¹ Anyahuna no Yesu di Kapernaum diholu h’operok tiibai, ethaningunu hijan inyong lo lodi hang. ² Afuni donyong ohothing olwarai, aangarik amaji, lwai dihuthuk h’oyihet; inyong lo anyahi dosong ocame. ³ Thiya, ohothing arangwan eyanu donyong othulo laye arobokang. ⁴ Aangan n’elulung ahorihina isong afuna indehai do Yesu, alahanye efithe tholohu ho Yesu, ethacurohini othulo lodiha lya th’ofyel lothoferorik dihithmi ho Yesu dithwa. ⁵ Atehuna eruhon nasong, Yesu ajyo d’othulo laye arakang lya, “Olonyi, ahohini eyatha hahoi.” ⁶ Diyan, ohoigerok howoni d’amaji nya, egigiloi dithaja hosong, ⁷ “Angai ocama othulo lya ahani? Ipitha! Ngai ocohi amiehina eyatha, arahari Ojok hamaring?” ⁸ Kwak Yesu atek di hoile honyong, ainyong igiglo isong dihwandek hosong. Ajyo dosong, “Anyo igigilo ithai ahani dithaja hothai? ⁹ Nani ilik, ajaran d’othulo laye arabokang lya, ‘Ahoini eyatha hahoi,’ dia ajaran, ‘Odothoi, iduhu ejoothit nahoi, odahai’? ¹⁰ Ti, ditek ithai hijan owon Olonyi l’Othulo h’akolon dihap di hohina eyatha, ajyo inyong lo d’othulo laye arabokang lya, ¹¹ ”Ajyo nang dohoi, odothoi, iduhu ejoothit, ilo di hang hohoi.” ¹² Adotho thahide kwak, eduhu ejoothit nanyong, ajinga dingwai dihithemi h’ohothing fodok, afalanga ohothing fodok, ethabolorye Ojok, ara isong ajyo, “Kabong ohoi irimahinerek aning nabo iring ne.” ¹³ Alo inyong lo ikoti dindak, dikeremet h’ajor. Ara elulung n’ohothing aindu donyong; etyenio isong. ¹⁴ Anden nanyong ahani, atehu Levi, lolonyi h’Alifeyo, owoni di moroko h’ohoiduduhani l’enyahwo, ajyo donyong, “Othifunu nang.” Adotho thahide, athiforo inyong. ¹⁵ Owon nya Yesu h’anyari dihang ho Levi isong h’ohoiduduhak h’enyahwo karik ohoiyak olwarai, onye honyong karik ohothifok honyong. Aca awoni nya ohothing olwarai hothifoitho inyong. ¹⁶ Atehuna nya n’ohoigerok, Ofarisei, Yesu anyo h’ohoiyak karik ohoiduduhak h’enyahwo, ajyori d’ohothifok honyong, “Anyo onyo inyong h’ohoiduduhak karik ohoiyak?” ¹⁷ Ethaninguna no Yesu arami hune, ajyo dosong, “Ohothing hoyyu ahwandek hasong, aang howahi oiboni, arahari ohothing hodiha owahi aboithe. Aang nang aindu, dilongo ohothing hobis, ti, ohoiyak.” ¹⁸ Thene nya, orimak owoni ohothifok ho Yoanne karik Ofarisei didwa. Afuni ohothing homok ajyori donyong, “Anyo idwa ohothifok ho Yoanne karik h’Ofarisei, ahibu hohoi aang hoidwa?” ¹⁹ Yesu ajyo dosong, “Ocohi d’ohoigyemak edwa, ahibu ohomuthani howon hosong? Howon ohomuthani hosong, aang hocohi isong edwa. ²⁰ Ti, ofuni de operok hofuni iyarik ohomuthani adi thosong; d’operok hule, ofuni de idwa. ²¹ Aang othulo lorifak akerebuse angejuk d’abongo angoroi. Aca, arifiyo ne, oricyo adi thonyong, angejuk th’angoroi, amonyong hathi aritha okalak. ²² Aang othulo loithurak obalu angejuk ditha ehulo nelangoro. Ara leyafutha, ofwada ehulo, ara obalu karik ehulo fodok akari. Kombwo, obalu angejuk, thoithurahini ditha h’ehulo angejuk.” ²³ D’Ofaning Oithacofe, alo Yesu tholo amandak hamok h’ohima, ara ohothifok honyong aculuyo akweyo ahosi h’ohima difwan hosong th’oyihoi thole. ²⁴ Ofarisei ajyori donyong, “Otiha, anyo ihandyo isong aning naang obis d’Ofaning Oithacofe?” ²⁵ Inyong ajyo dosong, “Kabong ithai ihena ainyong ihandyo Davide ahibu inyong ahure oleng – inyong karik ohothing howon honyong – ²⁶ angai olo inyong dithwa h’Ojok, orii Abiatar ara ofadiri lohittok, anyo anyari naang obis d’othulo loboling, arahari do fadirihio, juk esarahina d’ohothing homok honya owoni honyong?” ²⁷ Yesu ajyo, “Ihuhumye nya Ofaning Oithacofe d’ohothing, ikara ohothing d’Ofaning Oithacofe.” ²⁸ Inyong na, Olonyi l’Othulo, Ohobu; Ohobu dang l’Ofaning Oithacofe.”