¹ Pampindi ba Yawe kabalabila kuli nemo ati, 'Songa amabwe abili apapakene apalene ne atanshi, kabili wise kuli nemo peulu palupili, ukapange ne mabokoshi iya mapulanga. ² Penka nkanembapo pamabwe apapakene amashiwi ayo alipa mabwe atanshi atobekele, kabili uabike mumbokoshi. ³ Eli napangile imbokoshi yakiti kyamungasenge, nali bashile amabwe abili apapakene kochi atanshi, penka nalile peulu ya lupili, kanji ne mabwe abili apapakene mumaboko angi. ⁴ Alilembele palya ya mabwe, fyenkefi alembele pa atanshi, imishilo ikumi limo iyo ba Yawe balabile kuli mwebo pa mutumba apatali napakati ka mulilo pabushiku bwe bungano; penka ba Yawe kabapana kuli nemo.'' ⁵ Nalyalulukile, ne kwikala panshi ukufuma pa lipili, nekubika amabwe apapakene mumbbokoshi iyi napangile; mulya emo ali, fyenkefi bangebele ba Yawe.'' ⁶ ( Abena Isuleli balimine ulwendo ukufuma ku Beloti Bene Jakani nakuya ku Mosela. Kulya Aloni alifwile, kabili ba limushikile kwenka kulya: Eliasa, umwana wakwe umwalalume, alibombele inkito ya bupapatilishi mukifulo kyakwe. ⁷ Ukufuma kulya alyendele ukuya ku Gudugoda, afuma ku Gudugoda alile ku Jotabati, umushi watunika tunini utwa menshi. ⁸ Pampindi ya ba Yawe balisalile umulaka wabena Levi ukupinta imbokoshi yakulayangana kwaba Yawe, ikemakane ku menso aba Yawe nekubabombela, kabili nekubashukisha abantu mwishina, fyenkefi kili na lelo. ⁹ Penka Levi takwetepo ulubali neli ubwikashi ubwa mushili nebalongo bakwe; Ba Yawe ekyakwe ikyakwikalamo, koti nifyenkefyo ba Yawe balabile kuli ye. ¹⁰ Kabili nalikele pamutumba koti nifyenkefi kyali pakutanga inshiku amakumi ane isha kasuba ne sha makumi ane abushiku. Kabili ba Yawe balofya kuli nemo pali ilya mpindi, ba Yawe taba langulukilepo ukukonaula webo. ¹¹ Ba Yawe kabalabila kuli nemo ati, ima koya kunuma ya bantu mukuba tangilila mulwendo lwabo; bakaya mukwingila ne kupoka umushili uyoo uwali kilayo ku fikolwe fyabo ukubapela bo. ¹² Pano, Isuleli, ninsa kinta ba Yawe Lesa balefwaya kuli webo? Kani lukoso ukutina ba Yawe Lesa obe, nekwenda munshila shakwe shonse mukumutemwa namukuba popwela ba Yawe Lesa obe nemutima obe ne nemweo obe onse, ¹³ Mukulama imishilo yaba Yawe, nemalamuno, aya nde myebeni lelo pafiweme fyobe? ¹⁴ Bona, kuli ba Yawe Lesa ba Lesa aba mwiulu ne ulu ilya meulu, ne mushili nefintu fyonse ifi limo. ¹⁵ Penka ba Yawe eba kwete nsambu muli bawishinwe isha kubatemwa bo. Penka kamisala mwebo ukuba kakolwe, ukufuma pali bo, ukukila pali onse umuntu, kochi nifi akita lelo. ¹⁶ Penka usembulule inkanda ya kumutima obe, kabili nangu kukosesha imikoshi yenu. ¹⁷ Pakuti ba Yawe Lesa, ni Lesa waba tu lesa baShikulu ba baShikulu, ba Lesa abakulu, aba maka onse abakuchina kuli onse, abo tabakwete akapatulula nangu kupoka ifya mafisakanwa. ¹⁸ Kabili ye alifutile imilandu yabalya abatabakwete bawishibo naba mukamfwilwa, kabili alalangisha ubutemwe kubekala fyalo pakumupela ifya kulya ne fya kufwala. ¹⁹ Kabili temweni abekala fyalo; pakuti na mwebo mwali beni mukyalo kya Ijipiti. ²⁰ Ukalukutina ba Yawe Lesa obe; uyu ukalukopopwela, kuliye eko ilingile ukulamatila, kabili na mwishina lyakwe emo ukalukulapila? ²¹ Ye kya kutotela kyobe, kabili ni Lesa obe, uyo uwakita ifintu ifikulu ifyobe ne fyakintinya, ifyo amenso obe amwene. ²² Bawishinwe kabaya mu Injipiti abantu amakumi asanu na abili, penka ba Yawe Lesa wenu bamifusheni koti tubangabanga twamwiulu.