¹ Jeso a tsena mme a ralala motse wa Jeriko. ² Ga bo go na le monna mongwe yo o bidiwang Sakaio. E ne e le mokgethisi mogolo ebile a humile. ³ O ne a leka go bona gore Jeso ke mang, mme a sa kgone ka lebaka la bontsi ja batho, ka a ne a le mokhutshwane. ⁴ Ka jalo a tabogela ko pele ga batho mme a palama setlhare sa mosikamore gore a tle a kgone go mmona, ka gore Jeso o ne a ya go feta ka tsela eo. ⁵ Ya re Jeso a feta fa lefelong la teng, a leba kwa godimo, a mo raya a re, "Sakaio, a itlhaganele o fologele kwa tlase, ka gore ke tshwanetse go tlhola ko ga gago." ⁶ A itlhaganelela go fologela kwa tlase, a mo amogela ka boitumelo. ⁷ Ya re batho botlhe ba bona se se diragala, ba ngongorega, ba re, "O ile go etela monna yo e leng moleofi." ⁸ Sakaio a ema a raya Morena a re, "Morena, bona, sephatlo sa dithoto tsame ke di neela bahumanegi, mme fa ke tsieditse mongwe ka sepe hela, ke tla se busa se menagane gane." ⁹ Jeso a mo raya a re, "Letsatsi la gompieno, poloko e tsile mo lapeng le ka gore le ene ke morwa Aborahama. ¹⁰ Ka gore Morwa Motho o tletse go batla le go boloka batho ba ba latlhegileng." ¹¹ Ya re ba utlwa mafoko a, a tswelela a bua le bone ka setshwantsho, ka gore o ne a le gaufi le Jerusalema, mme ba ne ba akanya gore mmuso wa Modimo o tla tla gone foo. ¹² A bua a re "Monna mongwe wa morongwa wa kgosi o ne a ya kwa lefatsheng le le kgakala go ya go amogela bogosi jwa gagwe a bo a boa. ¹³ A bitsa batlhanka ba gagwe ba le lesome, a ba neela madi a mantsi, mme a ba raya a re, 'dirang kgwebo go fitlhela ke tla.' ¹⁴ Mme banni ba lefatshe la gagwe ba ne ba mo tlhoile, a bo ba romela babueledi kwa go ene ba re, 'ga re batle monna yo a re busa.' ¹⁵ Ga diragala gore fa a boa, a sena go amogela bogosi, a laola gore batlhanka ba a neng a ba file madi gore ba tsisiwe kwa go ene, gore a tle a itse gore ba dirile poelo ya bokae. ¹⁶ Wa ntlha a tla kwa go ene a re, 'Morena, madi a o a nneetseng a oketsegile ga lesome.' ¹⁷ Monna wa morongwa wa kgosi a re, 'O dirile sentle motlhanka yo o molemo. Ka gore o nnile boikanyego mo go se se nnye, o tla busa metse e le lesome.' ¹⁸ Wa bobedi a tla kwa go ene a re, 'Madi a gago morena, o oketsegile ga tlhano.' ¹⁹ Monna wa morongwa wa kgosi a mo raya a re, 'Busa metse e le metlhano.' ²⁰ Yo mongwe a tla kwa go ene a re, 'Madi a gago ke a, a ke neng ke a beile ka pabalesego mo letseleng, ²¹ ke ne ke go tshaba ka o le motho yo o bogale. O tsaya dilo tse o sa di bayang fa fatshe, o roba kwa o sa jwalang teng.' ²² Morongwa wa kgosi a re, 'Ke tla go atlhola ka mafoko a gago, wena motlhanka ke wena o boikepo. O ne o itse fa ke le motho yo o bogale, ke tsaya se ke sa se bayang fa fatshe, gape ke roba fa ke sa jwalang teng. ²³ Jaanong ke eng o ne o sa beeletse madi ame mo bankeng, gore fa ke boa a be a na le