¹ Mpeleni ukutwi, mwe meulu, kabili lekeni ndabile. Lekeni ikyalo kya panshi kyumfwe amashiwi akanwa kangi. ² Lekeni ukusambilisha kwangi kulenoka kwati ni mfula, lekeni ukulabila kwangi kulepanga kwati kime, kwati ni mfula iiminsaila pa munyemfu, kabili kwati ni mfula iikosansa ikyakusansa lukoso palifilya ifya mena. ³ Pakuti nalabilishe shina lya ba Yawe, nokulondololo bukulu bwa ba Lesa. ⁴ Ilibwe, umulimo wakwe ulungeme; pakuti inshila shakwe shonse sha kine. Ni Lesa uwakishinka, utakwete ububi. Ye emololoke no kulungana. ⁵ Bakite fibipile kuli ye. Te bana bakwe kulufyanya kwabo abene. Kifyashi ikilubankene kabili ikitakyololokele. ⁶ Bushe ba Yawe ebo mwingakite fi, mwe bantu abatumpile kabili aba tabakweta mano? Kanshi tali ebawishinwe, abo abamipangileni mwebo? Balimipangile nokumwikalikeni mwebo. ⁷ Anukeni inshiku sha mpindi yakale, langulukeni pa myaka ya mpindi iyapita. Ipusha bawiso kabili nabo bakakumwenesha, abakulu benu kabili bakamibula. ⁸ Ilyo uwa mwiulu umwine apele imikoka ubupyani bwabo - ilyo aabenye umutundu wa bantu bonse, kabili nokubike mipaka ya bantu, kwati fyenka abikile impendwa ya ba Lesa wabo. ⁹ Pakuti ikyakaniko kya ba Yawe bantu babo; Yakobi ekyakaniko kyabupyani bwabo. ¹⁰ Alimusungile mu mpanga ya kiselebwa, kabili mu mpanga umutamwalipo nangu kimo; alimushingulukile nokumusakamana mu fyonse, alimulamine kwati kantu kapalinso lyakwe. ¹¹ Kwati fyenka inkwashi ilama ikinsa kabili nokubakamina pa bana bakwe, ba Yawe balitanikile amapindo abo nokubatola, nokubapinta pamo pindo abo. ¹² Ba Yawe benka balimutungulwile; takwali ba Lesa bambi abali nakwe. ¹³ Alimwenseshe peulu apene mumpunsha sha mu fyalo, kabili alimulishishe ifisepo fya mwibala; alimulishishe ubuki ukufuma mwibwe, na mafuta ukufuma mwibwe ilisansukile. ¹⁴ alilile nomukaka uuchimbile uwa ñombe nokunwa umukaka ukufuma ku mbelele, na mafuta aanonene aambelele, imikokoiilume iyaku Bashani ne mbushi, nobunga ubupelekele bwino - kabili mwalinwine ne fintonto ifiweme ifyapangilwe na menshi afisepo. ¹⁵ Lomba Yeshuluni alikukile uwinine no kupanta - walikulile uwinine, walinishe, kabili mwalilile nokwikuta - alimulekele Lesa uwamupangile, kabili alilikene ilibwe ilyepusukilolyakwe. ¹⁶ Balilengeshe ba Yawe ukuba no bukwa pamulandu wa ba Lesa wabo bambi; kufyabunya fyabo balibafitwishe. ¹⁷ Balilambwile kumipashi ishikowelile, ishitashali ni Lesa - ba Lesa abo tabaishibile, ba Lesa abamonekele lukoso bukumo, ba Lesa abo ba wishinweni tabachinine. ¹⁸ Mwalisha ilibwe, ilyaishile mukuba niwishinwe, kabili mwali mulubileko Lesa uwa mifyele. ¹⁹ Ba Yawe balikimwene iki nokubasula balibasulile, pantu abana bakwe abalalume na banakashi balimukolo mwene. ²⁰ ''Nkafise mpumi yangi ukufuma kulibo,'' efyo balabile, ''kabili nkamone mpelo yabo ifyo ikaba; pantu bo kifyashi ikilubankene, bana abatabakwete bukishinka. ²¹ Bandebgesho bukwa kuli kilya iki takili ni Lesa kabili bamfitwisha pamulandu wafyabuwelewele fyabo. Nkabakichisho lumkumwa kuli balya abashili bantu; ku mukoka uutumpile nkabalenga ukuba nobukali. ²² Pakuti umulilo waambuka kale ku bukali bwangi kabili ulepya ukufika na panshi apene kumpunsha ya bantu abafwile; ukoonaula kyalo na fyonse ifimenamo; akookya ne fitendekesho fya mpili. ²³ Nkalumbika amakatasho pali bo; Nkalasa imiketo shangi shonse pali bo; ²⁴ Bakonaunwa ku nsala kabili bakonaika ku kibe ikikulu kabili nakubono bwa malwa; Nkatuma kuli bo ifinama ifishinchile ifya mumpanga uku balya, kabili nefikalaba mu mushili ifikwete sumu ati fikabasume. ²⁵ Pesonde ikipanga kikabafwisha, kabili namukachi mu ma nanda abo mukabakichikilwe fya mwenso. Kikonauna abalumendo naba kamwale, abana abanyini abakyonka, kabili no mwalalume uuli ne mfwi. ²⁶ Nalilabile ati nkabasalañganyo mutali, ikyakweba ati ukwanua kwabo kukapwa mu bantu. ²⁷ Kani kyali ikya