¹ Jaanong fa Jeso a sena go itse gore Bafarasai ba utlwile gore o kolobetsa ebile o dira barutwa go feta Johane ² (lefa Jeso ka sebele a ne a sa kolobetse, go ne go kolobetsa barutwa ba gagwe), ³ a tswa mo Jutia a boela morago gape kwa Galalea. ⁴ Go ne go tlhokega gore a fete ka Samarea. ⁵ Ka jalo a tsena mo motseng wa Samarea, o o bidiwang Sikara, gaufi le bontlha ba lefatshe le Jakobe a neng a le file morwawe Josefa. ⁶ Petse ya ga Jakobe e ne e le foo. Jeso o ne a lapisitswe ke mosepele mme a nna fa fatshe fa petseng. Nako e ne e ka nna ya oura ya borataro. ⁷ Mosadi wa Mosamarea a tla go ga metsi, Jeso a mo raya a re ''Mphe metsi ke nwe.'' ⁸ Gonne barutwa ba gagwe ba ne ba ile kwa motsaneng go ya go reka dijo. ⁹ Mosadi wa Mosamarea a mo raya a re, ''Go tla jang gore, o le Mojuta, o nkope, kele mosadi wa Mosamarea, sengwe se se nowang?'' Gonne Bajuta ga ba na tirisanyo epe le Basamarea. ¹⁰ Jeso a mo araba a re, ''Fa o kabo o itsile mpho ya Modimo, le gore ke mang yo o go rayang a re, 'mphe ke nwe', o kabo o mo kopile, ebile o kabo a go file metsi a a tshelang.'' ¹¹ Mosadi a mo raya a re, ''Rra, ga o a tshola kgamelo ebile petse e e boteng. Jaanong metsi a a tshelang o na le one a le fa kae? ¹² A o mogolo go feta rrarona Jakobe yo o re fileng petse, e a kileng a nwa mo go yone le dikgomo tsa gagwe le bana ba gagwe?'' ¹³ Jeso a mo fetola a mo raya a re, ''Mongwe le mongwe yo o nwang metsi a o tla nyoriwa gape, ¹⁴ mme yo o tla nwang metsi a ke tla a mo fang ga a kitla a nyoriwa gape. Boemong ja mo, metsi a ke tla mo fang one a tla fetoga motswedi wa metsi mo go ene, o o tswelang go isa botshelong jo bo sa khutleng.'' ¹⁵ Mosadi a mo raya a re, ''Rra, mphe metsi ao gore ke tle ke seka ka nyoriwa gape, le gore go seka ga tlhokega gore ke tle go ga metsi.'' ¹⁶ Jeso a mo raya a re, ''Tsamaya, o bitse monna wa gago, o tle le ene fa.'' ¹⁷ Mosadi a araba a mo raya a re, ''Ga ke na monna.'' Jeso a mo fetola, ''O bua sentle fa o re, 'Ga ke na monna,' ¹⁸ gonne o nnile le banna ba le batlhano, le yo o nnang le ene ga se monna wa gago. Se o se buileng ke boammaaruri.'' ¹⁹ Mosadi a mo raya a re, ''Rra, ke bona gore o moporofiti . ²⁰ Borrarona ba ne ba obamela mo thabeng e, mme wena wa re Jerusalema ke gone kwa batho ba tshwanetseng go obamela teng.'' ²¹ Jeso a mo raya a re, ''Mosadi, dumela mo go nna, gore nako e etla e le tla obamelang Rara le se mo thabeng e le fa e le kwa Jerusalema. ²² Le obamela se le sa se itseng. Re obamela se re se itseng, gonne poloko e tswa kwa Bajuteng. ²³ Le fa go ntse jalo, nako e etla, ebile e setse e le fa, fa baobamedi ba boammaaruri ba tla obamelang Rara ka mowa le ka boammaaruri, gonne Rara o batla batho ba ba ntseng jalo go nna baomabedi ba gagwe. ²⁴ Modimo ke Mowa, batho ba ba mo obamelang ba tshwanetse go mo obamela ka mowa le ka boammaaruri.'' ²⁵ Mosadi a mo raya a re, ''Ke itse gore Mesia o etla(ene yo o bidiwang Keresete). Fa a tla, o tla re tlhalosetsa dilo tsotlhe.'' ²⁶ Jeso a mo raya a re, ''Ke ene, nna yo ke buang le wena.'' ²⁷ Ka nako eo barutwa ba gagwe ba boa. Ba ipotsa gore ke eng a