¹ Itembele lyakwa Dafiti. Kuchini, bayawe, neku ngasuka nemo, pakuchi nji pengele neku kalilwa. ² Nkingilileni nemo, pakuchi nji wakishinka; balesa bangi, efyalabilo mubomfi wenu uuli nekuketekela muli mwebo. ³ Beni ne nkumbu kuli nemo, shikulu, paku ndalila kuli mwebo akasuba konse. ⁴ Pangeni umubomfi wenu ukusekela, pakuchi kuli mwebo, shikulu, naimyomweo wangi peulu. ⁵ Mwebo, shikulu, muliweme, kabili muli liteyenye ukufitulukila, mulikalilile mu nkumbu shakutemwa kuli babo bonse abalila kuli mwebo. ⁶ Bayawe, kuchikeni kukutebela kwangi; umfweni ishiwi lya kusasa kwangi. ⁷ Mukasuba kafya kukatasha fyangi ndeta pali mwebo, pakuchi mulangasuka. ⁸ Takulipo nangu umo uumyesakanyapo na mwebo muli balesa, shikulu, tapalipo ifikitwa kochoi fikitwa fyenu. ⁹ Imikoka shonse ishi mupangile shikali kwisa nekufukama kuli mwebo, shikulu. Bakakinjike shina lyenu. ¹⁰ Pakuchi mwebo muli bakulu kabili mulakite fintu ifya kuchi ubune; mwenka emwe balesa balesa. ¹¹ Nsanbilisheni nshila shenu, bashikulu. Kabili nkenda muli bukishika bwenu. Kwatakanyeni umuchima wangi pakuchi nkalikumitoteni mwebo. ¹² Shikulu balesa bangi, nkali kuba lemyeni mwebo ne muchima wangi onse; nkali kutonte shina lyenu imyaka shonse. ¹³ Pakuchi ukulayana kwenu ukwabukishinka pali nemo; mwapokololo mweo wangi ukufuma mu kilinji kya Shelo. ¹⁴ Balesa, abalitota bangimina nemo peulu. Ibumba lyabantu ababipile balafwayo mweo wangi. Tabamyakamwa mwebo. ¹⁵ Lomba mwebo, shikulu, muli bankumbu kabili balesa ba bupe, balakokolo kufitwa, muli swile nkumbu nekutemwa ukutemwa nabukishinka. ¹⁶ Alukileni kuli nemo nekuba ne nkumbu pali nemo; paneni nkosa shenu kumubomfi wenu; pulusheni umwana umwalalume uwamubomfi wenu mwanakashi. ¹⁷ Ndangeni nemo ifya kwishibilako fya fiweme. Penka nababo aba mpachile bakakimone kabili baka bikwe munsoni pali mwebo, bayawe, mwali ngofwele ne kutekenesha nemo.