¹ Ili umwalalume apinta umukashi ne kumupa ye, kabili kani tasangilepo ishuko pamenso yakwe pakuti tasangile ifintu ifiweme muli ye umwanakshi, amulembele ye inkalata ya kuekana, ne kwibika mu maboko yakwe, kabili ne kumufumya munanda. ² Ili afuma munanda yakwe umwanakashi, kuti aya ne kuba umukashi waumbi umwalalume. ³ Kabili kani umulume wakwe uwakibili amupata kabili ne kumulimbela inkalata iya kulekana, ne kwibika mukuboko kwakwe, kabili ne kumutuma ukufuma munanda yakwe; nangu umulume wakwe uwakubili afwa. Umwalalume uyo uwa kumupinta koti mu kashi wakwe. ⁴ Penka uyo uwali umulume wakwe uwakale, uyo wamukene pakutanga, takuti amupinte libili ne kuba umukashi wakwe, panuma tanga wamishiwa; pakuti ikyo kikali kuli uya bunga kuli ba Yawe. Teku kulenga impanga ukuba iya bubi, impanga iyo ba Yawe ba Lesa wenu balukumupeleni koti bupyani. ⁵ Kani umwalalume aupa umukashi uwabukumo, Talingile ukuya ku nkondo ne fita fya nkondo, nangaba ukumukambisha ukuya kunkito iya mumupatikisha; akali kuli mukakulukile pa nanda pa mwaka umo kabili akali kufwisha bwino umukashi wakwe uyo aupa. ⁶ Umuntu neli umo apinta ilibwe ilya kupelelapo neli ni mpelo yakupelelapo ukubakilayano, pakuti ikyo kikalumpita umweo wa muntu ukuba koti kulayana. ⁷ Kani umuntu abobeka aiba umukwabo ukufuma mukati ka bantu aba Isuleli, ne mupyungishi koti musha ne kumushitisha ye, uyo umuñgo lyelelwe ukufwa; kabili mukafumya ukubifya ukufuma pakati kenu. ⁸ Kolukukengela pamwala uli onse wa manata (imbumba), ukwebati kokengela kukulamane kuilama imikambisho iya pelwa kuli mwebo ku bapapatilishi, abena Lefai, bakumisambisheni; koti ni fyefyo na ba kambishe bo, ifi efyo mukakita. ⁹ Kolanguluka ifyo ba Yawe ba Lesa bobe ba kitile kuli Milyami ilyo mwalu kufuma mu kyalo kya Ijipiti. ¹⁰ Ilyo wakongwesha umupalamano inkongole, tekuya ne kwingila mu nanda yakwe ne kupintamo ikya kulya kwakwe. ¹¹ Ukemakane pesonde, penka uyo umuntu wakongweshe akaleta pesonde ikyo alaile kuli webo. ¹² Kani uyo muntu mupengele, wikaya mukulala pabulo bobe kaumusungile ikyo ikipe waikatilamo. ¹³ Ikine ukamubwesheshe ye ikya kulaya kwakwe ili akasuba kaleya mu kuwa panshi, pakwebati enga lala mumpindi yakwe kabili ne ku kushukisha webo; kali kuli kilungeme kuli webo kuli ba Yawe ba Lesa bobe. ¹⁴ Wika mukamukengelela umubomfi uyo uwakupyungila uyo uupengele kabili uwakukabila, neli mu kwanu mu ba Isuleli, na ngaba uwa mubena fyalo uyo uli mu mulyango ya mushi wa kyalo kyenu; ¹⁵ Pakaba na pakasuba ukalukumupela amalipilo yakwe; tekuwisha akakasuba ukwakubula ukumupwishisha imilandu yakwe, nipakuti mupengele kabili alukwikalila pa fyefyo. Ukali kukite fyo pakuti ekakulilila webo kuli ba Yawe, kabili kikaba mulandu uyo ukapanga. ¹⁶ Abafyashi bekabepaya pa mulandu wabana babo, neli bana ukwipaiwa pa mulandu waba fyashi babo. Pali kyo, umuntu onse alyelelwe ukufwa pa bubi bwakwe. ¹⁷ Wikabomfya amakosa mukufumyapo umulingañya uyo uwelelwe abena fyalo neli abo tabakwete bawishibo, nangaba ukupoka mukamfwilwa ikya kuli fi mba koti kyakwikatilamo. ¹⁸ Nangaba ni fyo muka kilanguluke mumilangwe yenu ati na mwebo mwali aba sha mu Ijipiti, kabili ati ba Yawe bali mikakwile ukufuma kulya. Pali fyefyo na mikambisha mwebo ukulama ifunde ilyi. ¹⁹ Ili mwakesa ifilimwa mwibala lyenu, kabili kani mwalubako omele umo uwa kalyo mwibala lyenu, teku bwelela kunuma mukuutola yowe; fifwile fyaba fya bena fyalo, neli fya babo abatabakwete ba wishibo nangaba ba mukamfwila. Pakuti ba Yawe bakamishukishe mumilimo shonse isha minwe yenu. ²⁰ Ilyo mwasunkanya ikichi kyenu ikya ma olife, teku kunta naku misambo kabili; fikale kuli fya bena fyalo. Fyababa abata bakwete po bawishibo, nangaba bamukamfwilwa. ²¹ Ili mukalukuswa imfaina isha mwibala lyenu ilya fisepo, tekupupulamo limbi kabili, isho ishikashala sha bena fyalo, ne sha babo tabakwete ba wishabo, na ba muka mfwilwa. ²² Mukalanguluke mukalango kenu ati mwali mulibasha mukyalo kya Ijipiti; koti ni fyopele fyo ndukumi funda mwebo ati ukulilama ili funde.