bua le mosadi, mme ga seka ga nna ope yo o neng a ka re, ''O batla eng?'' kgotsa, ''Ke eng o bua le ene?'' ²⁸ Foo, mosadi a tlogela nkgwana ya gagwe, a ya kwa motsaneng, a bolelela batho a re, ²⁹ ''tlang, le bone monna yo o mpoleletseng tsotlhe tse ke kileng ka di dira. Yo ga a ka ke a nna Keresete, kana jang?'' ³⁰ Ba tswa mo motsaneng ba tla kwa go ene. ³¹ Mo nakong eo, barutwa ba ne ba mo rotloetsa, ba re, ''Moruti, ja.'' ³² Mme a ba raya a re, ''Ke na le dijo tse ke di jang tse le sa itseng sepe ka tsone.'' ³³ Jaanong barutwa ba raana ba re, ''Ga go na ope yo o mo tsiseditseng dijo, kana jang?'' ³⁴ Jeso a ba raya a re, ''Dijo tsame ke go dira thato ya yo o nthomileng le go fetsa tiro ya gagwe . ³⁵ A ga le bue le re, 'Go feta dikgwedi tse nne ke gone go roba go bo go tsena?''Ke bua se le lona, lebang masimo, a setse a budule go ka rojwa! ³⁶ Yo o robang a amogela tuelo ebile o kgobokanya maungo a botshelo jo bo sa khutleng, gore yo o jwalang le yo o robang ba tle ba ipele botlhe. ³⁷ Gonne mo go se, seane se, 'Mongwe o a jwala, mongwe o a roba,' se boammaaruri. ³⁸ Ke le romile go roba se le sa se berekelang. Bangwe ba berekile, le tsene fa ba berekileng teng.'' ³⁹ Bontsi ba Basamarea mo motseng o, ba dumela mo go ene ka ntlha ya pego ya mosadi yo o neng a paka, a re, ''O mpoleletse dilo tsotlhe tse ke di dirileng.'' ⁴⁰ Ka moo fa Basamarea ba tla kwa go ene, ba mo kopa gore a nne le bone, mme a nna koo matsatsi a le mabedi. ⁴¹ Ba le bantsi ba dumela ka ntlha ya lefoko la gagwe. ⁴² Ba raya mosadi ba re, ''Ga re sa tlhole re dumela ka ntlha ya se o se buileng, gonne rona ka sebele re utlwile, ebile re itse gore yo e le ruri ke ene Mmoloki wa lefatshe.'' ⁴³ Morago ga matsatsi a mabedi ao, a tswa go ya Galalea. ⁴⁴ Gonne Jeso ka sebele o ne a bolela fa moporofiti a sena tlotlo mo lefatsheng la ga gabo. ⁴⁵ Fa a goroga kwa Galalea, Bagalalea ba mo amogela. Ba ne ba bone dilo tse a di dirileng kwa Jerusalema kwa moletlong, gonne le bone ba ne ba le kwa moletlong. ⁴⁶ Jaanong a tla gape kwa Kana wa Galalea, kwa a kileng a fetola metsi go nna bojalwa jwa mofine. Go ne go na le modiredi mongwe wa segosi yo o neng a lwalelwa ke morwa kwa Kaperenaume. ⁴⁷ Fa a utlwa gore Jeso o tsile mo Galaea go tswa kwa Jutia, a tla kwa go Jeso a mo kopa go tla go fodisa morwawe, yo a neng a le gaufi le go swa. ⁴⁸ Foo Jeso a mo raya a re, ''Fa le sa bone dikai le dikgakgamatso, ga le na go dumela.'' ⁴⁹ Modiredi a mo raya a re, ''Rra, tla pele ga ngwanake a a swa.'' ⁵⁰ Jeso a mo raya a re, ''Tsamaya. Morwa wa gago o a tshela.'' Monna a dumela lefoko le Jeso a le mmoleletseng, a tsamaya. ⁵¹ Jaaka a ntse a tsamaya, batlhanka ba gagwe ba kopana le ene, ba mmolelela fa morwa wa gagwe a tshela. ⁵² Mme a ba botsa gore o tokafetse ka nako mang. Ba mo araba ba re, ''Maabane ka oura ya bosupa, mogote o ne wa tswa mo go ene.'' ⁵³ Foo monna a lemoga gore ke ka yone nako e e buiwang e fa Jeso a mo raya a re, ''Morwao o a tshela.'' Ene ka sebele le botlhe ba ntlo ya gagwe ba dumela. ⁵⁴ Se e ne e le sekai sa bobedi Jeso a se dira fa a tswa mo Jutia a tla Galalea.