwarai th’ebilat thah’ehenie karik h’eririk. Awur karik afut inyong nya asang hune bukulung. Awang othulo l’akolon locohi akoruna inyong. ⁵ Th’aharie karik th’afaning, dilame karik didongiok, ikor inyong lo bebe, angocyo ahwan nanyong th’omorik thohofi. ⁶ Atehuna nanyong Yesu olamarai ahanya, angero donyong, adumo ahu adihap dihithemi honyong. ⁷ Ekor inyong lo bebe omurut dihide, “Ainyong awak nang ehandyo hohoi, Yesu, Olonyi l’Ojok Lobolo Dihide Bebe? Amojyo nang iye th’Ojok olefeng, hoithathacianio nang.” ⁸ Aca ithabuho nya ajaran donyong, “Iwong adi thoth’othulo lya, iye ohoile loibot.” ⁹ Inyong efiyo inyong, “Ngai ofure lohoi?” Inyong etharangyo inyong, “Ofure hindang Elulung, aca ilwa ohoi.” ¹⁰ Amojyo inyong lo inyong, amojyo inyong ikoti, thaang hongararik isong adi th’ahap nya. ¹¹ Thene, owon nya elulung n’abathaha diya dinyari dihide h’odonge. ¹² isong amojyo inyong, ajyori, “Ongararik ohoi ditha h’abathaha; ohoi thojingai ditha hosong.” ¹³ Inyong ahorik isong; ohoilehio hoibot afuni adi, ajingahini ditha h’abathaha; ara abathaha angerori athan’acundong nadonge, dith’ahari nahittok; ara abathaha esihe arehai apwaharai Karin amathi ditha h’ahari nahittok. ¹⁴ Thiya, ohoyohok h’abathaha angerori adi, afwoi inyahina di bore ainyong ofuk dimiji; ohothing afuni didoryo aning nathuk afuhon. ¹⁵ Thiya ohothing afuni do Yesu, atehuni honyong othulo lonya endafa h’ohoilehio hoibot lo, iyofo karik awoni dinget honyong; abangi nya ohothing. ¹⁶ Ara ohothing hatehu aning nafuk d’othulo loindefa h’ohoilehio hoibot lo anyahi isong tuhudik aning nafuk; inyong dang anyahi isong arami h’abathaha. ¹⁷ Thiya isong hulo aculuyo amojyo inyong thoidehi ahap nasong. ¹⁸ Athuhon nya no Yesu ecurohina di roko, othulo lonya indefa h’ohoilehio hoibot lo amojyo inyong thomanyai honyong. ¹⁹ Kabong Yesu iruhok donyong, ti, ajyo donyong, “Ilo di hang hohoi karik d’ohothing hohoi; ilo inyahi isong aning nathuk Ohobu ehandyo dohoi karik ethaithak iye amiehina.” ²⁰ Ahani ne, alo inyong lo, aculuyo anyahina di Dekapolis asang hahitwwak hanya athuk donyong; afalanga ohothing bukulung. ²¹ Athuhon nya no Yesu alangitha d’oyirik lobo th’aroko, asuduha elulung nahittok diker honyong, anyo, oindek nya inyong d’ahari nahittok. ²² Thiya, lobo aboithe tho hahong h’Asinagogue, loilongoi ara Jairus lo, aindu; atehuna nanyong inyong, apwaharu di hejek honyong. ²³ Amojyo, amonjyo ikoti henyak hijan, “Aindek aitho hindang natti aye. Amojyo nang iye, iwong dithahina dihide honyong ahas hahoi, doyyu inyong nan karik amijyo.” ²⁴ Alo inyong lo honyong, ara elulung nahittok athiforo inyong, ara nekolok inyong dihiji bebe. ²⁵ Owon nyana athulo nawo ahotho nanyong oyingathik tomon larehai. ²⁶ Aleng ethathaciana th’oiboniok holwa karik aduma th’asang fodok hawon donyong; ti, dihide haduma ahani ne, dirahan ayiji kodien, amomonyorunu hathi. ²⁷ Ethaninguna nanyong assayo ho Yesu, aindu tholohurong honyong dith’elulung, athin abongo nanyong. ²⁸ Aca, inyong na ajyo, “Ara athin nang, juk abongo nanyong ti, ithayijye nang de.” ²⁹ Eithin nanyong inyong, awojon awetha; ara inyong na atek dihwan honyong hijaran ayyu inyong th’ethathaciana nanyong. ³⁰ Yesu kwak atek hijan alo akolon adi thonyong. Eloitho d’elulung, ajyo, “Ngai othin abongoitho hundang?” ³¹ Ohothifok honyong ajyori donyong, “Itehu iye elulung ne irudaru adohoi, ara iye ijyo, ‘Ngai othin nang?’” ³² Yesu edoryo diya koko ditehuna ngai ihandyo. ³³ Atehan ainyong afuk donyong, abang athulo ne, ehihira. Aindu inyong na, apwaharu dihithemi honyong, anyahi inyong arami hadiri. ³⁴ Inyong ajyo d’athulo ne, “Aitho, athuk eruhon nahoi iye ethaijyo. Ilo th’elik dithayijunu th’ethathaciana nahoi.” ³⁵ Hocama inyong ahani, afuni ohothing homok thalahong n’Asynagogue, ajyori, “Aye neengaring, ainyong hoithathacianio iye ohoityeniani?” ³⁶ Ti, Yesu ethaningu ocame lodwo athuhi ajaran le, ajyo da lahong n’Asynagogue, “Hoibang, ti, iruho.” ³⁷ Kabong hoiruhok othulo lobo thoilo honyong, arahari Petro, Yakobo karik Yoanne, lolai ho Yakobo. ³⁸ Afuni isong di hang hala lahong l’Asinagogue; inyong atehu ohothing arya iwawacitha; ikori ahibu isong iwuluhoitho bebe. ³⁹ Ajingara nanyong dithwa, ajyo dosong, “Anyo ijyorya ithai, ara ithai ikor?” Kabong akalifonit oye, ti, nad’ajoo.” ⁴⁰ Isong ethalubangyo inyong. Ti, inyong anyahi isong fodok thoifwa dingwai; eduhu omonye l’aitho karik ahathingi, afwoi d’amaji nawonderek aitho. ⁴¹ Eduhu ahinang n’akalifonit, ajyo donyong, “Thalitha, koum!” Neloicye ara najyo, “Aitho natti, ajyo nang dohoi, odothoi th’ahide.” ⁴² Akalifonit kwak adotho th’ahide, adaha (ara oyingathik honyong tomon larehai). Afalanga isong afalanga nabolo tholohide abolori. Efahak inyong lo isong th’akolon, lobo thaang oteha arami hune. ⁴³ Thiya, inyong anyahi isong thoisarak akalifonit aning nabo thonye.