Isamo lyakwa Dafiti. ¹ Umfweni kwi tembelo lyangi, Ba Yawe; kuchikeni kukupapata kwangi. Pamulandu wa bukine bwenu kabili ne bulungami, ngasukeni! ² Mwingila mu bupingushi na kalume wenu, pakuchi mu menso enu takulipo uulungeme. ³ Umulwani akonka umweowangi; amafumpaula na panshi; alenga nemo ukwikala umuichile kwachi ni balya abafwile akale. ⁴ Umupashi wangi alukuta muli nemo; umuchima wangi apelelwe. ⁵ Naibukisha inshiku yakale; ndalanguluka pafikitwa fyenu fyonse; ndalanguluka pa fyo mwafikilishe. ⁶ Natambika amaboko angi kuli mwebo; umweo wangi alaba ne kilaka pali mwebo mu kyalo umushili amenshi. ⁷ Ngasukeni bwangu, Ba Yawe, mulandu umupashi wangi wapungila. Mwifisa ikinso kyenu kuli nemo, unga yoo nakuba kwachi ni balya panshi mu kilinji. ⁸ Lekeni ulukelo ngufwe ku lulayano lwenu ulwa kine, pakuchi naketekela muli mwebo. Ndangeni inshila umo fwile naenda, pakuchi naimya umweo wangi kuli mwebo. ⁹ Mpususheni kubalwani bangi, Ba Yawe; nabutukila kuli mwebo mu kufisama. ¹⁰ Nsambilisheni ukukita ubufwayo bwenu, pakuchi muli Ba Lesa wangi. Lekeni umupashi wenu uuweme antangilile mu kyalo kya bulungami. ¹¹ Ba Yawe, kwi shina lyenu, nsungeni umumi; mu bulungami bwenu fumyeni umweo wangi mu makatasho. ¹² Mu lulangano lwenu ulwa kishinka bakeseniko abalwani bangi kabili ne kongula abalwani babumi bwangi bonse, pakuchi ni nemo kalume wenu.