morokotso?' ²⁴ Morongwa wa kgosi a raya batho ba ba neng ba bapile le ene a re, 'Mo tseeleng madi ao, mme le a neeleng yo o nang le madi a le lesome.' ²⁵ Ba mo raya ba re, 'Morena, o na le madi a le lesome.' ²⁶ 'Ke a le raya ke re, mongwe le mongwe yo o nang le sengwe o tla se okelediwa, mme yo o senang sepe, le se a nang le sone o tla se tseelwa. ²⁷ Baba bame ba ba ganneng ke ba busa, ba tsiseng, le ba bolaeng fa pele game." ²⁸ Fa a sena go bua dilo tse, a tswelela le mosepele wa gagwe a ya kwa Jerusalema. ²⁹ Ga diragala gore e re a atamela Bethephage le Bethania, ko thabeng e e bitswang ya Lotlhware, a roma barutwana ba gagwe ba le babedi, ³⁰ a re, "Yang kwa motsaneng yo o bapileng le o. Fa le tsena ko teng, le tla fitlhela tonki e e iseng e palangwe. Le e bofololeng, le e tsiseng kwa go nna. ³¹ Fa mongwe a ka le botsa gore, 'le e bofololela eng?' lo re, 'Morena o a e tlhoka." ³² Ba ba neng ba rumilwe ba ne ba fitlhela tonki e bofilwe jaaka Jeso a ne a ba boleletse. ³³ Jaaka ba ne ba bofolola tonki, beng ba yone ba ba raya ba re, "Le bofololelang tonki e?" ³⁴ Ba re, "Morena o a e tlhoka." ³⁵ Ba e tsisa kwa go Jeso, mme ba latlhela diaparo tsa bone mo godimo ga tonki, ba pega Jeso mo godimo ga yone. ³⁶ Ya re a tsamaya, ba latlhela diaparo tsa bone mo tseleng. ³⁷ Ya re a atamela lefelo le Thaba ya Lotlhware fa e fologelang teng, bontsintsi jwa barutwana ba simolola go ipela le go galaletsa Modimo ka lentswe le le kwa godimo ka ntlha ya ditiro tse dikgolo tse ba neng ba bone a di dira, ³⁸ ba re, "Go segofetse Kgosi e e tlang ka leina la Morena! Kagiso kwa legodimong le kgalalelo kwa godimo!" ³⁹ Bangwe ba Bafarasai ba ba neng ba le mo bontsing jwa batho ba bua ba re, "Moruti, kgalemela barutwana ba gago." ⁴⁰ Jeso a ba araba a re, "Fa ba ka didimala, matlapa a tla goela kwa godimo." ⁴¹ Ya re Jeso a atamela motse, a o lelela, ⁴² a re, "Fa o ne o itsile mo letsatsing le, wena Jerusalema, le dilo tse di go tsisetsang kagiso! Mme jaanong di fitlhegile mo matlhong a gago. ⁴³ Gonne malatsi a tla tla mo go wena, a baba ba gago ba tla agang lebota le le go dikaganyetsang, ba go pitlaganya mo matlhakoreng otlhe. ⁴⁴ Ba tla go iteela fa fatshe, wena le bana ba gago. Ga ba ka ke ba tlogela letlapa lepe le tlhatlaganye le le lengwe, ka gore ga o a ka wa lemoga, fa Modimo a ne a re o a go boloka." ⁴⁵ Jeso a tsena mo tempeleng a simolola go kobela kwa ntle batho ba ba neng ba rekisa, ⁴⁶ a ba raya a re, "Go kwadilwe gotwe, 'Ntlo yame e tla nna ntlo ya thapelo,' mme lona le e fetotse mongobo wa magodu." ⁴⁷ Jeso o ne a ruta letsatsi le letsatsi mo tempeleng. Baperesiti bagolo le bakwadi le bagolwane ba batho ba ne ba batla go mmolaya, ⁴⁸ mme ba sa kgone go bona tsela e ba ka mmolayang ka yone, ka gore batho botlhe ba ne ba mo reeditse ka tlhoafalo.