¹ Fyenkefyo mukali kutemwa ba Yawe ba Lesa ne kusunge mpindi yonse ifibakali kumikambisha, imilaye ne fitongwelwe, ne kukambisha kwabo. ² Ikyakwishibisha ati nshiko labila ku bana benu, abo aba tabeshipo nangu kumonapo ukupanika kwa ba Yawe ba Lesa benu, ubukulu bwabo, ukuboko kwabo kwa buleme, nangu uku tanika kwa kuboko kwabo, ³ ifyo kumwenako ne fikitwa ifi bakichile mukachi ka bena Ijipiti kuli Felo, imfumu ya Ijipiti, nakuli bonse aba mu kyalo kyakwe. ⁴ Nangu kumonako ifi bakichile kuba nkondo ba mu Ijipiti, ku mbili shabo, nangu niku ngolofwana shabo, ifi apangile a menda amukishiba kya matete ukubapomo kelabo ili bali kumitanfya mwebo, nefiba Yawe babonawile ukufika na lelo, ⁵ nangu mwenepo ifi ba mikichile mwebo mumpanga nefi mwafikile kuli inwe mpunsha. ⁶ Tabamwenepo ifi ba Yawe bakichile Datani na Abilama, umwano mwalalume uwakwa Eliyaba umwana wakwa Lubeni umwalalume, nefi umushili ashinkwile akanwa kao ne kuba mina bonse shatu, ne ba munanda yabo, amatente abo, nafyonse fya mwe ifyali kubakonkela bo, mukachi ka bonse abena Isuleli. ⁷ Lomba menso enu amona shonse milimo shikulu ishi ba Yawe bakichile. ⁸ Fyenkefyo muko sunga shonse mikambisho nko mikambisha mwebo lelo, ati muko kosa, nekuya kwingila nekupoka kyalo uko ko mukoya bushilya muku kipoka, ⁹ kabili ati mwenga kokoshe nshiku shenu mukyalo iyo ba Yawe balapile kuli ba wishinwe ukupana kulibo na ku bana babo, ikyalo ikyali kwituluko mukaka na buki. ¹⁰ Pakuti ikyalo, uku mukoya kwingila ne kupoka, takili koti kyalo kya Ijipiti, uko uku mwafumine, uko mwabyele mbuto shenu ne kutapisha ne molu enu, koti libala lya bukisa; ¹¹ lomba kyalo, iki mukaya bushilya mukupoka, kyalo kya mpili ne fimbachiko, kabili mukanwa menda akumfula ya mwiulu, ¹² ikyalo ba Yawe ba Lesa benu balamine; amenso aba Yawe ba Lesa benu lyonse ali pali kikyo, kufuma ku kutatula kwa mwaka ukufika na kukupwa kwa mwaka. ¹³ Kikakichika, kani mwa umwisha ne kukuchikisha ku kukambisha kwangi uko nko mikambisha mwebo lelo, ukutema ba Yawe ba Lesa benu nekuba bombela ne mutima obe onse kabili ne mweo obe onse, ¹⁴ nkapane mfula ya mu kyalo kyobe mumpindi yayo, imfula yaliko ne ikekalako, ati mukali kunowa kalyi keni, imfaina yenu iya bukumo, ne mafuta enu. ¹⁵ Nkamipele fyani mumalimi enu ifya ngombe shenu, kabili mulya ne kwikuta. ¹⁶ Poseniko amano kuli mwebene ukwebati imitima shenu tashi tumpaikilwe, nekwalukila luba lumbi ne kutota ba Lesa bambi nekuba fukamina bo; ¹⁷ ukwebati ubukali bwa ba Yawe tabumiponene; kabili nekwebati taba shikile ameulu ukwebati takukelapo mfula, kabili umushili ati ukabule ukumeneshapo akalyo ne kwebati monaike bwanga mukubulo kufumya mu kyalo ikiweme ikyo ba Yawe bakomipela mwebo. ¹⁸ Fyenkefyo sunga aya mashi angi mutima obe na mu mweo, uakakile pa kuboko kobe koti kya kumwenako, kabili lekeni fibe koti kya pantanshi pakachika menso obe. ¹⁹ Ukabafunjishe abana bobe nekulabilapo pali fyo ili ukekala munanda yobe, pakwenda mu nshila, pakulala panshi, na pa kubuka. ²⁰ Ukafilembe peulu ya mulyango wa nanda yobe na pa milyango ya mushi obe, ²¹ ukwebati inshiku shobe ne nshiku sha bana bobe shikafule mu kyalo iki ba Yawe balapile ku fikolwe fyenu ukubapela koti mwenka mwikalile ameulu peulu ya kyalo. ²² Lomba kani mwasuminina ukulama onse aya amafunde namikambisho mwebo, ati muko akita, ukutemwa ba Yawe ba Lesa benu, nekwenda monse munshila shabo, ne kukosela kulibo, ²³ penka ba Yawe bakafumyamo fyonse fi fyalo ili tamungesa, kabili mukapokolola fyalo ifikulu kabili ifili ne buleme uku mikila mwebene. ²⁴ Pa mpunsha ponse apo akashishilo ka kulu kwenu kaka nyantu ikaba yenu; ukufuma mumpanga naku Lebanoni, ukufuma ku nika, inikaya Efuleta, naku kishiba kya ku mbonshi enka ba mupaka wenu. ²⁵ Takulipo mwalalume akamimakanina webo. Ba Yawe ba Lesa benu bakanshiko mwenso waku michina neba ku myakamwa mwebo monse mu kyalo muka nyanta, koti ifi balabile kuli mwebo ²⁶ Bona, naimika ku menso obe lelo ishuko ne fingo: ²⁷ ishuko, kani wakatalila amafunde aba Yawe ba Lesa bobe ifi na kukambisha lelo, ²⁸ nefingo, kani ne kukatalila amafunde aba Yawe ba Lesa bobe, nekwalukila munshila iyi na kufundilamo lelo, nekuya kuli ba Lesa bambi abo tamwishibile ²⁹ Fikakichika, ili ba Yawe ba Lesa benu bamileta mwebo mu kyalo iki mukoya mukupoka, ili mu kemika ishiko pa lupili lwa Gilizima, nefingo pa lupili lwa Ebo. ³⁰ Tabali kunshi ya Yodano, kumboshi ya kunshila ya kumboshi lubali, mu kyalo kya bena Kenana abekala mu Alaba, kubushilya bwa Giligala, kulubali lwa mbokoshi ya Mola? ³¹ Pakuchi mwebo mukabuke bushilya bwa Yodano mukuya mukupoke kyalo iki ba Yawe ba Lesa benu bakomipela mwebo, mukapoka nekwikalamo. ³² Mukali kusunga shonse milaye nemalamuna ayo naimika kuli mwebo lelo.