¹ Takulipo umwalalume uulemene nangu uuputwile ifya bwalalalume uukengila mwibungano lya ba Yawe. ² Umwana wamubukeende taakengile mwibungano lyaba Yawe; ukufika naku nkulo yabulikumi iya mukifyashi kyakwe, nangu umo uwa mulibo ekengila mwibungano lyaba Yawe. ³ Umwina Amoni nangu umwina Moabi techi engengila mwibungano lyaba Yawe; ukufika naku nkulo yabulikumi iya mukifyashi kyakwe, nangu umo uwa muli bo ekengila mwibungano lyaba Yawe. ⁴ Kino kilifino pantu tabamikumenye mwebo no mukate na menshi pa musebo ulo mwafumine mu Ijipiti, kabili pantu balikufutukile webo Balamu umwana wakwa Beola uwaku Petola umwina Alam Naharaimu, mukumifinga mwebo. ⁵ Pano ba Yawe Lesa wenu tabakomfwepo kuli Balamu; ukubaa, ba Yawe Lesa wenu balyalwile ifingo ukuba lishuko kuli mwebo. Pantu ba Yawe Lesa wenu bali mitemenwe. ⁶ Tamulingile ukufwaisha umutende wabo nangu fiweme ifyo bamona, munshiku shenu shonse. ⁷ Tamulingile ukumupata umwina Edomi, pantu ali mukwanu; Tamulingile ukumupata umwina Ijipiti pantu mwali mwikala fyalo mu kyalo kyakwe. ⁸ Aba mukifyashi kya nkulo yabutatu aba kafyalwa kuli bo kochi baba bamwibungano lyaba Yawe. ⁹ Kana mwabafumina koti mushilikale ku balwani bobe, elo mulingile ukulisunga mwebene kukibipile kyonse. ¹⁰ Kani mukati muli mwebo mulipo umuntu uutatubishiwe pantu palipo ifyakichilwe kuli ena ubushiku, penka alilingile ukufuma mu nkambi ya bashilikale; taalingile ukubwela mukachi mu nakambi. ¹¹ Kani ikingulo kyafika, alilingile ukusamba umwine mu menshi; pakwebati engabula ukumona ikili kyonse ikyabusali ikili mukachi kenu ne kumifutachileni mwebo. ¹² Mulilingile ukuba ne nkende imbi posonde ya nkambi uko mwengaya; ¹³ Kabili mukabe ne kintu mukachi ka fibombelo ifyakusepako; kani mwaikala panshi mukuli kakulula mwebene, mulilingile ukusepa na ko kabili ne kubweshapo iloba kabili ne kushikapo palifyo ifyafuma muli mwebo. ¹⁴ Pakuti ba Yawe Lesa wenu balenda mukachi ka nkambi mukumpeleni ukukomfya kabili ne kupela abalwani mu maboko enu. Penka inkambi yenu alilingile ukuba ya mushilo, pakwebati abule ukumona ikili kyonse ikyafiko mukachi kenu kabili ne kumufutachileni mwebo. ¹⁵ Tamulingile ukumupana libili kuli kapa yakwe umusha uwa mufyukile ukufuma kul kapa yakwe. ¹⁶ Mumuleke akekale na mwebo, mu mushi uuli onse uyo asala. Mwenka mukanya. ¹⁷ Tamulingile ukubamo abakita ubukende mukachi kabana abanakashi aba mu Isuleli, nangu kubamo abakita ubukende mukachi kabana abalalume aba mu Isuleli. ¹⁸ Tamulingile ukuleta imalipilo amubukende nangu amalipilo aa mbwa mu nanda yaba YaweLesa wenu mu mulayana ukuli konse; pakuti fino fyonse fibili fya bunya kuli ba Yawe Lesa wenu. ¹⁹ Tamulingile ukukongwesha mukulundapo kumulongo wenu uwamu Isuleli ukulundwapo kwa ndalama, ukulundapo kwa fya kulya, nangu ukulundwapo kwa kili kyonse ikya kongweshiwa mu kulundwapo. ²⁰ Ku mwina fyalo kochi mwamukongwesha mukulundwapo; pakwebati ba Yawe Lesa wenu benga mishukisha muli fyonse ifyo mukwatapo na maboko enu, mu kyalo ikyo muleingilamo mu kukipoka. ²¹ Kani mwalayana mukulapa kuli ba Yawe Lesa wenu, tamulingile ukukokola mukukifikisha, pakuti ba Yawe Lesa wenu ikine bakakifwaila kuli mwebo; kikaba bubi kuli mwebo pakubula ukukifikisha. ²² Pano kana mwabula ukulayana kwa kulapa, takyakabe bubi kuli mwebo. ²³ Ikyafuma pamilomo yobe ulingile ukuposako amano ne kukikita; ukulingana nefyo walayene no kulapa kuli ba Yawe Lesa wenu, kyonse ikyo mwakakuluka ukulayana ne kanwa kobe. ²⁴ Kani waingila mwibala lyamu faina ilya mukwanu, mulilingile ukulya imifaina iingi ukulingana ne fyo wafwaya, pano tekubikamo nangu kimo mukya kupinchilamo kyobe. ²⁵ Ilo mukengila mwibala ilya mu kwanu umwapya imifaina, kochi mwamokaula imitwi ne maboko enu, pano tekubikamo ikikwakwa mwibala lya mukwanu ilya mifaina iyapya.