¹ Da ainduna hinda do thai, olarok ha ahanerok, awang nang aindu ara othulo loinik achame he etitoyo kuya olafiorojoni iring na lolongoi arami diri ho Ojok. ² Awak nang awangan atehan aning nabo ha won nang hoitha harihari Yesu Kristo, inyong lo obehohini. ³ Nang ho thai di jonan, karik di bangan, karik di hihira bebe. ⁴ Ochame hindang he elolongo hindang ike dirimahinere elafioro, ti onyahini ohoile ha akolon, ⁵ do ara eruk nahoi awang ho owon tho olofereko tho ho othulo, ti di tha akolon no Ojok. ⁶ Dene echame ofereho di hiji ho ohothing ha abolo, ti ike olofereho ho tha ahap ne, kuya ho ohendefak ho oper lia, ho olitho dene hullo. ⁷ Ti ichama ohoi ofereho ho Ojok da tha arami ha awang oleyori-ofereho he idima hesarak Ojok kaang operi di ithahuyerek ohothai. ⁸ Awang tho ohedefak ha ahap ho oper lia oteh ofere lia, ara kodien otehi isong do omiru lee, awang isong heruk ibehohina Lamolo lo ohu. ⁹ Ti iring negerorik inyong, 'Asang ha kabong ahonyek otehu, ha kabong eyoha he thairu, ha kabong ahu negigilorik, asang he huhumio Ojok do ho omuno inyong." ¹⁰ Isong asing hune hathuk Ojok ethaliehi do hothai tho lo Ohoile. Acha othifeyo ohoile asang bokolong, juk asang ho Ojok hedima. ¹¹ Ngai otek ogigilitha ho othulo lobo harihari ohoile lo othulo ditha ho nyong? Dang, awang lobo lo otek asang ho Ojok hedima harihari Ohoile lo Ojok. ¹² Ti kaang ohoi ifothu ohoile la ahap, ti Ohoile tho Ojok, di isak ohoi atehan ijaa asang hesarak ohoi Ojok. ¹³ Ichama ohoi tha asang tho hune tho ochame la awang ofereho ho othulo itienio, ti le tienio ohoi Ohoile, Ohoile le inyanyahio ochame lo Ohoile tho Ohoile lo ofereho. ¹⁴ Othulo la awng ho ohoile awang he duhu asang hawon ara ho Ohoile lo Ojok, acaha awang isong howon ara aring nabo do nyong. Awang inyong ho otek isong acha athuk ohoile angocho isong ara ha awang oyu. ¹⁵ Inyong lo owon ho ohoile ongocho asang bokolong, ti awang inyong ongocho homok. ¹⁶ "Acha othulo la awang otek ahu no Ojok awang he ringak inyong?" Ti iwon ohoi ha ahu no Kristo.