¹ Isamo lyakwe Dafiti. Tekwesha ukukalipa pamulandu wambifi; tekwesha ulumkumbwa kuli babo abakita ifyakubula ubulungami. ² Pakuchi bo bakoma kochi kyani kabili ne kulela kochi ninenda yafilimwa. ³ Ketekela muli ba Yawe ne kukita ifiweme; ikala mu kyalo ne kulya mukuketekela. ⁴ Filya kosangalala wenka muli ba Yawe, kabili bo bakakupela ukukabila kwa muchima obe. ⁵ Pela inshila shobe kuli ba Yawe; ketekela muli bo, kabili bo ba kakukichila ifyobe. ⁶ Bo bakalangisha ukobe ukusololola kochi kutuba kabili ukobe bakishika kochi kutuba kwakushinkamana kwa kasuba. ⁷ Ube ushikeme kuli ba Yawe kabili upembelele ne kutekanya kuli bo. Tekwesha uku kalipa nga umo fyamuwamina mulifyo ye akita, nangu lilya ye akita ifibi mumalangulushi. ⁸ Tekwesha ukufitwa kabili tekwesha ukuleka. Tekwesha ukusakamikwa. Ifi filalenga ukuba mufyakukatasha. ⁹ Imbifi mumikichile bakabaputulako, Sombi abo pempelela kuli ba Yawe ebakapyana ikyalo. ¹⁰ Mukapindi lukoso ye imbifi umuntu tayakabeko; ukalukukeba apo pankende yakwe, pano kusanga ye talipo. ¹¹ Sombi abakatekanya ebakapyana ikyalo kabili bakalukutemwa mukufula kwa fyabunoshi. ¹² Imbifi umuntu ilanshika ukumubukila umulungami kabili yo ilashentelesha ameno mukumonaula uyo. ¹³ Bashikulu balamuseka uyo, pakuchi bo balamona achi ubushiku bwakwe ye uyo bulukwisa. ¹⁴ Imbbifi shabula nokufumya impoko itile kubili bo bapeta nebuta bwa muketo nokubafumwamo abamanikilwe naba bushishe mukwipaya abalungami. ¹⁵ Impoko uyo itwile kalili ikapula mumichima yabo, kabili nemiketo yabo ikonaika. ¹⁶ Kilweme pafinini ifyo umulungeme alinafyo ukukila pafingi ifyo abengi bakwete. ¹⁷ Pakuchi amaboko ya bantu imbifi yakaba no kumokaulwa, pano ba Yawe balaba nekubofwako abantu abalungeme. ¹⁸ Ba Yawe balamona pali babo abakubuka akabi pakasuba na pakasuba, kabili nefyabupyani fyabo fikaba fya lyonse. ¹⁹ Tabakabepo nensoni mupindi ibipile. Nelyo ikipowe kikesa, bakaba nefyakulya ifingi. ²⁰ Sombiimbifi bakonaika, Ablwani ba Yawe bakaba kochi ukuemba kwa mulemfwe; bakaliwa kabili bakashimangana mukyushi. ²¹ Imbifi ingakongola sombi taibwesha mukulipila, sombi uyo umuntu ulungeme ilikakulukile kabili alapela. ²² Abo abapalilwe kuli ba Lesa bo bakapyana ikyalo; abo abafingelwe kuli bo bakaputulwako. ²³ Intampulo sha muntu shili kalishiwe naba Yawe, umuntu uyo inshila shakwe ishiweme pamenso aba Lesa. ²⁴ Nangu ye nga alituntula, ye takaponepo panshi, pakuchi ba Yawe balamwikata ye nekuboko kwabo. ²⁵ Nali mwanike kabili pano nakula; nshingo monapo umuntu umulungami uyo balekelela nangu abana bakwe baluku lomba ifyakulya. ²⁶ Akasuba konse ye ali uwa uluse ne kofwako, kabili abana bakwe balaba ipalo. ²⁷ Ube nekumako kufibi kabili nekukita ifilungeme; kabili ukaba bakwe ukingililwe umuyayaya. ²⁸ Pakuchi ba Yawe bo balitemenwe ukusolola kabili tabalekelela bafya abaketekelwe ababo. Balasungwa umuyayaya kabili ne bana bambifi bakabaputulako. ²⁹ Abalungeme bakapyana ikyalo kabili bakekala mulya umuyayaya. ³⁰ Akanwa kamuntu umulungeme ko kalalabila ifyamono kabili nekufusha ukusololola. ³¹ Ifunde lyaba Lesa bakwe lili mumuchima wakwe; inkasa shakwe techi shiteshimuke. ³² Umuntu imbifi ilamone kumuntu ulungeme nokufwailisha ukumwipaya. ³³ Ba Yawe tabakamulekelesha uyo mumaboko ya mbifi nangu ukumufwisha anga apingulwa. ³⁴ Pempelela kuli ba Yawe nekulama inshila shabo, kabili bo bakakusuntula mukupoka ikyalo. Ukabona ili imbifi shikaba nekutulwako. ³⁵ Njimwenpo imbifi kabili nabantu abakuchina ne mwenso ukutanda kochi kichi ikitontwele mwiloba umo kimenene. ³⁶ Kabili ili napichileko pampindi imbi, ye talipo. Nalimufwaile ena, kabili ye tabele nekuboneka. ³⁷ Umubone umuntu uyo uulikinjikile, kabili upele akeshibilo abakulungama; kuli ubwikalo ubuweme kuntangile ya muntu uwa mutende. ³⁸ Imbifi shikaba nokunaulwa shonse; intangile ya muntu wakubifya yo yaputulwa. ³⁹ Ukupuluka kwa balungeme kalafuma kuli ba Yawe; bo balabakikila abo mupinji yafyakukatasha. ⁴⁰ Ba Yawe balabofwako abo nekubapokololola abo. Bo nekubapokolola abo kubantu imbifi kabili balapulusha abo pakuchi abo balifiseme muli bo.