¹ Pano, Isuleli, ufwa imishilo ne mikambisho iyo komusambilisha mwebo, iya kukita, pakwebati mwikale ne kuyamo kabili ne kukipoka ikyalo ikyo ba Yawe, ba Lesa waba wishimwe, bakomipela. ² Mwika lundako ku mashiwi aokomikambisha mwebo, nangu kufumyako, pakwebati mukasunge imikambisho yaba Yawe ba Lesa wenu iyo apakomikambisha mwebo. ³ Amenso enu amona ifyo ba Yawe bakitile pamulandu wa BaliPeoli; pakuti bonse abalalume abakonkele Bali Peoli, ba Yawe ba Lesa wenu bali bonawilemo muli mwebo. ⁴ Lomba mwebo mwebalamatile kuli ba Yawe ba Lesa wenu muli bantuntulu na lelo, uuli onse pali mwebo. ⁵ Moneni, namisambilisha imishilo ne mikambisho, koti ifyo ba Yawe ba Lesa wangi bakambisha, pakuti mukakite mukati ka kyalo ikyo mukoyamo pakwebati mukipoke. ⁶ Fyenkefyo muasunge ne kuakita; pakuti aya emano enu kabili ne milangwe yenu mumenso abantu abakomfwa kulifi fyonse ifipope kabili ne kulabila, 'kyakine uyu mushobo wabantu ba mano ne kalango. ⁷ Nga nikwisa ukulipo umushobo umukulu uuli na Lesa uuli pabwipi kulibo, koti ba Yawe ba Lesa wesu bali angatwabeta? ⁸ Isa mushobo umbi umukuli uuliko uuuli ne mishi kabili ne mikambisho iilungeme koti niino mishilo kompela kutanshi yenu lelo? ⁹ Kutikishenifye ne kulilama mwebene, pakuti mwikalubako ifintu mwamwene ne menso enu, pakuti fikafuma mumitima yenu mu shinku shonse isha bumi bwenu. Mukifulo kya fifi, mukafishibishe kubana benu kabili na kubana babana benu. ¹⁰ Pabushiku mwaimakene kutanshi yaba Yawe ba Lesa wenu ku Olebi, ilyo ba Yawe balabile kuli nemo, 'Kolonganikile abantu, kabili nekulenga bomfwe amashiwi angi, pakwebati basambilile ukuntina mushinku shonse ishi bakekala pano pa kyalo kya panshi, kabili ne kubasambilisha abana babo.' ¹¹ Mwalishile pabwipi ne kwimakana munshi ya lupili. Ulupili lwa lipile ne mulilo kufika naku mutima wa mwiulu, nefishi, ikumbi kabili ne fishi iya fititi. ¹² Ba Yawe balilabile kuli mwebo kufuma mukati ka mulilo; mwalyumfwile ishiwi ne fyebo fyalyo, Lomba tamwamwenepo uwalelabila yo-o; mwalyumfwile ishiwi. ¹³ Alimibulile ululayañano lwakwe olo amikambishe mwebo ukukita, imishilo ikumi. Ali ilembele pa mabwe aasebalele abili. ¹⁴ Ba Yawe balikambishishe pali ilya pindi ukumisambilisha mwebo ifipope ne mafunde, pakuti mukalekita mu kyalo ikyo muleabukilamo ne kukipoka. ¹⁵ Kanshi iketeni mwebene - pakuti tamwamwenepo ikili kyonse pabushiku ba Yawe balabile kuli mwebo palupili lwa Olebi kufuma mukati kamulilo ¹⁶ ati mwekalikowesha mwebene kupitila mukuli bashila ikimpasha ayo ikili kyonse, ikipalene ne mwanakashi nangu mwalalume, ¹⁷ ikipalene ne nama iili yonse iya panshi, ikipalene ne fyoni fya mapipindo ifi pupuka mwiulu, ¹⁸ ikipalene ne kili kyonse