¹ Aculwe na n’evanjelio no Yesu Kristo, Olonyi l’Ojok. ² Iring negerorik inyong ohocoroni Isaia: “Otiha, nang lasulak ohifak hindang dihithemi h’ahomong nahoi, inyong loindu de ihuhuhumyo oyihoi lohoi. ³ Omurut l’othulo loikor ditha hofara, dihuhumyo oyihoi l’Ohobu; dihuhumyo oyihothik honyong hobis.” ⁴ Yoanne aindu, dibuhyo batisimo naburunu karik namiehina n’eyatha ditha hofara. ⁵ Amiji fodok no Judea karik ohothing bukulung ho Yerusalem afwoi donynong. Abuhok inyong dosong batisimo, ewahai eyatha hasong ditha owor lo Jordano. ⁶ Iyofo nya Yoanne abongo n’ohofir karik erohit di mukok n’amuhunyong n’akonikoni, karik anyo ebeye karik aiso nalofye ditha hofara. ⁷ Etyenio oisukaitha hoyyu, thajaran, “oindu de di put honang othulo loko thonang, laang ocohi donang alahyo ahafi h’ahamuha hanyong. ⁸ Abuhok nang batisimo dothai th’ahari, ti, oindu de le ibuhohina ithai batisimo th’Ohoile thol’Odwa.” ⁹ Afuhi arami d’operok hule ahana: aindu Yesu tho Nazarete di Galilea ara Yoanne abuhok inyong batisimo ditha h’owor lo Jordano. ¹⁰ Ainduna no Yesu adi thath’ahari, atehu inyong paradiso angai karik inyong dang atehu Ohoile ainduna dihap dihu honyong iring ayoro. ¹¹ Omurut aindu thohide, “Iye oitho hindang lamuno nang; amuno nang bebe hohoi.” ¹² Thiya Ohoile eringak inyong thoilo ditha h’ohidyefo. ¹³ Esuka di hidyefo operok athomone arangwan, ahibu Sitan inyong othemyo. Esuka h’ecangi, ahibu anjelohio igyema donyong. ¹⁴ Thene, endefa no Yoanne, Yesu aindu di Galilea dinyahina evanjelio n’Ojok. ¹⁵ Ajyo, “Acohini omiru karik anyiha ohobye lothohide. Oburunethek ara ithai iruk evanjelio.” ¹⁶ Adaha nya nanyong diker h’ahari no Galilea, atehu Yesu Simone karik Andrea, lolai ho Simone, omirye abwoyino dith’ahari; isong hulo nya ohoyapohak h’ohom. ¹⁷ Yesu ajyo dosong, “Ifuna, othifunethek nang; esarak nang ithai de thoiwona ara ohoyapohak h’ohothing.” ¹⁸ Thiya, edyaharu isong hulo abwoyino kwak, athiforoi inyong. ¹⁹ Aden no Yesu ahithemi tiibai, atehu Yacobo, lolonyi ho Zebedeo karik Yoanne olai lonyong; orifiyo nya isong hulo abwoyino dihide h’aroko. ²⁰ Elongo inyong lo isong, edehini omonye losong Zebedeo dith’aroko h’ohoigyemak hadumai, athiforoi inyong. ²¹ Orii tiibai ahani, afuni di Kapernaum; ofaning le, Oithacofe l’esabit. Yesu ajinga ditha Sinagogue, etyenio. ²² Afalanga ohothing etyenio nanyong, anyo, ityenio inyong lo isong iring othulo lowon h’akolon n’endafaitho n’ohothing, ikara iring ohoigerok. ²³ Othulo ditha Sinagogue nasong ne lowon h’ohoile loibot ekor, omorut dihide, ²⁴ ajyo hijaran, “Ainyong ihandyerek ohoi iye, Yesu la Nazareth? Iindu iye dittohoro ohoi? Atek nang iye ngai. Iye Aboithe Lodwa l’Ojok!” ²⁵ Yesu emimingak ohoile lomonyong ajyo, “Odularu, ara iye iindu adi th’othulo lya!” ²⁶ Ohoile loibot amirok othulo lya dihap, alo adi thothonyong; alo adi ahibu inyong ikokororo omurut dihide bebe. ²⁷ Afalanga ohothing bukulung, efifyai ahwandek hijaran, “Ainyong na? Etyenio angejuk th’akolon! Eringyo juk ohoilehio homonyong, eruhi isong hulo arami hanyong. ²⁸ Asayo hanyong afwoi d’amasok fodok ditha h’ahap no Galilea. ²⁹ Ajinguna nasong adi tho Sinagogue, afuni dihang ho Simone karik Andrea, isong ha Yakobo karik Yoanne. ³⁰ D’orii lya ne, orimak nahamone ho Petro oferi, odiha h’ethor n’ahu. Isong hulo anyahini do Yesu adiha nanyong. ³¹ Thiya inyong lo aindu, eduhu ahinang nanyong, adohu inyong dihide; ethor n’ahu edehi inyong. Inyong na aculuyo alwahyo isong. ³² Athari nya, diholu h’alumon n’oholong, eyanai donyong ohothing fodok honya odiha karik howoni h’ohoilehio homonyori. ³³ Asuduha abore fodok dihuthuk h’oyihet. ³⁴ Ethayijyo ohothing holwa hodiha opeceni h’adihathik hama hama, angaterek oho ilehio homonyong adi, ti, kabong ohorik ohoilehio homonyong to camai, anyo, otehi isong hulo inyong. ³⁵ Ahenyu inyong lo berien, hoiriok ahap, alo inden d’amaji n’esuritha, amojyo diya. ³⁶ Simone karik ohothing honya owoni honyong, athifeyo inyong. ³⁷ Arimahini isong hulo inyong, ajyori donyong, “Ohothing fodok, abok abok hothifeyo iye.” ³⁸ Ara inyong ajyo, “Hafatha adi d’amaji naboling, nathatha h’abothok haindek hune, dalo nang inyahina arami hayyu diya; inyong haindunerek nang thenene hini.” ³⁹ Alo atha no Galilea fodok, dinyahina arami hayyu di Synagohio hosong karik dingaterek ohoilehio homonyong adi. ⁴⁰ Aindu otthulo l’athalulu donyong. Amojyo donyong, arigongo dihap, ajyo donyong, “Ara iwak iye, ocohi dohoi dithaliboryo nang.” ⁴¹ Amiehunu nanyong ahani, Yesu athin inyong lo th’ahinang, ajyo donyong, “Awak nang. Oliboro.” ⁴² Kwak ahani, attalulu edehi inyong, alibo. ⁴³ Yesu ethahongok inyong thaang ocamai, asulak inyong adi. ⁴⁴ Ajyo donyong, “Oteha tuhudik di aangan inyahina aning nabo d’othulo loboling, ti, ilo ithaithak ahwan nahoi do fadiri, isarak esorio nahoi d’ethaliborio nahoi iring efahak Musa, iring anyahina dosong.” ⁴⁵ Ti, alo inyong lo dindak; alo ibocoro aculuyo anyahina arami hune dindak, iring owak inyong, ethathurok ocame, lwai Yesu aangan ajingara dith’abore oleyoroi, ti, esuka dith’amasok halama. Ti, orasa ohothing afuna donyong, th’amasok bukulung.