¹ Lekoko lotlhe la bone la tsogologa la tsisa Jeso fa pele ga ga Pilato . ² Ba simolola go mo pateletsa, ba re, ''Re fitlhetse monna yo a leswefatsa setshaba sa rona, a itsa gore Kaisara a fiwe tlotlo, a re ene ke Keresete, ke Kgosi.'' ³ Pilato a mmotsa, a re, ''A ke wena kgosi ya Bajuta?'' Jeso a araba a re, ''Wa rialo.'' ⁴ Pilato a raya baperesiti bagolo le bontsi jwa batho, a re, "Ga ke bone monna yo molato ope.'' ⁵ Mme ba gatelela, ba re, ''O hudua batho, o ruta mo Jutia otlhe, go simolola ko Galalea le go fitlha gone fa.'' ⁶ Fa Pilato a utlwa se, a botsa gore a Jeso ke moGalalea. ⁷ Fa a sena go lemoga gore o ka fa tlase ga taolo ya ga Herote, a romela Jeso kwa go Herote, yo le ene a neng a le mo Jerusalema ka matsatsi ao. ⁸ Fa Herote a bona Jeso, a itumela thata, gonne go ne go le bogologolo a ntse a batla go mmona. O ne a utlwaletse ka ga gagwe, ebile a solofetse go bona motlholo o dirwa ke ene. ⁹ Herote a botsa Jeso dipotso tse dintsi, mme Jeso a seka a mo araba le fa e le gangwe fela. ¹⁰ Baperesiti bagolo le bakwadi ba ema, ba pateletsa Jeso ba le makgwakgwa. ¹¹ Herote le masole a gagwe ba roga Jeso ba ba ba mo kgoba. Go tloga foo ba mo apesa diaparo tse dintle ba mo romela gape kwa go Pilato. ¹² Gonne Herote le Pilato ba ne ba nna ditsala gone ka letsatsi leo (pele ga mo, ba ne ba ilana). ¹³ Pilato a kgobokanya baperesiti bagolo le balaodi le bontsi jwa batho, ¹⁴ a ba raya a re, ''Le tsisitse monna yo jaaka ekete o gogela batho kwa go direng bosula, bonang, nna, morago ga go mmotsa dipotso fa pele ga lona, ga ke mmone molato mo dilong tse le mo pateletsang tsone. ¹⁵ Nnyaa, go ntse jalo le ka Herote, gonne o mo rometse gape kwa go rona, bonang, ga gona sepe se a se dirileng se a ka se atlholelwang leso. ¹⁶ Ka jalo ke tla mo otlhaya, ke bo ke mo golola.'' ¹⁷ Jaanong Pilato o ne a patelesega go gololela Bajuta mongwe wa magolegwa ka lebaka la moletlo. ¹⁸ Mme ba goeletsa botlhe kwa godimo ba re, ''Monna yo a tsamaele koo, re gololele Barabbas!'' ¹⁹ Barabbas e ne e le monna yo o neng a tsenngwa mo kgolegelong ka ntlha ya tsuololo mo motseng le polao. ²⁰ Pilato a bua le bone gape, a eletsa go golola Jeso. ²¹ Ba goa, ba re, ''A a bapolwe, a a bapolwe.'' ²² A bua le bone laboraro a re, ''Ke eng, ke bosula bofe jo monna yo a bo dirileng? Ga ke a bona sepe mo go ene se se ka atlholelwang leso. Jalo he, morago ga ke sena go mo otlhaya ke tla mo golola.'' ²³ Mme ba gatelela ka mantswe a a goelang kwa godimo, ba re ba batla gore a bapolwe. Mantswe a bone a gatelela Pilato. ²⁴ Pilato a tsaya tshwetso ya go dira jaaka ba batla. ²⁵ A ba gololela ene yo ba kopileng gore a gololwe, yo o neng a le mo kgolegelong ka ntlha ya lesukuru le polao. Mme a neela Jeso mo thatong ya bone. ²⁶ Jaaka ba ne ba tswa ka ene, ba tshwara Simone wa moSeria, yo a neng a tswa kwa ntle ga motse, ba mo rwesa sefapaano, a sala Jeso morago. ²⁷ Bontsi jo bogolo jwa batho, le basadi ba ba neng ba lela ba mo hutsafaletse, ba ne ba mo setse morago. ²⁸ Mme Jeso a retologela kwa go bone, a ba raya a re, ''Barwadi ba Jerusalema, se nteleleng, iteleleng lona le bana ba lona. ²⁹ Gonne