ikikalaba panshi, nangu ikipalene ne sabi iilimu menshi apashi ya kyalo. ¹⁹ Mwikesha ukwimya amenso enu ne kuloleha mwiulu ne kumona kasuba, umweshi, nangu tubangabanga - na fyonse ifya mwiulu - kabili nekufitotela ne kufitemwa - ifyo ifintu ifyo ba Yawe ba Lesa wenu bapela kya kanika ku bantu bonse abekala munshi ya meulu. ²⁰ Lomba ba Yawe balimimpitile ne kumifumya mwikulilya kusungulwilamo ifyela fya kapotwe, ukufuma mu Ijipiti, ukuba kuliye nga bantu bakwe ababupyani bwakwe, koti ifyo muli lelo. ²¹ Ba Yawe balimfulilwe mulandu wa mwebo; balilapile ati tekuti nga bukebushilya bwa Yodani, kabili ati tekuti ngye ne kwingila mukyalo ikiweme, ikyalo ikyo ba Yawe ba Lesa wenu bakomipeleni koti bupyani bwenu. ²² Mukifulo kyafifi, fwile nafwa muli kiki kyalo; shifwile aabukile kwishilya ya Yodani yoo; Lomba mwebo mukabuka ne kuya mukukipoka kilya kyalo ikiweme. ²³ Kutikisheni ne kulilama mwebene, pakuti mwilubako ululayañano lwa ba Yawe ba Lesa benu, ulo bapangile na mwebo, ne kuli bashila ikipashanyo mukintu ikili kyonse ba Yawe ba Lesa wenu bamikenye ukupanga. ²⁴ Pakuti ba Yawe ba Lesa benu mulilo uupyana, niba Lesa babukwa. ²⁵ Ili mukafyala abana kabili ne bana ba bana benu, kabili ili mukekala mu kyalo imyaka iingi, kabili kana mukalibifye mwebene ne kuli bashila kipashanyo kya kintu ikili kyonse, ne kukita ikintu ikibipile mu menso aba Yawe ba Lesa benu,nekubalenga ukufitwa - ²⁶ Naita iulu ne kyalo ati fibe bukamboni kuli mwebo lelo ati mukonaulwa lukoso anini mu kyalo ikyo mukoabukilako kwishila ya Yodani mukipoka; tamwakafushe shiku shenu mulya, lomba mukonaulwa mupwilapo. ²⁷ Ba Yawe bakamisalanganya mwebo mu bantu, kabili mukashala lukoso abakepele mu mpendwa ya mu mishobo, ukokonse ba Yawe bakamutwala. ²⁸ Mulya mukalebombela ba Lesa bambi, inkto ya maboko abalalume, ifitine mabwe, ifitafimona, nkufwa, kulya nangu kununkula. ²⁹ Lomba mulya mukaba fwaya ba Yawe ba Lesa benu, kabili mukabasanga, kani mwabafwisha ne mutima kabili ne mwebo wenu onse. ³⁰ Nga mwaba mufikateshe, kabili nafifi fintu fyonse fyaisa pali mwebo, muli iyo shinku ishikakonkapo mukabwekela kuli ba Yawe ba Lesa benu ne kukutika kwi shiwi lyabo. ³¹ Pakuti ba Yawe ba Lea benu ni ba Lesa abaline kumbu; tabakamileke nangu kumyonaula, nangu kulubako ululayañano lwa bashimwe ulo alapile kulibo. ³² Pano ipusheni pashiku ishapita kunuma, iya kunuma ya myaka yenu, kufuma pa bushiku ba Lesa bapangile umuntu umwalalume pano pa kyalo kya panshi, ipusheni kufuma kupelo ya mwiulu kufika na kupelo imbi, kani kwalipo ikintu kyakulisha koti nikiki, nangu ikili kyonse ikyapala koti kiki ikya ufwikilepo? ³³ Nga nani umuntu uwa ufwilepo ishiwi lya ba Lesa ikolabila ukufuma