¹ Yesu koti adaha di Sinagogue; owon nya othulo lobo diya laye ahinang. ² Ohothing homok engengelyo inyong tuhudik ditihyo ara ithayijyo inyong d’Ofaning Oithacofe dithalyehini epal nanyong. ³ Yesu ajyo d’othulo laye ahinang lya, “Odothoi, ara iye iwetha dini dihiji h’ohothing bukulung.” ⁴ Thiya, ajyo d’ohothing, “Obis dihandyo ayiji d’Ofaning Oithacofe dia diryafuna? Dilwahuna esu dia dittohoro?” Ti, adularai diing. ⁵ Amijyo dosong th’engere; ejorya th’akolon thon’othaja hosong, ajyo d’othulo lya, “Odongok ahinang nahoi.” Adongok inyong, ara ahinang anyahak dimaji. ⁶ Ara Ofarisei afwo dindak dicama h’ohothifok ho Erode dirimahina oyihoi lethayeyerek inyong. ⁷ Thiya, Yesu h’ohothifok honyong, afwoi d’ahari nahottok, ara elulung n’ohothing tho Galilea, Judea, Yerusalem, Idumea karik thele ho Jordano, Tyre karik Sidone, athiforo. ⁸ Ethaninguna nasong asang hehandyo inyong, aindu elulung nahittok donyong. ⁹ Anyahi ohothifok honyong, thoiyanu aroko natti donyong, anyo, tek elulung inyong amiyithak dihiji. ¹⁰ Aca ethayijyo ohothing holwa; owahi ohothing holwa afwan iindehai diithin inyong. ¹¹ Ara ohoilehio hoibot hatehu inyong, apwaharai dihap dihithemi honyong, ekori hijaran, “Iye Olonyi l’Ojok.” ¹² Anyahi isong thanako thaang hoisarak inyong lo thotehi. ¹³ Adok di donge; ara ohothifok howak inyong, athiforoi inyong. ¹⁴ Inyong anyimu ohothifok tomon h’arehai (hoilongo inyong ara ohoifahak) dowoni honyong, inyong alo efahaitho isong difwan inyahina ocame, ¹⁵ karik dowoni h’asuhe dingaterek adi ohoilehio homonyong. ¹⁶ Inyong anyimu ohoifahak tomon l’arehai: Simone, loisarak inyong ofure Petro, ¹⁷ Yakobo, lolonyi ho Zebedeo karik Yoanne lolai ho Yakobo, loisarak inyong ofure Boanerjes, lojyo, olonyirok h’ahila; ¹⁸ karik Andrea, Filippo, Bartolomeo, Mateo, Tomaso, Yakobo, lolonyi ho Alfeyo, Taddeo, Simone l’ohoingarak, ¹⁹ karik Juda Iskariote, lonya oindu de ithanyangahina Yesu lo. ²⁰ Thiya, alo dihang; elulung ikoti asuduha, ara naang isong ocohinerek anyerek anyari. ²¹ Ethaninguna n’ahang nanyong ahani, afwoi dindefunu inyong, aca ojyori isong, “Etharohoja ahu nanyong.” ²² Ohoigerok ecuruni tho Yerusalem, ajyori, “Endefa inyong lo ho Beelzebul.” karik, “Th’ohoindefani thol’ohoilehio homonyong, ongaterek inyong ohoilehio homonyong adi.” ²³ Yesu elongu isong donyong, ajyo dosong th’aryemarihio, “Angai ocohi inyong do Sitan dingaterek Sitan adi?” ²⁴ Ara ibwa ahabwore, aang ocohi d’ahabwore ne awetha inyong hamaring. ²⁵ Ara ibwa ahang, aang ocohi d’ahang ne diwetha inyong hamaring. ²⁶ Ara adotho Sitan eriborik ahwan nanyong, ebwa, aang ocohi awetha inyong hamaring, ti, edwong ecuhit nanyong. ²⁷ Ti, aang othulo lojinga dihang h’othulo loko, arujoro attitto hanyong bukulung, ara kabong dodo othemyo othulo loko lya, etharohojo hathi ahang nanyong. ²⁸ Anyahina diri dothai, ohohini de ayetha fodok h’olonyirok h’ohothing, juk omotta fodok hoibot hojyori isong, ²⁹ ti, othulo locama omoritha hoibot d’Ohoile Lodwa, aang horimak amiehina, ti, eyau eyau nattohyo.” ³⁰ Ojyo Yesu ahani, anyo, ajyo isong hulo, “Owon inyong lo h’ohoile lolibo.” ³¹ Thiya, ahathingi nanyong karik olarok honyong, afuni karik awethi dingwai. Elongoi inyong, alihahini inyong lo dihiji. ³² Elulung awoni ara nalihak inyong, ara isong ajyori donyong, “nehathingi, holoilai karik henehani, heririyo iye dindak; hathifeyo iye. ³³ Yesu etharangyo isong, “Hongai nanahathingi halalalai?” ³⁴ Inyong lo amijyo d’ohothing howoni d’ekorie nalihak inyong, ajyo, “Otihatha, nanahathingi karik halalalai hulo.” ³⁵ Aca, loihandyo awahan n’Ojok, inyong lya lalalai, nanahani karik nanahathingi.”