bonang, matsatsi a etla a ba tla buang ba re, 'Go segofetse baopa le dibopelo tse di tlhokileng go tshola, le mabele a a tlhokileng go amusa.' ³⁰ Go tloga foo ba tla raya dithaba ba re, 'Re weleng,' le dithabana ba re, 'Re khurumetseng.' ³¹ Fa ba dira dilo tse setlhare se sa ntse se le setala, go tla diragala eng fa se omeletse?'' ³² Banna ba bangwe, e le dirukutlhi tse pedi, ba tsewa le ene go ya go bolawa. ³³ Fa ba fitlha kwa lefelong le le bidiwang ''Legata,'' ba mmapola, le dinokwane - yo mongwe kwa mojeng wa gagwe, yo mongwe kwa molemeng. ³⁴ Jeso a re, ''Rara, ba itshwarele, gonne ga ba itse se ba se dirang.'' Go tloga foo ba dira khupelekhupele, ba kgaogana diaparo tsa gagwe. ³⁵ Batho ba lebelela fa balaodi le bone ba mo kgoba, ba re, ''O bolokile ba bangwe. A a ipoloke, fa e le gore ke Keresete wa Modimo, yo o kgethilweng.'' ³⁶ Masole le bone ba ikgatlha ka ene, ba mo atamela, ba mo fa seno se se bojarara, ³⁷ ba re, ''Fa o le kgosi ya Bajuta, ipoloke.'' ³⁸ Go ne ga bewa mokwalo fa godimo ga gagwe, ''Yo ke kgosi ya Bajuta.'' ³⁹ Mongwe wa dirukutlhi tse di neng di kaletse fa go ene a mo roga a re, ''A ga o Keresete? Ipoloke le rona.'' ⁴⁰ Mme yo mongwe a mo kgalemela, a re ''A ga o boife Modimo, jaaka o le mo kotlhaong e e tshwanang?' ⁴¹ Rona re fa re sa gobelelwa, gonne re amogela se se re tshwanetseng ka ntlha ya ditiro tsa rona. Mme monna yo ga a dira sepe se se molato.'' ⁴² Go tloga foo a re, ''Jeso, o nkgakologelwe fa o tsena mo bogosing jwa gago.'' ⁴³ Jeso a mo raya a re, ''Ammaaruri ke a go raya, letsatsi leno o tla bo o na le nna kwa parateiseng.'' ⁴⁴ Jaanong e ne e le oura ya borataro, lefifi la apesa lefatshe lotlhe go fitlha ka oura ya boroba bongwe ⁴⁵ jaaka letsatsi le ne la fifala. Ga diragala gore sesiro sa tempele se kgagoge ka bogare. ⁴⁶ Jeso a lela ka lentswe le le golo, a re, ''Rara, ke neela moya wame mo diatleng tsa gago.'' Morago ga go bua se, a swa. ⁴⁷ Moeteledipele wa masole e rile a bona se se diragetseng, a galaletsa Modimo, a re ''E le ruri yo e ne e le monna wa mosiami.'' ⁴⁸ Fa bontsi jwa batho ba ba neng ba tsile go bona tiragalo ba bona se se diragetseng, ba boa ba ntse ba itaya dihuba tsa bone. ⁴⁹ Mme ba ba neng ba mo itse, le basadi ba ba neng ba mo setse morago go tswa Galalea, ba ne ba eme kgakajana, ba lebile ditiragalo tse. ⁵⁰ Bonang, ga bo go na le monna gotwe Josefa, yo e neng e le leloko la khuduthamaga. E ne e le monna yo o molemo wa mosiami. ⁵¹ Monna yo o ne a sa dumalana le tshwetso ya khuduthamaga le tiro e ba e dirileng. O ne a tswa mo Galalea mo motseng wa Aremathea; ebile o ne a batla bogosi jwa Modimo. ⁵² Monna yo, a ya kwa go Pilato, a kopa mmele wa ga Jeso. ⁵³ A o folosa, a o phuthela ka matsela a a boleta, a o baya mo lebitleng le le neng le gabilwe mo lentsweng, fa go neng go ise go bewe ope teng. ⁵⁴ E ne e le letsatsi la Paakanyo, letsatsi la Sabata le le gaufi le go tlhaba. ⁵⁵ Basadi, ba ba tsileng le Jeso go tswa Galalea, ba ya go bona lebitla le ka fa mmele wa gagwe o neng o beilwe ka teng. ⁵⁶ Ba boa, ba ya go baakanya dinkgisa monate le ditlolo. Mme ka Sabata ba itapolosa go ya ka fa taolong.