¹ Ili Solomoni apwishishe ukwibaka iñganda ya bayawe kabili ne kipango kya mfumu, kabili ili panuma afikishishe fyonse ifyo alefwaya ukukita, ² Bayawe balimonekele kuli Solomoni papindi ya bubili, koti nifi bamonekele kuliye ku Gibeoni. ³ Bayawe balilabile kuliye, "naumfwa itembelo lyobe kabili ne kwipusha kobe walenga kutanshi yangi. Nalibikila ii ñganda, ii waibaka, kuba yangi nemwine, ukubikamo ishina lyangi imyaka ne myaka. Amenso yangi ne mutima wangi fikaba mulya impindi yonse. ⁴ Sombi webo, kani waenda kutanshi yangi koti ni Davida wiso aendele mubukishinka bwa mutima kabili na mukulungama, kulenakila fyonse ifyo nakukambishe kabili ne kusunga ifipope ne mafunde angi, ⁵ Penka kekalika ikipuna kyabufumu bobe pa Isuleli imyaka ne myaka, koti nifi nalaile kuli Davida wiso, kandabile, 'umwana wamukifyashikyobe takafilwepo ukuba pakipuna kya bufumu bwa Isuleli.' ⁶ Lomba kani wafumako, webo nangu abana bobe, kabili nekubula ukusunga imikambisho yangi kabili ne fipope fyangi ifi nabika kutanshi yenu, kabili ufwe kani mwaya ne kubatota balesa bambi ne kubafukamina panshi, ⁷ Penka kamukesako Isuleli ukufuma ku mushili nabene kubapela; kabili naii ñganda nalibikila nemwine kwishina lyangi, kaifumya kumenso angi, kabili Isuleli akaba ikilangilisho ikyakusekwa kabili ne kintu kyakutupikwa mu bantu bonse abamishoba. ⁸ Li ikelesha ikaba umulumba wafyabonaushi, kabili na bonse abakalepitako bakalekumya ne kulisha iminsoli. Bakepusha, mbanindo bayawe bakitilefi kuli kiki kyalo kabili nakuli ii ñganda?' ⁹ Bambi bakasuka, 'pakuti pamulandu baleka bayawe, ba lesa babo, abafumishe ifikolwe fyabo mukyalo kya Ijipita, kabili ne kubafukamina kabili ne kubatota. Ekyalenga ba yawe ukuleta ifi fyonse ifinkunkuma palibo."' ¹⁰ Kyalishile ukuba ku pelo ya myaka amakumi abili apo Solomoni apwishishe ukwibaka ifishimikwa fibili, ikelesha yaba yawe kabili ne kipango kya bufumu. ¹¹ Pano Hilamu,imfumu yaku Tile, yalimupele Solomoni ifiti fya seda kabili nefya sipulesi, kabili na Golode---fyonse ifyo Solomoni alefwaya---kanshi imfumu Solomoni alipele Hilamu imishi amakumi abili mukyalo kya Galileya. ¹² Hilamu alishile le ukufuma ku Tile mukumona imishi ii Solomoni amupele, lomba tayamusekeshepo ku mutima yoo. ¹³ Kanshi alilabile, "ii mishi yashani iiwapela, we mulongo wangi umwalalume?"Hilamu aliinikile ikyalo kya Kabula, ifyo ikoitwa namubushiku bwa lelo. ¹⁴ Hilamu alitumine ku mfumu amatalenta 120 aa Golode. ¹⁵ Li ekinto ya buloko iyo imfumu abikileko iya kwibaka ikelesha yaba yawe kabili ne kipango kyamfumu,milo,ilinga lya Yelusalemu, kabili na Hazoli,kabili na Megido, kabili na Gezeli. ¹⁶ Felo imfumuya Ijipita yalishele kabili ne kulukuka Gezeli. Alimokyele ne kwipaya abena Kenani abali mumushi. Penka Felo alipele uyu mushi ku mwana wakwe umwanakashi, umukashi wakwa Solomoni, koti buupe bwa pabushiku bwa kyupo. ¹⁷ Kanshi Solomoni ali wibakulwike Gezeli kabili na Beti Holoni uwaku mukulo, ¹⁸ Balati kabili na Tamali -------------- mu panga kyalo kya Yuda, Kabili ne mishi yonse umwakusungila fintu ifi anonkele, ¹⁹ kabili ne mishi ya fikotikala fyakwe, kabili nafyonse ifyo afwaile ukwibaka ifyakulisasamusha mu Yelusalemu, mu Lebanoni, kabili na mufyalo fyonse ifi aleteka. ²⁰ Pakuti pa bantu bonse abashele pabena Amoni, abena Hiti, abena Pelizi, abena Hivi, kabili ne bena Yebusi,abo abali talipo abantu ba Isuleli, ²¹ Ifi fyashi fyabo ifyashelepo mu kyalo panuma yabo, abo abantu ba Isuleli tababonawile mupwilapo yoo---Solomoni alibalengele abakubomba ikinto yabuloko ukufika lukoso namubushiku bwa lelo. ²² Nangunififyo, Solomoni talengelepo ikinto ya buloko ku bantu ba Isuleli yoo.Mukifulo kya fifyo, balikele kita kya nkondo kabili na bakalume bakwe, ifilolo fyakwe,abakulu ba kinto kabili ne bakulolekesha pa fikotikala fya nkondo fyawe kabili bali abakulu pa bakabalwe. ²³ Aba kabili bali abakulu abene abakukebelesha pakusopa pa kinto yakwa Solomoni, bali bonse pamo 550, abalesopa abantu ababombele ikinto. ²⁴ Umwana umwanakashi wakwa Felo alifumine ku mushi wa Davida nekuya ku ñganda ii Solomoni amunsopele. Panuma kabili, Solomoni alibakile Milo. ²⁵ Imikwi itatu kila mwaka Solomoni alepela umulambo wa kokya kabili ne mulambo wa mutende pa kyokelo iki ansompele ba yawe, ifyakokya ifya Kena akasuma pamo penkapa kyokelo ikyalikutanshi ya ba yawe. Kanshi alipwishishe ikelesha kabili pano alitampile nekuibofya. ²⁶ Imfumu Solomoni alilengele ne maato aakulumu Ezioni Gebeli, uuli pepi na Elati ku kitulu kya kishiba kya kukashika, mu kyalo kya Edomu. ²⁷ Hilamu alitumine bakalume ku bwato bwakwa Solomoni, bakyabusha abeshi ne kupilwa ne kishiba, pamo na bakalume bakwe umwine Solomoni. ²⁸ Balile ku Ofeli pamo na bakalume bakwe Solomoni. Ukufuma kulya baliletele amatalentta a Golode aali 420 ku mfumu Solomoni.