¹ Aya emafunde emishilo iikalikilwe iyo mukasunga mu kyalo ikyo ba Yawe ba Lesa ba bawishinwe, bamipela ukwikalamo, ishiku shonse isho mukekale pa kyalo. ² Kinekine mukonaula ikende shonse isho abantu abo mukatafya bali kukinjika ba Lesa wabo, palya peulu sha mpili, na peulu ya mpili shinini, kabili na munshi ya kichi kyonse. ³ Mukatobaule ifyonto fyabo, ukusansaula mutupifwa tunini impanda shabo isha mabwe, kabili mukokye na mashiki abo akupandawilako, kabili mukatemaule ifibumbwa-bumbwa ifya ba lesa wabo kabili mukonaule ishina lyabo muli ilya nkende. ⁴ Pano tamwakalukukinjika ba Yawe ba Lesa wenu muli iyo shila. ⁵ Pano kani kulya ku nkende ilya ba Yawe ba Lesa wenu ba ka salulula mukachi ka mitundu yenu yonse ukubikapo ishina lyakwe, iyo ikekala ni nkende uko akalukwikala, kabili eko mwebo mukaya. ⁶ Kabili eko mukatwala imilandu yenu iya kokya, ne milandu yenu iya kwipaya, ne fyekumi kabili ne mulambu yakusuntula, umulambu wakulapa, umulambu wakukakuluka mu milanguluko, kabili ababeli ba ngombe shenu ne mbelele shenu. ⁷ Nikwenkoko eko mukalukulila pa menso ya ba Yawe ba Lesa wenu kabili mu kasangalala pali fyonse ifyo naba mu mananda yenu, uko ba Yawe ba Lesa wenu bakamishukisha. ⁸ Tamwakuli kukita ifintu fyonse ifyo tulekita pano lelo; pano onse alekita fyonse ifiweme ku menso akwe; ⁹ pakuti tamunga fika mukutusha, kubuswani ubo ba Yawe ba Lesa wenu balemipeleni. ¹⁰ Pano elyo mukabuka inika ya Yodano kabili nokwikala muli kilya ikyalo ikya ba Yaawe ba Lesa wenu bakamilengela ukuswana, kabili bakamipeleni ukutusha ukufuma ku balwani benu abamiishingulukile, pakwebati mukekale mu mutende. ¹¹ Elyo kukekala inkende iyo ba Yawe ba Lesa wenu ba kasalulula ukulengela ishina lyakwe ukwikala kulya - kulya mukaleta fyonse ifyo kamikambisha mwebo: imilambu yakokya, imilambu yakwipaya ifye kumi, kabili ne milambu ya kusuntula, kabili umulambu wakulapa, uyo umukalapa kuli ba Yawe. ¹² Mukalukusangalala pa menso aba Yawe ba Lesa wenu - mwebo, abana benu abalalume, abana benu abanakashi, ankito abalalume abankito abanakashi kabili na bena Levi abali mukati kenu, umulandu tabakwete ikya kwabanako nangu ubuswani muli mwebo. ¹³ Mukakengele ukuchina ati mukalambule umulambu wakokya apo pa nkende iyo mwamona; ¹⁴ pano nipali iyo nkende apo ba Yawe bakasala mukati kenu umo uwa mitundu wenu eko mukalu kulambwila imilambu yakokya, kabili kulya mukalukukita fyonse ifyo kamikambisha mwebo. ¹⁵ Nangu, nifyo mukalu kwipaya kabili inama shonse isho musunga, mu mishi yenu mwenka umwilile umutima obe, ukupokelela ukushukwa kwa ba Yawe ba Lesa wenu pali fyonse ifyo bamipeleni abulile ukutuba naba tubile abantu bonse kuti balyako, fyenka ifi balya lumpala na sebula. ¹⁶ Pano tekwesha ukulya umulopa; mukawichile