kwebati nshatinine ukunkolomona kwa balwani, kabili nokwebati abalwani babo bakakipingwila mukilubo kabili ati bakalabila ati, 'Ukuboko kwesu kukinjikwe,'anga nalifikichile fyonse fi. ²⁸ Pakuti Isuleli mukoka utakwete amano, kabili mulibo tamulipo akalango. ²⁹ Kani, bali abamano, anga bali kyumfwile ki, nokwishiba ifileisa kuntanshi yabo! ³⁰ Kuti umuntu umo abatusha shani ikana limo, kabili na bantu babili basalañanye shani abantu amakana ikumi, pambi kani ilibwe lyabo lyalibashichishe, kabili ba Yawe balibalekeleko? ³¹ Pakuti ilibwe lya balwani besu talilingene pamo nelibwe lyesu, kwati fyenka abalwani besu basumine. ³² Pakuti ifiti fya fisepo fyabo filifumine ku fiti fya mu Sodoni, kabili naku malimi aku Gomola; ifisepo fyabo fisepo ifikwete sumu; ifisanse fyabo fililulile. ³³ Ifintonto fyabo ni sumu wa milolo ishikulu kabili ishishinchile makosa. ³⁴ Kanshi ububwanshiko tabutulilwe kuli nemo mumfisolo, ukwisalikwa pamo mufya bunonshi bwangi? ³⁵ Ndapelo kushinkanya, kabili nokulambula, panshita ilyo ukulu kwabo kukateshimuka; pantu ubushiku bwa malwa abo buli pabwipi, kabili ne fintu ifili nokwisa palibo filinokukichikwa bwangu.'' ³⁶ Pakuti ba Yawe bakabaputwile nsambu abantu babo, kabili bakababele nkumbu aba bomfi babo. Bakamono kwebati amakosa abo apwa, kabili tapali nangu umo uwashalapo, abasha nangu abantu abakakulukile. ³⁷ Penka bakalabila ati, ''Balikwisa ba lesa wabo, ilibwe umu bafisamine, ³⁸ ba lesa abalile amafuta aanonene aafitapisho fyabo nokunwe fintonto ifya milambu ya mufya kunwa? Balekeni beme kabili bamikwashe; balekeni babe bukingo bwenu. ³⁹ Moneni kabili ukwebati nemo, kabili nemo, ninemo Lesa, kabili takuli Lesa umbi uwakubikapo pali nemo; Ndepaya, kabili ndapelo bumi; Ndasomeshañgana, kabili ndabuka, kabili takuli nangu umo uwinga mipulusha ukufuma ku makosa angi. ⁴⁰ Pakuti ndasuntula ukuboko kwangi mwiulu nokulabila ati, 'Fyenka ngikele uwa mweo, nkakikita. ⁴¹ Kani nanone kipanga kyangi ikibeka, kabili kani ukuboko kwangi kwatampo kubaputwile milandu, nkashinkanya naba lwani bangi, kabili nkabalubwila balya abamachile. ⁴² Nkalenga imiketo shangi ukupendwa kumulopa, kabili ne kipanga kyangi kikonaune nama kabili no mulopa uwa balya abaipaiwe nabakwetwe ubusha, kabili ukufuma namubakulu ba ntungulushi sha balwani.''' ⁴³ Sangalaleni, mwe mikoka, ishili na bantu bakwa Lesa, pantu ye akashinkanya umulopa wababomfi bakwe; akashinkanya pa balwani bakwe, kabili akapanga ne kyakutubisha kwa kyalo kyakwe, pa bantu bakwe. ⁴⁴ Mose alishile nokupitulukamo mu mashiwi onse alino lwimbo mu matwi abantu, ye umwine, na Uoshiwa umwana wakwa Nuni. ⁴⁵ Penka Mose alipwishishe ukupitulukamo mulyaya mashiwi onse kubena Isuleli bonse. ⁴⁶ Alilabile kulibo ati, ''Bikeni akalango kenu pa mashiwi onse aya na myeba lelo, pakwebati mukambishe abana benu ukuasunga, amashiwi onse aali mulya ya mishilo. ⁴⁷ Pakuti iki tali kintu kya lukoso kuli mwebo yo-o, pantu bumi bwenu, kabili ukupichila muliki kintu mukafushe nshiku shenu mu kyalo ikyo muleya mukupoka kwishilya lya Yodani.'' ⁴⁸ Ba Yawwe balilabile kuli Mose bwenka bulya bushiku bumo ati, ⁴⁹ ''Ninsa kulyulu lupili lwa Abalimu, kulupili lwa Nebo, ululi mu kyalo kya Moabu, uukebanshenye na Yeliko. Ukamone kyalo kya Kenani, ikyo ndepela bantu bakwe Isuleli kwati bupyani bwabo. ⁵⁰ Ukofwila penka peulu pa lupili apa wakuninsa, kabili wakubunganishiwa ku bantu bobe, kwati fyenka Aloni umukwanu mu Isuleli afwilile pa lupili lwa Holi nokubunganishiwa ku bantu bakwe. ⁵¹ Iki kyakukichikwa pantu tawali uwakishinka kuli nemo mu bantu bakwe Isuleli pa menshi aku Meliba mu Kadeshi, mu mpanga ya Zini; pantu tawakichile kuli nemo mubuleme na mumukinshi mukachi ka bantu bakwe Isuleli. ⁵² Lomba webo wakukimona ikyalo ikili kuntanshi yobe, pano tawakayemo, mulya mu kyalo ikyo ndepela abantu bakwe Isuleli.''