¹ Jaanong go ne ga diragala gore ka letsatsi lengwe la Sabata, Jeso a ntse a raletse tshimo ya mabele, barutwana ba gagwe ba ne ja diako tsa mabele, ba di sogotlhetsa ka diatla tsa bone, a bo ba di ja. ² Mme bangwe ba Bafarasai ba ba raya ba re, "Ke eng le dira selo se se seng ka fa malaong go ka se dira ka letsatsi la Sabata?" ³ Ya re a ba araba, Jeso a re, "A ga le ise le bale se Tafite a neng a se dira e rile a tshwerwe ke tlala, ene le banna ba a neng a na le bone? ⁴ O ne a tsena mo ntlong ya Modimo, a bo a ja borotho ja mo boleng-teng ja Modimo, a bo a ja bontlha bongwe ja jone, a bo gape a fa le ba a neng a na le bone gore ba je, le ntswa go ne go letlelelwa baperesiti fela gore ba ka bo ja." ⁵ Foo a ba raya a re, "Morwa Motho ke Morena wa Sabata." ⁶ Ga diragala gore ka Sabata se sengwe, a tsene mo sinagogeng go ruta batho. Ga bo go na le monna mongwe yo o neng a omeletse letsogo la moja. ⁷ Bakwadi le Bafarasai ba ne ba mo tlhomile matlho ka kelelelo, go bona gore aa o tla fodisa mongwe ka Sabata, gore ba tle ba mmatlele sengwe se ba ka mo pateletsang ka sone. ⁸ Mme o ne a itse se ba neng ba se akantse mme a raya monna yo o neng a omeletse seatla a re, "Ema ka dinao, o eme fa gare ga mongwe le mongwe." Ka jalo, monna yoo o ne a ema fa gare ga batho botlhe. ⁹ Jeso a ba raya a re, "Ke a le botsa, a go ka fa molaong go dira molemo kgotsa bosula, go boloka botshelo kgotsa go bo senyaka ka letsatsi la Sabata?" ¹⁰ A bo a ba leba botlhe, a raya monna yoo a re, "Otlolola letsogo la gago." ¹¹ A dira jalo, mme letsogo la gagwe la fola. Mme ba tenega, ba buisana gore ba ka dira Jeso eng. ¹² Mme go ne ga diragala gore mo malatsing ao, o ne a ya go rapela kwa thabeng. O ne a tswelela a rapela Modimo bosigo botlhe. ¹³ E rile letsatsi le tlhaba, a bitsa barutwana ba gagwe, a tlhopha ba le lesome le bobedi ba a neng a ba bitsa baaposetolo. ¹⁴ Maina a baaposetolo e ne e le Simone (yo o neng a mmitsa gape a re Petere), le morwarraagwe Anterea, Jakoba, Johane, Felipo, Batholomeo, ¹⁵ Mataeyo, Tomase, Jakoba morwa Alefiase, Simone yo o neng a bidiwa Selote, ¹⁶ Jutase morwa Jakoba, le Jutase Esekariota, yo o neng a mo itatola. ¹⁷ Jeso a fologa kwa thabeng a na le bone mme a nna mo sebatleng le boidiidi ja barutwana ba gagwe le boidiidi ja batho go tswa kwa Jutea, le Jerusalema le go tswa mo letshitshing la Taire le Sitone. ¹⁸ Ba ne ba tlile go mo reetsa le go fodisiwa malwetse a bone. Batho ba ba neng ba tshwenngwa ke mewa e e leswe ba ne ba fodisiwa. ¹⁹ Mongwe le mongwe mo boidiiding ja batho o ne a batla go mo kgoma gonne go ne go tswa nonofo e e fodisang go tswa mo go ene, mme a ba fodisa botlhe. ²⁰ Mme a lebelela barutwana ba gagwe , a re, "Go segofetse lona ba le humanegileng gonne muso wa Modimo ke wa lona. ²¹ Go segofetse lona ba le bolawang ke tlala gompieno, gonne le tla tladiwa. Go segofetse lona ba le lelang gone jaana, gonne le tla tshega. ²² Le segofetse fa batho ba le tlhoile, le fa ba le kgetholola ba be ba le roga, ka lebaka la Morwa Motho. ²³ Ipeleng ka boitumelo ka letsatsi leo, tlola-tlolang ka boitumelo, gonne le tla nna le tuelo e kgolo kwa legodimong, ka gore borraabonemogolo ba ne ba tshola baporofeti ka tsela e tshwanang. ²⁴ Boifang lona ba le humile, gobane le setse le amogetse tuelo ya lona. ²⁵ Boifang lona ba le kgotsheng gone jaana, gobane le tlile go tshwarwa ke tlala. Boifang lona ba le tshegang gompieno, gobane le tlile go hutsafala ebe le lela. ²⁶ Boifang fa batho botlhe ba le bua bontle, gobane ke ka fa