¹ Da anyari nesahini do ojohi: Itek ohothai ijan itek ohothai arami."Olitho arami ti eruhon oboboloro adihide. ² Ara ojo lobo otek inyong aning nabo, kaang ode lia ho otek iring neruk inyong itehari. ³ Ti ara owon lobo he eruk do Ojok, otek Ojok inyong. ⁴ Dinyo angiriang na thuhi esahina do ojohi: Itek ohothai awang "ojohi ho owon iring aning nabo di tha ahap ne," "awang ojok lobo tha Ojok aboithe." ⁵ Juk alwari sang hajeti - ojohi di dou kuya di hap, iring na awondere "ojohi ha lamolojin," ⁶ Ti do ohoi owon Ojok Lmonye aboithe, lo ofvuni asang bokolong thonyong, karik lesukarik ohothai, karik Lamolo aboithe Yesu Kristo, thoinyong isuka asang, karik thoinyong isuka ohothai." ⁷ Ti awng ohothing bokolong ho otek arami hune. Homok inyaa omojoi do ojohi hosong homonyie, anyie anyari naja nesahini do ojohi. Othajia hosong amonyori acha ojoni. ⁸ Ti awang anyari ithayaru ohothai do Ojok. Awang ohothai heyu ara inyo ohotha, dia ara iwang ohothia henyo. ⁹ Ti omijie tuhudi de esuka nahio iring newak ie tha awang hesahi lobo lo ojon de eruk di boso. ¹⁰ Ara otehu lobo ie, lo tek arami, di inyo angiriang da athua namojorik ojohi, okara othajia hosong ojoni da akolon na ahosi hasong di nyo angari nathuhi esarahina do ojohi" ¹¹ Thene acha atehan nathai ojohi hulia ara aisong, olai lo ojon dia ahani, lo oyerik Kristo, ethorohoja. ¹² Tholia,ara ie leyau do olarok ha ahanerok di iriavuna othajia hosong ho ojoni hullia, eyau ie do Kristo. ¹³ Thene, ara isarak anyari lalalai ha nanahani aruhitha, awang nang anyo angiriang ikoti, da awang nang esak lalalai ha nanahani apuaharu.