¹ Umfwa, Isuleli; ulipabwipi nokwabuka kwishilya lya Yodani lelo, ukuya mukupokolola ifyalo ifikulu kabili ifya makosa ukukila mwebo, kabili imshi ishikulu kabili isha malinga ukufika na mwiulu, ² abantu abakulu kabili abatali, abana abalalume abena Anakimu, abo mwishibile, kabili abo mumfwilepo abantu bakalabilapo ati, ''Nibani abenge imakana ku menso abana bakwa Anaki? ³ Wishibe lelo ati ba Yawe ba Lesa wenu ebamitangilila kwati mulilo uokyañana; akabonaula bo,kabili akabapwisha pa menso obe; Kanshi ukabafumyako nokubalengo konaika bwangu, kwati fyopelefyo ba Yawe balabile kuli webo. ⁴ Wilabila mu mutima obe ati, panuma ba Yawe ba Lesa obe babatamfya ukufuma pa menso obe, 'kyali nipa mulandu wabololoke bwangi ekyalenga ba Yawe bandete nemo mukupokeki kyalo,' kyali nipa mulandu wakulufyanya kwaifi fyalo ekyalenga ba Yawe babafumyemo ukufuma pa menso obe, ⁵ Tepa mulandu wabololoke bobe nangu kulungama kwa mutima obe ati ekyo walapokela impanga yabo, Lomba nipa mulandu wakulufyanya kwaifi fyalo ati Lesa obe alebafumyamo ukufuma pa menso obe, kabili pakwebati alengo kuba ilyakine ishiwi ili alaile kufikolwe fyenu, kuli Abulamu, Isaki na Yakobi. ⁶ Isiba kanshi ukwebati, ba Yawe ba Lesa wenu tabalemipeleki kyalo ukukipoka pa mulandu wabololoke bwenu,pakuti mwebo muli bantu abomine mikoshi. ⁷ Mwibukishe kabili mwelubamo ifyo mwa bafitwishe ba Yawe ba Lesa wenu ubukali mu mpanga; ukufuma akasuba mwashile ikyalo kya Ijipiti ukufika nefyo mwaishile kuli ino mpunsha, mwalya bapondoshi kuli ba Yawe. ⁸ Kabili napa Holebu mwali bafitwishe ba Yawe ubukali, kabili ba Yawe balifichilwe apakulu makosa ukwa kumitwaleni kukumyonaula mwebo. ⁹ Ilyo naile kulupili mukupoka alya mabwe aapapakene, aapapakene aakipangano ikyo ba Yawe bapangile na mwebo, Nalikele pa lupili pa nshiku amakumi ane akasuba no bushiku; nshalilepo ikyakulya nangu ukunwa menshi. ¹⁰ Ba Yawe balimpele amabwe abili aapapakene anembelwepo no munwe wakwe; palio palinembelwe fyonse kwati mashiwi onse ao ba Yawe babilikishe kuli mwebo kulupili ukufuma mukachi ka mulilo pa bushiku bwaku bungana. ¹¹ Kyalimonekele pakupwa kwa shilya nshiku amakumi ane akasuba nobushiku ba Yawe balimpele amabwe abili aapapakene, amabwe akipangano. ¹² Ba Yawe balilabile kuli nemo, 'Ima, kuukuluka bwangu ukufuma kuno, pakuti abantu bobe, abo wafumishe mu Ijipiti, balibifya abene. Bafumamo bwangu munshila iyo nabakambishe. Balipangile abene lukilubi uwakusungulula.' ¹³ Kabili, ba Yawe balilabile kuli nemo ati, 'nabamona aba bantu; bantu abashinchile. ¹⁴ Ndeke, pakwebati mbonaune nokushimañanye shina lyabo pano panshi, kabili nkapanga webo ukuba umukoka ukosele kabili no bukulu ukubakila.' ¹⁵ Penka nalikile panshi ukufuma palupili, kabili no lupili lwalukwaka. Amabwe abili apapakene ali mu maboko angi. ¹⁶ Naliloleshe, kabili moneni, mwalibalengele umulandu ba Yawe ba Lesa wenu. Mwalilipangilile mwebene umwana wa ñombe uwakusungulla. Mwalifuminemo bwangu munshila ba Yawe bamikambishisheni mwebo. ¹⁷ Nalitolele amabwe abili apapakene nokuaposa ukufuma mu maboko angi. Naliatobele ku menso enu. ¹⁸ Kabili nalifuneme libili ku menso aba Yawe pa nshiku amakumi ane akasuba no bushiku; nshalilepo ikyakulya nangu kunwa menshi, pa mulandu wa bubi bonse ubo mwakichile, mukukitekyo ikibipile mu menso aba Yawe, mukubakolomona ku bukali bwabo. ¹⁹ Kabili nalikwete umwenso wabukali kabili nokufitwa ukukulu uko ba Yawe bafichilwe makosa ukwa kumyonauneni mwebo. Lomba ba Yawe balyumfwile nakuli nemo pali ilya mpindi. ²⁰ Ba Yawe balimufichililwe Aloni ikikulu makosa ikyakufwaya nokumonauna; Nalimupepelileko naye Aloni pampindi yenka imo. ²¹ Nalitolele ububi bwenu, ulyo mwana wa ñombe mwapangile, nokukyokya mu mulilo, ukukitobaula, nokukifikina mutunini tunini, ukufika nefyo kyapangikile ulukungu. Naliposele ulukungu lwakiko munikaiyo iyafumine mu lupili. ²² Pa Tabela, pa Masa, kabili na pa Kibulofi Hatava, mwalibakolomwene ba Yawe kubukali bwabo ubukulu. ²³ Ili ba Yawe ba mitumine ukufuma ku Kadeshi Baneya nokulabila ati, 'Kabiyeni nokupinta ubupyani bwa kyalo ikyo namipela,' penka mwalipondokele kwi funde lya ba Yawe ba Lesa wenu, kabili tamwasumine nangu kumfwa kwishiwi lyabo. ²⁴ mwabafye abakupondoka pondoka ukufuma kuli ba Yawe ukufuma ubushiku ubo namishibile. ²⁵ Kanshi nalifuneme ku menso aba Yawe shilya nshiku amakumi ane akasuba no bushiku, pantu balilabile ati balinokumyo nauleni. ²⁶ Nalipepele kuli ba Yawe nokulabila ati, 'mweba kapa ba Yawe, mwebo naula abantu benu neli bupyuni bwenu ubo mwakulile ukupichila mubukulu bwenu, ubo mwafumya mu Ijipiti nokuboko kwenu ukukosele. ²⁷ Mwibukishe ababomfi benu ba Abulamu, Isaki, kabili na Yakobi; mwikeba kukukosa kwa mitima ya aba bantu, neli kububi bwabo, nangu ku mulandu wabo, ²⁸ Pakwebati ati ikyalo uko mwatufumishe balabile ati, ''Pantu ba Yawe tababaletele mu kyalo ikyo babalaile, kabili pantu balibapachile, babafumyamo pakwebati bese babepaile mu kiselebwa.'' ²⁹ Lomba bo bantu benu kabili bupyani bwenu, ubo mwafumishemo ku makosa enu aakulu kabili nakukuboko kwenu ukutanikilwe.'