borraabone mogolo ba neng ba amogela baporofeti ba maaka ka teng. ²⁷ Mme ke bua le lona ba le ntheeditseng, ratang baba ba lona ebe le dira molemo mo go ba ba le tlhoileng. ²⁸ Segofatsang botlhe ba ba le hutsang ebe le rapelela bao ba ba sa le tsholeng sentle. ²⁹ Yo o go betsang mo lerameng, mo fe le lengwe. Fa mongwe a tsaya jase ya gago, se gane ka seaparo sa gago. ³⁰ Neela mongwe le mongwe yo o go kopang. Fa mongwe a tsaya sengwe se e leng sa gago, o seka wa mo kopa gore a se buse. ³¹ Se o batlang batho ba se go direla, le wena o se ba direle. ³² Fa o rata batho ba ba go ratang fela, o tla boelwa ke eng? Gonne le baleofi ba rata ba ba ratang. ³³ Fa o dira bomolemo mo bathong ba ba go direlang bomolemo fela, o tla boelwa ke eng? Gonne le baleofi ba dira jalo. ³⁴ Fa o adima batho ba o solofetseng gore ba tla go duela, fela, o tla boelwa ke eng? Gonne le baleofi ba adima baleofi, gore ba boelwe ke selekanyo se se tshwanang. ³⁵ Mme ratang baba ba lona ebe le ba direla bomolemo. Adimisang le sa solofele tuelo, mme tuelo ya lona e tla nna kgolo, ebile le tla nna bana ba Mogodimodimo, mme o pelontle mo bathong botlhe ba ba sa lebogeng gape ba le bosula. ³⁶ Le nne kutlwelobotlhoko fela jaaka Rraalona a le kutlwelobotlhoko. ³⁷ Se atlhole, mme o tla se ke o atlholwe. Se sekise, mme le wena o tla se ke o sekisiwe. Itshwarele ba bangwe, mme le wena o tla itshwarelwa. ³⁸ Neela, mme o tla neelwa. Selekanyo se sentle - se gateletswe, se tshikintswe ebile se penologa - o tla neelwa mo sehubeng sa gago. Gonne selekanyo se o lekanyang ka sone, otla lekanyetswa ka sone." ³⁹ Ebe a ba bolelela setshwantsho. "A sefofu se ka kaela sefofu se sengwe? Fa a ne a ka dira jalo, a ga ba ka ke ba wela mo mosimeng? ⁴⁰ Morutwa ga a mogolo mo go yo o mo rutang, mme mongwe le mongwe fa a katisitswe sentle o tla tshwana le moruti wa gagwe. ⁴¹ Ke eng fa o lebelela phatsa e e mo leitlhong la morwarraago, mme o sa lemoge legong le le mo leitlhong la gago? ⁴² O ka raya morwarraago jang o re, 'Morwarre, tla ke go ntshe phatsa e e mo leitlhong la gago,' fa wena o sa bone legong le le mo leitlhong la gago? Moitimokanyi ke wena! Ntsha pele legong le le mo leitlhong la gago, ebe o ka kgona go bona sentle phatsa e e mo leitlhong la morwarraago. ⁴³ Gonne ga go na setlhare sepe se se molemo se se ka ungwang maungo a a seng molemo, ebile ga go na setlhare sepe se se bosula se se ka ungwang maungo a molemo. ⁴⁴ Setlhare sengwe le sengwe se itsiwe ka maungo a sone. Batho ga ba kgetle mofeige mo ditlhareng tsa mosu, ebile ga ba kgetle meretlwa mo ditlhareng tsa mmitlwa. ⁴⁵ Monna yo molemo o ungwa maungo a molemo go tswa mo mahumong a gagwe a molemo, mme monna yo bosula o ungwa bosula go tswa mo mahumong a gagwe a bosula. Gonne motho o bua go tswa mo matlotlong a pelo ya gagwe. ⁴⁶ Ke eng fa le mpitsa le re, 'Morena, Morena,' le ntswa le sa dire dilo tse ke di buang? ⁴⁷ Mongwe le mongwe yo o tlang kwa go nna, ebe a utlwa mafoko a me, a be a diragatsa, ke tla le bolelela gore o tshwana le mang. ⁴⁸ O tshwana le monna yo e reng fa a aga ntlo ya gagwe, a be a epa lefatshe ko teng, a be a agela ntlo ya gagwe mo motheong wa letlapa. E rile morwalela o tla, wa betsa ntlo eo, mme ga ya ka ya e tshikinya, ka gore e ne e agegile. ⁴⁹ Mme motho yo o utlwang mafoko a me, a be a sa a diragatse, o tshwana le motho yo o agileng ntlo ya gagwe mo lefatsheng, go sena motheo. E rile morwalela o tla kgatlhanong le ntlo eo, e ne ya phutlhama ka ponyo ya leitlho, mme tshenyego ya ntlo eo ya bo ele kgolo."