¹ Jaana Modiro wa borotho jo bo sa bidisiwang wa bo o atamela, o o bidiwang Tlolaganyo. ² Ditlhogo tsa baperesiti le bakwadi ba buisanya kafa ba ka bolayang Jeso ka teng, ka ba boifa batho. ³ Mme satane a tsena mo go Jutase Isekariota, yo e ne e le mongwe wa ba ba lesome le bobedi. ⁴ Jutase a ya go buisanya le ditlhogo tsa baperesiti le baeteledipele ka fa o ka mo ba neelang ka teng. ⁵ Bane ba itumela, mme ba dumalana go mo neela madi. ⁶ A dumalana nabo, mme a senka sebaka se a tlaa ba mo neelang ka sone go sena batho ba bantsi. ⁷ Letsatsi la borotho jo bo sa bidisiwang la tla, le konyana ya Tlolaganyo e tshwanetseng go tlhabiwa ka lone. ⁸ Jeso a romela Petere le Johane, a re, ''Tsamayang le baakanyeng sejo sa Tlolaganyo gore re tle re se je.'' ⁹ Ba mmotsa ba re, ''O batla reya go baakanya kae?'' ¹⁰ A ba araba a re, ''Reetsang, fa lo sena go tsena mo motsing, lo tlaa kopana le monna a rwele nkgwana ya metsi. Lo mo sale morago lo tsene le ene mo ntlong e a yang mo go yone. ¹¹ Lo bo lo raya mong wa ntlo lo re, 'Moruti o botsa jaana gore, ''Ntlwana ya baeng e fa kae, e ke tlaa jelang Tlolaganyo le barutwa bame teng?'' ¹² O tlaa lo bontsha ntlwana e tona e e kwa godimo. Baakanyang gone koo.'' ¹³ Jaana ba tsamaya, mme ba fitlhela sengwe le sengwe se ntse jaaka a se ba boleletse. Ba baakanya dijo tsa Tlolaganyo. ¹⁴ Mme e rile fa nako e gorogile, a nna fa fatshe le ba aposetolo. ¹⁵ Mme a ba raya a re, ''Ke eleditse thata go ja Tlolaganyo e le lona pele ga ke bogisiwa. ¹⁶ Mme ke lo raya ke re, ga kena go e ja gape, go fitlhela go rurifadiwa mo bogosing jwa Modimo.'' ¹⁷ Mme Jeso a tsaya senwelo, mme ya re a sena go leboga, a re, ''Tsayang se mme lo se kgaogane. ¹⁸ Gonne ke lo raya ke re, ga ke kitla ke enwa ga leungo la mofine gape, go fitlhela bogosi jwa Modimo botla.'' ¹⁹ A ba a tsaya borotho, fa a sena go leboga, a bo a bo kgaoganya, mme a bo ba neela, a re, ''Se ke mmele wame o lo o neetsweng. Dirang mo lo nkgakologelwe ka gone.'' ²⁰ Ka tsela e e tshwanang a tsaya senwelo morago ga selalelo, a re, ''Senwelo se ke kgolagano e ntsha mo mading ame, a a tshololetsweng lona.'' ²¹ Mme elang tlhoko, ene yo o ntherang o na le nna mo tafoleng. ²² Gonne Morwa Motho o tla a tsamaya fela jaaka go laotswe.Mme go hutsegile monna yo o ntherang. ²³ Ba simolola go buisanyana mo go bone gore ke mang yo o tla a dirang selo se. ²⁴ Mme go tswa foo ga tsoga kganetsanyo mo gare ga bone mme ba botsana gore ke mang o o tsewang a le motona. ²⁵ A ba raya a re, ''Dikgosi tsa Baditshaba di dikgolo mo go bone, le bone ba ba nang le taolo ba lemogiwa e le ba ba direlang batho molemo. ²⁶ Mme ga go a tshwanela go nna jaana mo go lona. Mme jalo, fa go na le yo mogolo mo go lona a a nne jaaka yo monnye.Mme ene yo o botlhokwa a nne jaaka yo o dirang. ²⁷ Gonne ke mang yo mogolo, yo o ntseng mo tafoleng, kana yo o direlang? A ga se ene yo o ntseng mo tafololeng? Le fa go ntse jalo ke na le lona jaaka mongwe yo o direlang. ²⁸ Mme ke lona ba lo tsweletseng le nna mo dithaelong tsame. ²⁹ Ke lo neela bogosi fela jaaka Rre a bo nneetse, ³⁰ gore lo tle lo je le bo le nwe ko tafoleng ko bogosing jwa me, gape lo tla a nna mo teroneng le atlhola ditshaba tse di lesome le bobedi tsa Iseraele. ³¹ Simone, Simone, ela tlhoko, Saatane o batla go go tsaya, gore a go sile jaaka korong. ³² Mme ke go rapeletse gore tumelo ya gago e seka ya palelwa. Mme e re o sena go boa gape, thatafatsa bakaulengwe. ³³ Petere a mo raya a re ''Morena, ke ipaakanyeditse go tsamaya le wena gotlhe ko kgolegelong le ko lesong''. ³⁴ Jeso a mo fetola a re, ''ke a go raya, Petere, mokoko ga o kake wa lela mo letsatsing le, pele ga o itatola ga raro gore ga o inkitse.'' ³⁵ Mme Jeso a ba raya a re, ''Fa ke lo roma le sa tshola sekgwama le kgetsi ya mofago kana ditlhako, a lo ka tlhoka sengwe?'' Ba araba ba re, ''Sepe'' ³⁶ Mme a ba raya a re, ''Mme gone jaana, mongwe yo o tshotseng sekgwama, mo tlogeleng a se tsee, le kgetsi ya mofago. Ene yo o senang tshaka a a rekise seaparo sa gagwe a ithekele. ³⁷ Gonne ke lo raya ke re, se se kwadilweng ka game se tla a rurifadiwa, 'O ne a balelwa mo go ba ba neng ba le molato. 