¹ Penka abapapatilishi, abena Levi, kabili bonse tabakabepo ne mitundu yabena Levi, tabakekalepo nekibaka bakichilapo nangu mubupyani bwabo mubena Isuleli; bakalukulya imilambu ya ba Yawe iyapangwa kumulibulya ubupayani. ² Penka tabakabepo nobupyani mukachi kabalongo babo abalalume; Ba Yawe ebupyani, mwenka abebele. ³ Kino ekyakaniko ikapokwa kubapapatilishi, ikipokwa kulibena ukufuma kubantu balya apana imilambu ,nangu iñombe nangu mukoko: ukuboko, no twiso tubili, nefiputulwa ifyamukachi. ⁴ Nefisepo ifitanshi nenseke, neya mbisho, neya mafuta, ne masako aakwe umukoko, mulilingile upana kuliye. ⁵ Mulandu ba Yawe ba Lesa wenu alimusalulwile ena ukufuma mumikoka yenu ati akemakane nokubomba ikinto mwishina ilya ba Yawe, ene nabana bakwe abalalume umuyayaya. ⁶ Kani umfwa umwina Levi aisa ukufuma uko ekala kumushi wenu ukufuma mukyalo kya bena Isuleli, nokwisa kulya kwenka bakasalulula ba Yawe, mwenka umwasuminina umuchima nokwikala pankende ba Yawe iyo basalile, ⁷ anga ukakumanisha ukubomba inkinto mwishina lya ba Yawe ba Lesa wabalongo bakwe abalalume abena Levi, benka abemakana kumenso aba Yawe. ⁸ Ukapoka ikipulwa kyafya kulya, pamo na bena ukubikapo neki akamwenamo pakushilisha mulikiki ikifyanshi ubupyani. ⁹ Ili mukengila mukyalo bakamipela ba Yawe ba Lesa wenu ikyalo, kabili mwikafunda kukita ifyabunya mulifilye ifyalo ne. ¹⁰ Mwikasangwa mukachi kenu nangu umo ukalambula umwana wakwe umwalalume nangu umwanakashi mumulilo, nangu umo umwakukane nangu niñanga nga yabulwene, nangu niñangaa yakisoko in nangu apande ubufwichi ne, ¹¹ nangu niñanga uwafima ne, nangu uwambula na fimipashi, nangu uufishibile na bafimipashi, nangu uwipusha abafwile. ¹² Balya bonse aba kita fino fintu ababunya kuli ba Yawe; kabali nomulandu wafino ifintu ifyabunya ifi ba Yawe ba Lesa benu aleba tafishamo ukufuma kumenso enu. ¹³ Mweba mulilingile ukwikala abakubula umulandu kumenso aba Yawe ba Lesa wenu. ¹⁴ Mulandu ino imikoka iyi mukatamfyamo balabomfwa balya bañanga ababulwe nabalubuko; pakuti, ba Yawe ba Lesa wenu kabili tasumine ati mukikite imfya fyenkefyi mwebo ne. ¹⁵ Ba Yawe ba Lesa wenu bakamimisha abapapatilishi ukufuma mukati kenu, nangu mulongo wenu umo umwalalume, kwati ninemo. ¹⁶ Mulilingile ukumumfwa ena. Pamo nefimwalomba kuli ba Yawe ba Lesa wenu kuli Holeba pabushiku ubutwañene, kabili twikalabilila ati, 'Lekeni twiufya ishiwi lya ba Yawe ba Lesa wesu ne, nangu kumo ulya umulilo umukulu libili, ne kuti twafwa.' ¹⁷ Ba Yawe balingebele nemo ati, 'Efyo nalabila balabila bwino. ¹⁸ Nemo kamimisha abapapailishi ukufuma mukati kabalongo bakwe, fyenkefi webo. Kabi nkabika amashiwi angi mukanwa kakwe, na ena akeba fyonse kamumbisha. ¹⁹ Kabili bonse nangu ninani nangu ninani abatabakomfwa amashiwi angi ifi akalabila mwishina lyangi, Nemo enemo nkabatotolwesha. ²⁰ Pakuti ulya umupapatilishi ukalitota nekulabila ikintu mwishina lyangi, iki shakamukambishe nangu akalabile, mwishinalya ba lesa bambi, ulya umupatilishi akafwe.' ²¹ Kabili umfwa mukalabile mumichima yenu ati: 'Kuti twaishiba shani ikyo iki balabile ba Yawe?' ²² Umfwa umupapatilishi akalabile mwishina lya ba Yawe. Kabili kilya inkintu alabila anga takulilile ,nangu ukumoneka ne ilye shiwi ba Yawe tabakilabile ne pakuti umupapatilishi umwine ulitota no kukilabila, tamulingile ukumutina ne.