¹ Ili ba Yawe ba Lesa wenu bakaiputulako imishobo, iyo iili mu kyalo iki ba Yawe ba Lesa wenu bakomipela, kabili ili mukesa panuma yabo ne kwikala mu mishi yabo ne mananda, ² mufwile mukalisalile imishi itatu pakati ka kyalo kyenu iki ba Yawe ba Lesa wenu bakomipela mwebo ati kibe kyenu. ³ Mufwile mukalenge inshila ne kwakanya umupaka wa kyalo kyenu mufiputulwa fitatu, ikyalo iki ba Yawe ba Lesa wenu bakolenga mwebo ukukipyana, pakwebati uo onse uukepaya umuntu umbi koti abutukilamo. ⁴ Ifi efyakukonka kukuma ku umo uwipeye mubyakwe ne kubutukila mulya mukupususha ubumi bwakwe - umo uwaipaya mupalamina wakwe ikya mapuso ukwakubula ukumu somesha papindi ya mapuso. ⁵ Ikya kumwenako, kani umwalalume aya mupanga ne mupalamano wakwe mukutebe nkuni, kabili katema ne kapasa pakuponya ikichi, kabili akapasa kasokoka mu mupini ne kutenta umupalamina wakwe ne kufwa afwa - penka uyo muntu, afwileabutukila mu mushi umo pali ishi mishi ne kupusha ubumi bwakwe. ⁶ Pamulandu wakwebati kashinkanya wa mulopa koti kamunkonkela panuma uwaipayañgana, kabili mu bukali bwakwe amusanga, kani umusinso akili umutali, amupama ne kumwipaya, nangu kyakwebati uyo muntu takyelelwi ukufwa, pakuti tamupatilepo ulya mupalamina wakwe pakutanga kunuma. ⁷ Fyopelefyo na mikambisha mulisalile mwebene imishi itatu. ⁸ Kani ba Yawe ba Lesa wenu balundako ku mipaka yenu, koti ifyo balapile ukukita kufikolwe fyenu, nekumipela ikyalo kyonse iki balaile ukupela ifikolwe fyenu; ⁹ kani mwasunga iimbi imikambisho yonse nekuikita, iikomikambisha lelo - imikambisho yakutemwa ba Yawe ba Lesa wenu kabili nekwenda lyonse mumashila abo, penka, mulilingile mu kalilundileko imishi imbi itatu, ukubika pali ilya imbi itatu. ¹⁰ Kiteniki pakuti umulopa wabakubula mulandu ekaswa mukati ka kyalo iki ba Yawe ba Lesa wenu bakomipela ukubakoti bupyani bwenu, pakuti ukushininwa kwa mulopa kwiba pali mwebo. ¹¹ Lomba kani umo apata umupalamina wakwe, amubelamina ne kumupembelela, amwimina, kabili ne kupamaula pamaula ne kufwa afwa, kabili kani abutukila kumushi umo pali iimishi - ¹² penka abakulu baulya mushi wakwe balilingile bakatume ne kumubwesha kufuma mulya, kabili ne kumupela kubalongo baufwile, pakwebati akafwe. ¹³ Amenso enutalingile akamumfwile nkumbu; mulubali lyakiki, mulilingie mukapwishe kufumyamo ukushininwa kwa mulopa mu Isuleli, pakwebati kikabe bubwino kuli mwebo. ¹⁴ Tamulingile ukufuma ipopo yamwina mupalamina wenu iiabikilepo kale na kale papunsha, mubupyani bwenu ubo mukapyana, mu kyalo iki ba Yawe ba Lesa wenu bakomipela ukuba kyenu. ¹⁵ Kamboni umo lukoso talingile ukushinina umuntu pakubifya ukuli konse, nangu ububi ubuli bonse, mu milandu iili yonse abifya; mu kanwa kabakamboni babili, nangu mu kanwa kabatumboni batatu, ukueko imilandu yonse ifwile ikambingwilwe. ¹⁶ Elenganyeni ukwebati kamboni uushelelwe aimina umuntu uuli onse nekufyenga ne mulandu wabufi. ¹⁷ Penka bonse babili, abo abakopatikana pakatikabo, balilingile bakemakane kutashi yaba Yawe, kutashi yaba papatilishi ne bapingushi abakalebomba muli shilya ishiku. ¹⁸ Abapingushi balingile bakalenge ukwipukisha; ukumona, kani kamboni wabufi kabili alabila lukoso ifyabufi pa mulongo wakwe, ¹⁹ penka mulingile mukakite kuliye, koti ifyo akilanguluka ukukita ku mulongo wakwe; kabili mukafumya ubufi mukati kenu. ²⁰ Penka balya abakashala bakomfwa ne kutina, kabili kufuma lukoso lulya kufikana kutanshi tamwakabepo ububifi koti bwafifi muli mwebo. ²¹ Amenso enu talingile ukufwila inkumbu; umweo akapelwa pa mweo, ilinso palinso, ilino pa lino, ukuboko pa kuboko, ukulu pa kulu.