'Gonne se se neng se builweng ka nna se tla a rurifadiwa.'' ³⁸ Mme ba ne ba re, ''Morena, bona! Tshaka tse pedi ke tse.''O ne a ba raya ba re, ''Go lekanye.'' ³⁹ Morago ga dijo tsa maitseboa, Jeso a tsamaya, jaaka a tlwaetse, go ya ko thabeng ya Lotlhware, mme barutwa ba mo sala morago. ⁴⁰ Mme e rile ba goroga a ba raya a re, ''Rapelang gore le seka la tsena mo thaelong.'' ⁴¹ Mme a tsamaya sekgalenyana go tswa fa go bone a khubama a bo a rapela, ⁴² a re, ''Rara, fa e le go rata ga gago, ntsha senwelo se mo go nna. Mme e seng thato yame, ya gago e dirafadiwe''. ⁴³ Mme Moengele a tswa ko legodimong a iponafatsa mo go ene, a mo thatafatsa. ⁴⁴ O ne a le mo botlhokong, a rapela thata, mme mofufutso wa gagwe wa nna jaaka marothodi a magolo a madi a tshologela fa fatshe. ⁴⁵ Mme e rile a ema a sena go rapela, a tla ko barutweng, mme o fitlhetse ba robetse ka gore ba ne ba na le kutlobotlhoko, ⁴⁶ mme a ba botsa a re, ''Ke eng lo robetse?'' Emelela le rapele, gore lo seka la tsena mo thaelong.'' ⁴⁷ E rile a ntse a bua, bonang, ga bonale bontsi jwa batho ba na le Jutase, mongwe wa ba ba lesome le bobedi a ba eteletse pele. A tla gaufi le Jeso mme a mo atla, ⁴⁸ mme Jeso a mo raya a re, ''Jutase a o rekisa Morwa Motho ka go mo atla?'' ⁴⁹ Mme ba ba neng ba na le Jeso fa ba bona se se diragalang, ba re, ''Morena a re kgaole ka tshaka?'' ⁵⁰ Mme mongwe wa bone a kgaola motlhanka wa moperesiti yo mogolo, a mo kgaola ka fa tsebeng ya mo ja. ⁵¹ Jeso a re, ''Go lekanye!'' A kgoma tsebe ya gagwe, mme a mo fodisa. ⁵² Jeso a raya Moperesiti yo mogolo, balaodi ba tempele, le mo bagolwaneng ba ba kgatlhanong le ene ''A lo dule le le kgatlhanong le legodu ka tshaka le ka ditlhopha. ⁵³ Erile ke na le lona malatsi otlhe mo tempeleng ga le ise le ko le ntsenye letsogo. Mme ke nako ya lona le balaodi ba lefifi.'' ⁵⁴ Ba mo tshwara, ba mo eteletsa pele, ba mo isa ko ntlong ya moperesiti yo mogolo. Mme morago ga lebaka Petere a mo sala morago. ⁵⁵ Mme ya re ba sena go gotsa molelo fa gare ga kgotla ba nna fa fatshe botlhe, Petere a nna fa gare ga bone. ⁵⁶ Mosadi mongwe wa motlhanka a mmona mo leseding la molelo, mme a mo lebelela ka tlhamalalo a bo a re, ''Monna yo, le ene o ne a na le ene'' ⁵⁷ Mme Petere a latola seo, a re, ''Mosadi, ga ke moitse.'' ⁵⁸ Morago ga lebakanyana mongwe le ene a mmona, a re'' O mongwe wa bone'' Mme Petere a re '' Monna ga ke ene.'' ⁵⁹ Morago ga selekanyo sa oura, monna mongwe a tlhomamisa a re, ''Ammaaruri monna yo o ne a na le ene, ka gore ke mo Galalea.'' ⁶⁰ Mme Petere a re '' Monna, ga ke itse se o se buang''. Ka bofefo e rile a ntse a bua mokoko wa lela. ⁶¹ A gadima, Morena a lebelela Petere, mme Petere a gakologelwa lefoko la Morena,fa a mo raya a re ''Pele ga mokoko o lela gompieno o tla a be o intatotse ga raro.'' ⁶² Petere a tswela ko ntle a lela mo go botlhoko. ⁶³ Mme banna ba ba disitseng Jeso ba mo kgoba ba bo ba mmetsa. ⁶⁴ Ba ne ba mo khurumetsa mme ba kopa ba re ''porofita'' ke mang yo o go iteileng, ⁶⁵ Ba bua dilo di le dintsi kgatlhanong le Jeso, ba mo tlhapatsa. ⁶⁶ Ka bofefo ka gone go le moso, bagolwane ba batho ba kgobokana botlhe,baperisiti ba ba golo le bakwadi. Ba mo eteletsa pele go ya kwa lekgotleng, ⁶⁷ ba re ''Fa o le keresete, re bolelele'' mme a ba raya a re, '' Fa ke le bolelela ga le ka ke la dumela ⁶⁸ gape ga ke le botsa ga le kake la nkaraba. ⁶⁹ Mme go simolola ka nako e, Morwa Motho o tla a nna ka fa letsogong le le golo la nonofo ya Modimo'' ⁷⁰ Botlhe ba bua ba re '' Jaanong a o Morwa Modimo?'' Jeso a ba raya a re, ''La re ke ene'' ⁷¹ Ba re, ''Ke eng fa re santse re tlhoka mosupi? Gonne rona re utlwile go tswa mo molong wa gagwe.''