¹ Ukalikulama amafunde onse eonde kupela lelo, pakwebati mukekale ne kufyalulula, nekuya mukupoka ikyalo kilya ba Yawe balaile kuli bawishinwe. ² Muketa mukwanuka inshila shonse isho ba Yawe Lesa wenu bamilungulwile palishi imyaka amakumi na ane mukiselebwa, pakwebati bali akamikefye mwebo, mukumyesha mwebo mukwishiba ifyali mumichima yenu, pakwebati kani mukalame imikambisho yakwe nangu yo-o. ³ Alimikefyishe, ne kumilenga ukuba nensala, ne kumilisha na nama ifi tamwaishiile kabili ifyo bawishinwe tabaishibile. Alikitile ifyo pakwebati mwebo mwishibe ukwebati tekuli ba shinkwa lukoso eko abantu bekalila; nangu wati, niku mashiwi onse aafuma mukanwa ka ba Yawe eko abantu bekalila. ⁴ Ifya kufwala fyenu tafya onaikile nokufuma kuli mwebo, namolu enu tafimbile muli shilya myaka amakumi ane. ⁵ Mukali kulanguluka mu mitima yenu, kwati,koti ifi umuntu akambula umwana wakwe umwalalume efyo ba Yawe ba Lesa wenu bamikambula. ⁶ Mukali kulama imikambisho shaba yawe ba Lesa wenu, pakwebai mukende munshila shakwe nokumupela ubuleme. ⁷ Pakuti ba Yawe ba Lesa wenu balemileta mu kyalo ikiweme, ikyalo ikifulishe amenshi ne tuntupuntupa twa menshi, utwitulwila mumikolo namu fyulu; ⁸ Ikyalo umwali wichi ne mbale, ne fichi ifingi ifyaleikala ifisepo imikuyu, na pomagranate; ikyalo ikya kichi fya Olife ne buki. ⁹ Iki kikaba kyalo umo tamwakabe ukulya shinkwa nubukyushi kabili emo tamwakabukilwe ifili fyonse; iki ekyalo mwali amabwe aapangilwe ne fyela kabili ukufuma mulishi mpili emo mukasepe umukuba. ¹⁰ Mukali kulya nekwikala, kabili mukabapala ba Yawe ba Lesa wenu pampunsha iiweme eyo amipela mwebo. ¹¹ Kengeleni pakwebati tamubalutileko ba Yawe ba Lesa wenu, pakufilwa ukulama imikambisho ne mishilo kabili na mafunde ayo ndekukambisha lelo. ¹² Nangu fyenkefyo, ii mukali kulya ne kwikala kabili mukatunge amananda aweme ne kwikalamo, imitima yenu shikemishiwa peulu. ¹³ Kengeleni elyo amatanga enu ne mukoko shika fyalulula ili Siliva wenu na Golide fikafula, fyonse efyo muli nafyo fikafula. ¹⁴ Penka imitima yenu ikemishiwa peulu no kulumbako kuli ba Yawe ba Lea wenu, abo abamifumisheni mu kyalo kya Ijipiti, ukufuma munanda ya busha. ¹⁵ Mwika mulubako uyo uwamitangilileni ukupita mu mpanga iikulu ilengele ne mwenso, umwali imilolo uluminye kabili inkende emo tamwali amenshi, uwamiletele amenshi mwibwe ilikosele. ¹⁶ Ali milishishe numpanga na mana iya ifikolwe fyenu tafyaishibile, pakwebati bakamikefye ne ku myeseka mwebo, nekumikilila ifiweme kumpelo, ¹⁷ kabili kuli mwalabila ku mitima yenu ati, mwenka munkosa shangi na ku makosa amaboko angi eko na mwena ubunashi bwangi. ¹⁸ Kabili muketta nekwanuka ba Yawe ba Lesa wenu, pakuti bo ebampela amakosa aakuba ne bunonshi; pakuti bengekalika ukulayana uko ukubalayile ba wishinwe kwati efyo kili lelo. ¹⁹ Kikamoneka ukwebati, kani mukalubeko kuli ba Yawe ba Lesa wenu nekuya kuli tu lesa tumbi, ukatupepa, nekutulemya mwebo, nokulabila kuli mwebo lelo ati kyakine mukonaika. ²⁰ Kwati fyalo efyo ba Yawe balikupanga ukonaula ku menso enu, na mwebo mukonaika, pamulandu wakwebati tamwanakilile ishiwi lya ba Yawe ba Lesa wenu.