¹ Thene ethayihi nang ithai, olarok ha ahanerok, evangelio ne etitoyo nang do thai, ne ethuk itha efothuna karik newetharik ithai, ² ne ethasuyerek ithai, ara idefetho ithai ochame lo Ojok la athuk nang ithai etitoyo iring nako - harihari ara eruk ithai ija. ³ Acha esak nang do thai aning nako bebe aning nefothu nang dang: Ijan oyee Kristo tha eyatha tha hahothai iring najo ochame lo Ojok, ⁴ anuhahini, athadothuni inyong do ofaning ethahunihie iring najo ochame lo Ojk. ⁵ Aleyo do Cephas, thia do tomon lo arehai. ⁶ Thia aleyo do do olorok ho okalaru amiyaha enyahitha miet ha ahanerok aboithe, homijo holwa hosong ahanana, ti athuk homok aferi. ⁷ Thia aleyo do Yakobo, thia da ho lefahat bokolong. ⁸ Di holu bokolong, aleyo do nang, iring da akalifonit na ayisunido omiru ho omonyo. ⁹ Acha nang aholu na helefahat, la awang hoyu di ilongo lefahat, acha atohio nang athua na amojo no Ojok. ¹⁰ Ti tha agaracia tho no Ojok awong iring na awonderek nang ne, awang agracia nanyong do nang ho okar. Ti egema nang bebe nakalaru nasong. Ti ikara nang, ti agracia no Ojok nawon do nang. ¹¹ Thene dia nang kuya isong, ahani ititoyo ohoi karik ohoi eruk ahani. ¹² Thene ara Kristo le titoye iring lo odohuni tho yee, angai ojo homok hothai awang ebuhuna tho ohoyak? ¹³ Ti ara awang ebuhuna no ohoyak, thene juk Kristo kaang ho ethadothuni. ¹⁴ Ara kaang ho ithadothuni Kristo, thia etitoyo nahoi alo ija, ara eruk nathai daang alo ija. ¹⁵ Arumahini ohoi ara ohomijak ho oduala do Ojok; acha echama ethadualio do Ojok,ijan etha dothok Kristo,kaang inyong he ihandio. ¹⁶ Acha ara awang ohoyak ho odotho, juk Kristo kabong hethadothuni. ¹⁷ Ara kaang hethadothuni Kristo, eruk nathai alo ija ithai irasak de eyau na thai. ¹⁸ Thia hullo ho oyee do Kristo athuhi dang amuyahi. ¹⁹ Ara iwon ohothai da amanya ne ingere amanya naindu do Kristo, tho ohothing bokolong, omiehini de ohothai. ²⁰ Ti nathuhu adohunerek Kristo tho yee, ahayo he eteri ho ohothing hayee. ²¹ Acha ara oindu ayee tho othulo, tho thulo dang oindu ebuhuna no ohoyak. ²² Acha iring na ayerik bokolong da Adam, do Kristo dang omijo ohothing. ²³ Ti aboko abok tho oyihoi tho lonyong: Kristo, ahayo he eteri, thia ho owon ara ho Kristo omije de da ainduna anyong. ²⁴ Etohon nya, ara Kristo le thafothok ahabuore do Ojok Lamonye, ara lethawejo omanyitha karik ohobie ha akolon. ²⁵ Acha ongida inyong idefetho ahabuore man inyong esahini omerok honyong tho lohop ahejek hanyong. ²⁶ Omethononi lo otohori aholu inyong ayee. ²⁷ Acha, "athuk inyong esahina.asang bokolong tho lohop ha ahejek hanyong." Ti ara ajo "athuk esahini asang bokolong," oleyo theleer ijan awang he isak ho lesak asang bokolong tho lohop honyong. ²⁸ Ara asang hawon tholohop honyong, thia ara onlonyi tha ahuan awon tholohop ho le sak asang bokolong do nyong, ara Ojok la Monye awon bokolong do bokolong. ²⁹ Dia ainyong de ohandio hathuhi ebaptisio do ho oyee? Arabawng hethabuhuni ohoyak de, anyo ebaptisie isong dosong? ³⁰ Anyo isuka ohothai tha abangi omiru daang? ³¹ Olarok ha ahanerok, tha tha ethadara tho hindang do thai, na awon nang do Kristo Yesu Lamolo lo ohothai, elolongok