¹ Salamo wa malumbo wakwa Davifi. Nkamilemya mwebo ba Lesa bangi, mwemfumu; nkapala ishina lyenu umuyayaya. ² Kila kasuba nkamipala mwebo; nkalumbanya ishina lyenu umuyayaya. ³ Ba Yawe bakulu kabili eba kulumbanya apakulu; ubukulu bwabo tali bwakupampanta. ⁴ Inkulo imo ikalumbanya imilimo yenu kuli limbi ne kukyeba ifikitwa fyenu ifikulu. ⁵ Nkalanguluka pafya buleme ubwa bukulu bwenu napa milimo yenu iya kupapusha. ⁶ Bakalabila pa makosa amilimo yabo ikindeme, kabili nkabeba ubukulu bwenu. ⁷ Bakabeba ubwingi bwa kuwama kwenu, kabili bakemba pa bulungami bwenu. ⁸ Ba Yawe ebapela kabili bankumbu, ukukokola ukufitwa kabili bakulu mu kutemwa ukwakuchi. ⁹ Ba Yawe baweme kuli bonse; Inkumbu shabo ishinakile shili pa milimo yabo yonse. ¹⁰ Fyonse mwapangile fikapela ukulita kuli mwebo, ba Yawe; abakishinka benu bakamipala mwebo. ¹¹ Bakalabila pa buleme bwa bfumu bwenu, kabili bakabeba pa makosa enu. ¹² Bakabeshibisha abantu pa bukulu bwa fikitwa fyaba Lesa kabili ne bulemeshi bwakuwama kwa bufumu bwabo. ¹³ Ubufumu bwenu ebufumu bwa muyayaya, na bushikulu bwenu bukaleyafye pa nkulo shonse. Ba Yawe balakwachilila balya bonse abalepona nekubenuna bonse abainama.