¹ Karik nang olarok , awang nang achama do thai iring ohothing ho ohoilejin, ti ara ohothing ha ahuan ne, iring da akalifinok do Kristo. ² Ethanahio nang ithai alee ikara ahiringo, acha kabong ithai ichohi da ahiringo. Juk do omiru lia kaang ithai he chohi. ³ Acha he won itha iring ahuan ijaa. Acha ara owong ohaine ha ahoro di hiji ho thai, oke omanyitha ha ahuan hulia, awak itha ithifotho odahitha iring na wak ohothing? ⁴ Acha ara ojo lobo "Athiforo nang Paulo," ara lobo ajo, "Athiforo nang Apollos," awang ithai isuka iring ohothing ho tho hop? ⁵ Ngai inyong Paulo? Ongachiani he sak ithai eruhon, hesak Lamolo egema abok abok. ⁶ Edulak nang, Apollos abuhio ahari dia, ti Ojok esak abolori. ⁷ Thia dia ledulio kuya lo obuhio ahari ike aring nabo. Ti Ojok isak abolori. ⁸ Dini ohedulani ho ohobuhoni la ahari ara isong aboite, abok abok iduhuni isong de omoiya iring na nyahi eboma nasong. ⁹ Acha ohothai ohegema ho Ojok, ithai amana no Ojok, athua no Ojok. ¹⁰ Da agracia no Ojok nesahini do nang iring othulo lo oyinik aduho, ehuhumio nang ahap na athua lobo aduho dia. Ti ohothing abok abok omijo tuhudi angai oduho inyong di hide ho nyong. ¹¹ Acha awang lobo loinik ehuhumio na ahap tho nathuk Yesu Kristo ehuhumio. ¹² Thene ara oduho lobo da ame nathuk ehuhuma tha ayiel(gold), sufuria, omorik ho oko, ahiek, ohujithang, kuya afill- ¹³ ithaliehini de egema nanyong, acha ithaliehi inyong de afaning. Ithaliehi de ahimang; onyahi de ahimang ayiji na asang ha aduhorik hune abok abok. ¹⁴ Ara ofithoro aning naduho othulo, ifothu de ethamunitha. ¹⁵ Ti ara omuda asang bokolong, okar amoru de hanyong, ti isu inyong tha huan, iring othulo lo ongero thalathatha ahimang. ¹⁶ Awang ithai he tek injan ithai a templo no Ojok esuka Ohoile lo Ojok di thua ho thai? ¹⁷ Ara itharusuhio lobo a tamplo no Ojok, itharusuhok dang Ojok othulo le. Acha odwa atemplo no Ojok, ahanya idwa ithai dang. ¹⁸ Heruhotho ethatuma tha ahuandek. Ara owon lobo di hiji hothai le gigilo ijan ilafioro inyong do oper lia, inyong the wana ara le "buyang" ara owak inyong ofereho. ¹⁹ Acha ofereho ha ahp ne rai ebuyang ho Ojok. Acha igero: "Indefu olafiorojo di hongitha hosong." ²⁰ Karirik ikoti, " Otek Lamolo ijan awang aning nayu do gigilitha ho olafiorojok" ²¹ Thene awang ethadara tho ohothing! ²² Dia Paulo, kuya Apollos, kuya Cephas, dia ahap, dia, esu, dia ayee, dia asang ha won, dia asang hohofuni- bokolong hathai, ²³ ithai ho Kristo, Kristo lo Ojok.