huna: Iyee nang juui. ³² Ainyong arumak nang nayu, iring othulo,ara ethangafio nang echani hamonyo di Ephesus,ara awong he ethadothuni ohoyaak? "Hanyethe ohothai imatha, acha moithe ohothai iyee." ³³ Heruhotho ethatuma: "Esuka ho ohothing ha awang ho oyu ithorohojo omanyitha ho oyu." ³⁴ Hebothothi! Isukathi nayu! Herasathi eyauna. Acha homok hothai awang ho otehi Ojok. Ajo nang ahani di sahinere ithai ariri. ³⁵ Ti ara de lobo ajo, "Angai ithabuhuni hathuk ayee? Ahuandek hajak angai ofunerek isong?" ³⁶ Awang ithai itek arami sei! Awang aning nedulak ie heterio abuluna ara awang ho oyee. ³⁷ Ikara aning nedulak ie inyong owon ara ahuan de, ti ohinyomo- kuya aindu ara ohimai dia ara aning nabo nekela. ³⁸ Ti isak de Ojok ahuan donyong iring nanyimu inyong, do ohinyomothi aboithe, ahuan nayong hamaring. ³⁹ Awang ahuandek orijoro, ti owon ahuan aboithe no ohothing, nabo ahuan ne echangi, nabo ahuan na ahuen, nabo no ohom. ⁴⁰ Owon asang hotho hide karik asang hothohop. Ti ethahuo la asang hotho hide owon ara nabo karik ethahuo no thohop ara nabo. ⁴¹ Owon ethahuo no oholong, owon ethahuo no oyefa, nabo ethahuo no ohiliefi, acha ikela ohiliep tho lobo ohiliep de ethahuo. ⁴² Ahani dang de ebuhuna no ohoyak. omuyak aning nedulahini, aning nabulu awang ho muyak. ⁴³ Awang idulahini tha nayu, ethadothuni di thahuyo. Idulahini tha ajonan, ethadothuni do ohobie. ⁴⁴ Idulahini iring ahuan ahani, ethadothuni iring ahuan no ohoile. Ara owon ahuan ahani, owon dang ahuan no ohoile. ⁴⁵ Egero dang, "Othulo lechak aleyori Adam awon ara ohoile le suka." Adam la aholu awon ara ohoile le sario esu. ⁴⁶ Ti kaang ohoile oyindu ahithemi ti aning ne tehu ithai, dia hathi asang hawon ara ohoile. ⁴⁷ Othulole eteri inyong ara la ahap, le huhumie tha aboro.Othulo eterehe oindu tho hide. ⁴⁸ Iring le huhumie tha aboro, own dang homok hehuhumie tha aboro, Karik iring no othulo lo tho hide, owon dang homok tho hide. ⁴⁹ Iring na yisunerek ohothai da arijori no othulo le huhumuni tha aboro, iwon ohothai de dang ha arijori no othulo lo tho hide. ⁵⁰ Thene ajo nang ahana, olarok ha ahanerok, ahuan ha ahothing awang ho oruthahini ahabuore no Ojk; dia orutha aning nawang ho omuyak aning namuyak. ⁵¹ Otiha! Anyahi nang dothai hadiri: Awang ohothai iyee bokolong, ti iloitho ohothai de bokolong. ⁵² Iloitho ohothai de do omiru lomutha, da amuthahina na ahonyek tibai do oburuji la aholu. Acha ohutha de oburuji, ara ohoyak ethadothuni iring ha kabong omuyak, ara ohothai eloitho. ⁵³ Acha hamuyak hune thesak awangan na amuyahi, ara ahuandek hayee hune esarahini dihuan awangan na ayee. ⁵⁴ Ti ara hamuyak hune hesak hawang ho omuyak, ara hayee esahini hawang ho oyee, arijoro do ochame legero, athuhi adiloro ayee tha abahio thono ometononi." ⁵⁵ "Ayee, naja engere nahoi? Ayee, nanja angorio nahoi?" ⁵⁶ Angorio na aye inyong eyau, araakolon ne eyau inyong omanyitha. ⁵⁷ Ti humo do Ojok, lesak ohothai di ngatere omerok tho lo Lamolo Yesu Kristo! ⁵⁸ Ahani ithai halalalai ha nanahani, isukazi ara nako, ha awang heruk ehuthohina, juui egemathi egema no Lamolo, acha ithai ijan egema nathai da Lamolo awang ho okar.