¹ Mwebayawe, tekunkalipila mubukali bwenu; mwempesha mukufitakwe. ² Pantu imifwi yenu yengnkakachila, nekuboko kwenu kungabwesha panshi. ³ Umubili wangi onse akotenda pamulandu wabukali bwenu; tamulipo butuntulu mumafupa angi pamulandu wabubi bwangi. ⁴ Pakuchi ifyakubifya fyangi fyandemena nemo: kili kipinto ikilemene kulinemo. ⁵ Ifilonda fyangi fyabola filenuka pamulandu wabubi bwangi ubutumpile. ⁶ Ndisomenwe nekubombomana ukwakuti inshiku shonse; ndaya ilinjila akasuba konse ⁷ Mulinemo, muliswile ukupya; tamulipo ubutuntulu mumubili wangi. ⁸ Nakatala ne kulela ndetenda nekusansaulwa kubi; nkolila pamulandu wakubula kwikala bwino mumuchima wangi. ⁹ Mweba shikulu, mulikwishibile bwino ukufwaya kwangi, kabili ukulilishanya kwangi takufisamikilwe kulimwebo. ¹⁰ Umuchima wangi alukulukuta, nemakosa angi, alukushimangana, amenso angi alukuya mukupofola. ¹¹ Ababangi ne fibusa fyangi bantalamuka pamulandu wamusango wangi; nebampalamine bantalumuka. ¹² Abo abafwaya umweo wangi balanteyo twando nemo.nababo abafwaya ukunsomesha balalabile amashiwi amwenga akasuba konse. ¹³ Pano nemo, njikochi muntu ushinkile amatwi kabili nshufwapo ikintu. ¹⁴ Nemo njikochi muntu uyutonfwa, kabili uyu takumbula. ¹⁵ Ikyakine ndamipembelela mwebo, bayawe; mukangasuka, shikulu balesa bangi. ¹⁶ Nalabileti nemwachi abalwani bangi bekasekela pali nemo kani ukulu kwangi kwateshimuka, bakakita ifibipile pali nemo. ¹⁷ Pantu nemo njiapepi ukupona, kabili njimukyakusomenwa sana. ¹⁸ Nalapila ukubifya kwangi; kolanguluka pabubi bwangi. ¹⁹ Nangabefyo abalwani bangi bengi; nababo abampachile ikyalukoso bengi. ²⁰ Balakichila ifibipile mufiweme mulinemo nangabefyo nebo ndalonda kulinemo. ²¹ Mwendekele nemo, mwebayawe; mwelesa wangi, mweikala ukutali ukufuma kulinemo. ²² Iseni bwangu munkwashe nemo, mwabashikulu, abakupulusha kwangi.