¹ Lomba katwaluka ne kuya peulu yashila yaku Bashani. Ogi, imfumu yabena Bashani, yalishile ne kutulwisha, Ena ne bantu bakwe, mukulwa pa Ederei. ² Ba Yawe kabalabila kuli nemo, 'Wimutine yowo; pakuti nakupelo ukumukimfya kabili nabika abantu bakwe bonse ne kyalo isambu shakukebapo. Ukakite kuliye ifi wakitile Siyoni, imfumu yabena Aminite, abaikele pa Heshiboni. ³ Pakuti ba Yawe ba Lesa besu nabo kabatupelo ukukifya pali Ogi imfumu yabena Bashani, kabili abantu bakwe bonse bali bikilwe musambu shesu. Katubalukuka bonse kunshi tapali nangu umo uwashelepo. ⁴ Katupinta imishi yakwe yonse pali ilya mpindi. Tapalipo umushi nangu umo pa mishi amakumi ya sanu ne kumi limo ayashelepo ukubapokolola - impusha yonse iya Agobi, iya bufumu bwakwa Ogi mu Bashani. ⁵ Iyi yali mishi yonse iyali mumalinga ayatali, imilyango, nefishimbi; ikikyo mupelo ya mishi ishi tashakwete amalinga. ⁶ Twalifyo nawile ukufipwililisha fyonse, ngefyo twakitile kuli Sihoni imfumu yaku Heshiboni, ukupwililisha ukonaula umushi - abalalume ne banakashi naba nini. ⁷ Pano ifitekwa fyone nefya onaukie ifya mu mishi twalifyo nawile. ⁸ Pali iyo pindi katupoka ikyalo ukufuma mu maboko ya mfumu shibili isha bena Amorite, abali ukupita mu Yodani, ukufuma mumukolo waku Anoni kulupili lwa Hemoni ⁹ (ulupili Hemoni balalwita Siryoni kubena Sidonyoani, nabena Amorite balakita Senire) ¹⁰ nemishi shonse isha muilungu, onse Gilide, na onse Bashani, ukuya konse ku Saleka na Edere, imishi ya mfumu yaku Ogi mu Bashani.'' ¹¹ Pali babo aba shelepo abakwa Refaimu, enka imfumu Ogi uwaku Bashani ewashelepo. Moneni! Umupunda wakwe walimupunda wakyelo. Takyali mu Raba, uko ifikolwe fyakwa Amoni fikala? Kyali ama kyubiti ubutali asanu na ane kabili nama kyubiti mubwipi ane, ngefyo abantu ba penda. ¹² ''Iki ikyalo twapokele mukukipinta pali ilya pindi - ukufuma kuli Aroene, iyo ili munshi ya mukolo uwa ku Anoni, kabili akabeya kamo aka lupili lwa kyalo kya Gilide, ne mishi yakiko - Nalipele kubena Rebenite kabili na kubena Gadite. ¹³ Abeshelepo abana Gilide na bonse abena Bashani, umfumu bwakwa Ogi, Nalipele akabeya kamusobo wakwa Manase. (Yonse impusha ya Agobe, nayonse Bashani. Impusha imo yenka ilikwitwa ati Refaimu ¹⁴ Jare, ikikolwe kyakwa Manase, kabapinta impusha yonse iya Agobe ukufika kumuputule wakwa Geshunite na Makatite. Akitile impusha, nangu ni Bashani, peshina lyakwe umwine, Havote Jaire, ukufika na kubushiku bwelelo.) ¹⁵ Nalipele Gilide kuli Makire. ¹⁶ Kubena Rubenite naku bena Gadite nalipele impusha ukufuma kuli Gilide kumukolo waku Anoni - pakati ka mukolo ni pusha umupaka - naku Jaboke kunika, uli mupaka nefikolwe fyakwa Amoni. ¹⁷ Nakimbi ikya kumipaka nakyo lilungu ne mukolo wanika ya Yodani, ukufuma Kinerefe naku kishiba kya Araba (ikyo kuli, kishiba kya mukele) kumutente muko wa lupili Pisiga kukabanga. ¹⁸ Nali mikambisheni mwebo pali ilya pindi, ukulabila, Ba Yawe ba Lesa benu bali mipeleni iki kyalo ukukipoka; mwebo, bonse abalalume aba kondo, mukapita ukuninfya abafyanso kuba kwa besu, abana ba Isuleli. ¹⁹ Lomba abakashi benu, nabanini benu, nefitekwa fyenu (Ndi shibile ati muli nefiteka ifingi), fikekali mumishi yenu iyo namipeleni, ²⁰ ukufika ba Yawe ili bakamipeleni ukutusha kuba kwabenu, ngefyo ali kuli mwebo, ukufika nabo bakapoke ikyalo ikyo ba Yawe ba Lesa benu bakabapela ukupita ku Yodani; elyo mukabwelele, umuntu onse muli mwebo, kukyabupyani ikyo namupele.' ²¹ Nali kambishe Yoshiwa pali ilya pindi, ukulabila,' Amenso yenu yamona fyonse filya ba Yawe ba Lesa wenu bakita kuli ishi infumu shibili; ba Yawe bakakita ikintu kimo kumfumu shonse uko mukaya. ²² Mwikabatina, pakuti ba Yawe ba Lesa wenu ebaka milwileni. ²³ Nalibikile ba Yawe pali ilya pindi, nekulabila, ²⁴ 'Mwebakapa ba Yawe, mwatatika ukulanga umusha wenu ubukulu bwenu na makosa yenu aya kukuboko kwenu; pakuti ninani Lesa uliko mwiulu nangu ni panshi uwingakita fimofine ifya milimo yenu nge yo mwakita, kabili nafimofine ifya kukita ifya makosa? ²⁵ Lekeni indeya kuntashi, namipapateni, mukumona ipanga iweme bushiya ya Yodani, kilya ikyalo kyapa lupili ikiweme, kabili na Lebanoni.' ²⁶ Lomba ba Yawe bali mfitilwe pamusango wa mwebo; taba ngufwilepo. Ba Yawe kabalabila kuli nemo, 'Lekeni ifi fibe ifingi kuli mwebo - mwilabila kuli nemo nalibili pali iyi milandu: ²⁷ Kamuya peulu penka peulu ya Pisiga nekwimya amenso yenu kumboshi, kukabeta kaku buyeke, kukabeta kaku bulenge, nakukabanga; moneni na menso, pakuti tamwakaye ukupita Yodani. ²⁸ Palififyo, mukambishe Yoshiwa neku mutundaika neku mukoselesha, pakuti akapita pali baba bantu, kabili akabalengela ukupyana ikyalo ikyo mukomona. ²⁹ 'Eli twaikele mukinkulundwa kulubali lwa Betepere.