¹ Ikoti, aculuyo inyong lo etyenio dipogo h’ahari nahittok; elulung nahittok asuduha donyong, inyong awoni dihiji honyong. Owon nya elulung nya fodok difohor h’ahari nahittok. ² Etyenio inyong isong asang olwarai th’aryamarihio; dityenio honyong, aning na najyo inyong dosong, ³ “Ithaningyethek! Alo ohoromoni diyeyo ohinyomo honyong. ⁴ Diyeyo honyong, adouni homok dihiji h’oyihoi, ara ahwen afuni, alutharai isong. ⁵ Homok adohi d’ahap nankek ara omorik, namutha aboro diya. Isong abuli kwak, anyo, awangi aboro hafwo dihap. ⁶ Ti, ajara oholong aindu, enohyo isong, anyo, aang ohode hosong, ayohoji. ⁷ Homok ohinyomo adoro dith’ehwa. Ehwa abulu, aromye isong, aang hobolori dingidari ara anyari. ⁸ Ohinyomo homok abuli d’ahap nayyu, isong hulo abolori dihide ara holwari, angidari athomone aunihoi, athomone inde, omiru juk esihe.” ⁹ Thiya, inyong ajyo, “Lowon h’eyoha, thoithairye.” ¹⁰ Awonan nya no Yesu hamaring, efiyo inyong ohoifahak tomon larehai howon honyong arami h’arymarihio. ¹¹ Inyong ajyo dosong, “Dothai, athuhi esarahina amysterio n’ohobye l’Ojok, Ti, d’ohothing hothondak, esarahini ditha h’aryamarihio, ¹² Inyong na, ara hamijyo, aa, omijye, ti, aang otehuni, karik, ithairyo isong, aa ithairyo, ti, aang otehi tuhudik, dia ara kodien eloithoi, ira isong Ojok imiehina.” ¹³ Inyong ajyo dosong, “Aang ithai itek tuhudik aryamara na? Angai de itek ithai tuhudik aryamarihio bukulung?” ¹⁴ Oyehi ohoyeni ocame. ¹⁵ Isong ocamitha hulo, homok hoth’oyihoi, amaji nayehinerek inyong. Ara isong hethairyo, Sitan kwak aindu eyaru adi ocame lonyahini dthosong. ¹⁶ Ohinyomo hoyehini d’amaji nakek ara omorik: Isong ohothing hara, ara hethaningu ocame, obocori kwak efothuna inyong th’amuno. ¹⁷ Ti, aang owoni h’ohade hosong. Isuka isong omiru tiibai. Diholu, ara ethathaciana dia ethagyemio n’ocame nawon, isong hulo aboco kwak apwaharu adi. ¹⁸ Ikoti, homok ohinyomo hodohi ditha hoihwa. Isong hulo ohothing hoithairyo ocame, ¹⁹ ti, awahan n’ahap, ethathadwala n’abara karik awahan n’asang hothohop hamok, aindu, aromyo ocame, aang hongida aning nabo. ²⁰ Ohinyomo hoyehini d’ahap nayyu, isong ohothing hoithairyo karik eruhi ocame longida ahayo, athomone aunihoi, athomone inde dia juk esihe othomone enyahitha olwarai. ²¹ Yesu ajyo dosong, “Ara inwahyo iye athwa, imuhok iye ahirya dia isarak iye inyong tholohop h’aning naang awulo nanyong otehunu? Ithawejik iye ahirya dihide h’aning natihunu awulo n’ahimang thiya. ²² Aca awang aning nedima, naang ofuni de itehan; karik aang de aning nedima, naang oindu ileyori dindak. ²³ Ara lowon h’eyoha, thoitharye!” ²⁴ Ajyo dosong, “Omijyethek tuhudik d’ocame loithairu ithai, anyo, othemit loithairyerek ithai, inyong de ofuni ithai ithemyerek, karik afuni de ifonihinerek dothai. ²⁵ Anyo, lowon h’aning nabo, ofonihini de nabo donyong, karik, ara laang howon h’aning nabo, juk tiibai nawon honyong ne, iduhuni de adi thonyong.” ²⁶ Inyong ajyo ikoti, “Ohobye l’Ojok, ojahitha othulo loyehi ohinyomo dihap. ²⁷ Ojootho th’aharie, amjjyo th’afaning; obuli ara ohinyomo abolori, juk inyong aang hotek angai. ²⁸ Owetha ahap ara ohima hamaring. Abene ehethemok, amimithang h’athurothe karik Ohimai langida. ²⁹ Ara ohima hangidari, ohoromoni kwak atahitha odemi, anyo, edwong engongocio.” ³⁰ Ajyo ikoti, “D’ainyong ecohi etharwangyo ohobye l’Ojok, dia nani aryamara ocohi hothai anyahinerek inyong? ³¹ Ojahitha ohinyomothi lotti, lara, ara ledulahini, omutha inyong lo bebe th’ohinyomo fodok hothohop. ³² Ti, ara lathuhi edulahina, obu karik abolo th’oyandik bukulung hotho mana, howoni h’athandak hahittwak hafunu ahwen hothohide iduhorik athwahio d’obibile lonyong.” ³³ Th’aryamarihio olwarai iring ne, acama ocame dosong iring nera isong iteharik tuhudik ³⁴ karik kabong inyong lo ocama dosong kwong aryamara. Ti, awonan nya nanyong hamaring, enyanyahak asang fodok d’ohothifok honyong. ³⁵ Ofaning le, nya th’athari, ajyo dosong, “Hafatha d’oyirik lothele.” ³⁶ Isong hulo afwo, eyarai Yesu, ara inyng ahani, diroko. Owoni nya arokoni hamok hafwo hosong. ³⁷ Ajara nya ahomwa nako awam, epongaitho ahari ditha h’aroko, lwai aroko aindehi efuthan ara ahari. ³⁸ Ti, ahibu Yesu athauk ajoothoro bebe dihide athehit n’ahu. Ethadocye inyong lo, ajyori, “Ohoityenani, awang iye iwak atehan hijan eindek ohoi aye?” ³⁹ Adotho, eringyo ahomwa, ajyo d’ahari nahittok, “Elik! Owethai amaji aboithe!” Thiya, ahomwa awetha, ara adularu nayyu, abolo, awon. ⁴⁰ Thiya, ajyo dosong, “Anyo ibang ithai? Kabong ithai iwon heruhon?” ⁴¹ Abangi isong bebe, ajyori dihwandek hosong, “Ngai de lya, lara juk ahomwa karik ahari nahittok iruhi arami hanyong.”