panshi pa mushili kwati menshi ¹⁷ Tekwesha ukulya mukachi ka mishi yenu filya ifye kumi ifya pakalyo kaseke kenu, ifaini ya bukumo yenu, naifya mu mafuta enu nangu ababeli ba ngombe shenu; na ba mbelele shenu ne mbushi shenu kabili tekwesha ukulya inama isha mulambu wa kwipaya pamo ne milambu ya kulapa iyo mukapana, nangu umulambu wakukakuluka nangu umulambu wakusuntula. ¹⁸ Pano, mukafilila pa menso ya ba Yawe ba Lesa wenu mukende iyo ba Yawe ba Lesa benu ba kasalulula - mwebo, abankito benu abalalume, abankito benu abanakashi kabili na bena Levi mukati ya meshi yenu; mukasekela ku menso ya ba Yawe ba Lesa wenu pali fyose fyonse ifimukita. ¹⁹ Kamulu kukengela ishita yonse iyi mukalukwikala mukyalo kyenu ukuchina ukubalubako balya abena Levi. ²⁰ Elyo ba Yawe ba Lesa wenu bakakusha imipaka yenu, fyenka bamilaile mwebo, kabili mukalabila ati, ''Ndelya inama, umulandu wa lukasha, mukalya inama, fyenka fikafwaya umweo wenu. ²¹ Kani uko kunkende ba Yawe ba Lesa wenu basala ukubika ishila lyabo kakutalimpa na mwebo, pano nishi mukepaya ingombe ne mbelele shenu isho ba Lesa ba mipele, fyenka fikafwaya imyeo yenu. ²² Fyenka mulya balupala naba Sebula, efyo mukabalya; abakubula ukutuba na batubile ebakalyako. ²³ Pano mukengele mwikalyapo pamulopa, pantu umulopa ebumi; mwikalya ubumi ne nama. ²⁴ Mwikalya yo-oo; mukechile panshi kwati menshi. ²⁵ Mwikalya yo-oo, pakwebati mukamone ifiweme, kabili na bana benu abakesa panuma yenu, elyo mukakita ifyo lokele ku menso ya ba Yawe. ²⁶ Lomba ifintu fyonse ifyakulubali lwa ba Yawe ifyo muli nafyo kabili nefyamabupe ifya kulapa - mukufibule kabili nakuya kupusha ba Yawe bakasala. ²⁷ Kulya mukapane umulambu wakokya, Inama nomulopa, pakyonto kyaba Yawe Lesa wenu; umulopa wenu amulambu bakamwitela pambali yakya kokyalapo kya ba Yawe Lesa wenu, kabili mukalya inama. ²⁸ Posako amano no kulanguluka pali aya mashiwi ayo nakukambisha webo, nemo ati mukalu kumona ifiweme mwebo kabili na bana benu bakalukwisa panuma yenu imyaka yonse, nga mwakita ifiweme pa menso yaba Yawe ba Lesa wenu. ²⁹ Elyo ba Yawe ba Lesa wenu bakayonaula ku menso yenu mikoka ya bantu, iyo mwafwaya ukupokolola ifyalo fyabo pa kwingilamo, ³⁰ kengeleni ukuchina ukukwatwa mukakose ka kubakonkela, pakupwisha ukubonaula pa mensa enu - ukufuma mukakose ka kwishiba ba lesa babo, nokwipusha ati, ''Kanshi iyi mikoka balukulemya shani ba Lesa wabo? Kokita fyenka fyo.'' ³¹ Mwikalu kulemya ba Yawe ba Lesa wenu muli iyo shila, pakuti fyonse filya ifi malwa malwa ifibipile ifi bapachile ba Yawe - balifikichile na ba Lesa wabo; balyokele abana babo abalalume na banakashi mulilo umulandu wa ba lesa wabo. ³² Fyonse ifyo kamikambisha mwebo, mukabikeko amano. Mwikabikako nangu ukufumyako yo-oo.