mukati ka mulilo, koti nifi mwaifwa, ne kuba abatuntulu? ³⁴ Nangu ba Lesa bakitapo koti nikiki ikya kwesha kuya kabili ne kulipitila umwine umushobo kufuma mu mushobo umbi, nefyakukatasha, filangisho, kabili ne fyakunka nkamana, na mukondo, kabili nena kuboko kwa makosa, kabili nena mukoko uutanikilwe, nena fikukuma ifyakukatasha, koti nifyonse ifyo ba Yawe ba Lesa wenu bamukitile mwebo mu Ijipita mu menso enu? ³⁵ Kuli mwebo ifi fintu fyali monekele, pakwebati kipale mwishibe ati ba Yawe ni ba Lesa, kabili takulipo umbi kufuma pali bena. ³⁶ Kufuma mwiulu balilengele mwebo ukumfwa kwishiwi lyabo, pakwebati bamusambilisheni mwebo; pamushili balilengele mwebo ukumona umulilo wabo umukulu; mwalumfwile ku fyebo fyabo ukufuma mukati ka mulilo. ³⁷ Mulandu wakwebati balitemenwe bawishinwe, balisalile ifi fyashi fyabo panuma yabo, kabili ne kumifumya mu Ijipiti na bena kababapo, ne makosa aakulu; ³⁸ Pakuti baifumyemo muli mwebo imishobo iikulu ne kukosa kukita mwebo, ne kumiletamo, kumipela ikyalo kyabo kibe bupyani, koti nififi ifyo kili lelo. ³⁹ Ishibeni fyenkafyo lelo, ne kukibika pa mitima yenu, ati ba Yawe ni ba Lesa abali mwiulu peulu kabili napanshi ya kyalo kya pano posonde; takulipo umo koti ni bena. ⁴⁰ Mukalesunga ifi fipope ne mikambisho iyo komikambisha mwebo lelo, pakwebati kikabe bubwino kuli mwebo kabili na kubana benu panuma yenu, kabili ati mufushe shinku shenu mu kyalo iki ba Yawe ba Lesa benu bakomipela mwebo imyaka ne myaka.'' ⁴¹ Kabili Mose alisalile imishi itatu ku kabanga kanika ya Yodani, ⁴² Pakuti umuntu uuli onse abutukilamo kani aipaya umuntu ikyamapuso, uutalipo umulwani wakwe kunuma. Pakubutukila mu umo mushi pali shishi, akuba ne bumi. ⁴³ Iyi yali: Beza uuli mu mayamba, mwilungu ya kyalo, uyu wa bena Lubeni; Lamoti uuli mu Gileadi, uyu wabena Gadi; kabili na Golani uuli mu Bashani, uyu wabena Manase. ⁴⁴ Uyu emushilo uyo Mose abikile kutanshi ya bena Isuleli; ⁴⁵ Iyi ni ululayañano, mshilo ne mikambisho imbi iyo alabile ku bena Isuleli ili bafumine mu Ijipiti. ⁴⁶ Ili bali ku kabanga kanika ya Yodani, mu kinkululungwa ikikebene na Beti Peoli, mu kyalo kya Sioni, imfumu yabena Amoli, uwaleikala ku Eshiboni, uo Mose ne bena Isuleli bakifishe ili bafumine mu Ijipiti. ⁴⁷ Balikipokele iki kyalo koti kyabo, kabili ne kyalo kya mfumu Ogi uwabena Bashani - aba - , bali imfumu yabena Amoli, iyali ubushilya bwa Yodani ku kabanga. ⁴⁸ Uyu mupaka kufuma ku Aloeli, kumpelo ya kinkululungwa kya Alinoni, kuya kulupili lwa Siyoni (akwebati ulupili lwa Elimoni), ⁴⁹ kabili ne kubikapo lukoso ilungu lyonse ilya nika yaYodani, kukabanga kubushilya bwa nika ya Yodani, kuya ku kishiba kya Alaba, ne ku matelo alupili lwa Pisiga.