¹ Ga bo go na le moeteledipele mongwe wa Bafarasai, yo o neng a bidiwa Nikotima. ² Monna yo, o ne a tla kwa go Jeso bosigo, mme a mo raya a re, "Rabi, re itse fa o le moruti yo o tswang ko Modimong, ka gore ga gona ope yo o ka dirang ditshupegetso tse o di dirang fa e se fela Modimo a na le ene.'' ³ Jeso a mo fetola a re, "Ammaaruri, ammaaruri, ke a go raya, kwa ntle ga gore motho a bo a tsetswe sesha, ga a ka ke a bona bogosi jwa Modimo." ⁴ Nikotima a mo raya a re, "Motho o ka tsalwa jang gape a setse a tsofetse? A o ka boela labobedi mo sebopelong sa ga mmaagwe gore a tle a tsalwe gape?" ⁵ Jeso a mo fetola a re, "Ammaaruri ammaaruri ke a go raya, fa e se fela motho a tsetswe ka metsi le ka Mowa, ga a ka ke a bona bogosi jwa Modimo. ⁶ Se se tsetsweng ke nama ke nama, mme se se tsetsweng ke Mowa ke mowa. ⁷ O se ka wa gakgamala ka gore ka re, 'O tshwanetse go tsalwa sesha.' ⁸ Phefo e fokela gongwe le gongwe ko e batlang go fokela teng; o utlwa mosumo wa yone, mme ga o ka ke wa itse ko e tswang teng kana ko e yang teng. Le mongwe le mongwe yo o tsetsweng ke Mowa o ntse jalo." ⁹ Nikotima a mo fetola a re, "Dilo tse di ka nna jang?" ¹⁰ Jeso a mo fetola a re, "A o moruti mo Iseraele, mme ga o tlhaloganye dilo tse? ¹¹ Ammaaruri ammaaruri ke a go raya, re bua fa re itse gape re paka ka ga dilo tse re di boneng. Mme fela ga lo amogele bopaki jwa rona. ¹² Fa ke le boleletse ka dilo tsa lefatshe mme le sa dumele, fa ke ka le bolelela ka tsa legodimo gone? ¹³ Ga go na ope yo o tlhatlogetseng kwa legodimong ga e se ene yo o fologileng go tswa kwa legodimong- fa e se Morwa Motho. ¹⁴ Fela jaaka Moshe a ne a tsholetsa noga mo sekgweng, fela jalo Morwa Motho o tshwanetse a tsholediwa ¹⁵ gore botlhe ba ba dumelang mo go ene ba tle ba nne le botshelo jo bo sa khutleng. ¹⁶ Gonne Modimo o ratile lefatshe mo go kalo, a neela Morwawe yo o esi fela, gore le fa e le mang yo o dumelang mo go ene a se ka a swa mme a bone botshelo jo bo sa khutleng. ¹⁷ Gonne Modimo ga wa romela Morwa mo lefatsheng gore a tle a le sekise, mme gore a le boloke ka ene. ¹⁸ Yo o dumelang mo go ene ga a sekisiwe, mme yo o sa dumeleng o sekisitswe gale, ka gore ga a ka a dumela mo leineng la Morwa yo o mongwefela wa Modimo. ¹⁹ Lebaka la katlholo ke gore: lesedi le tsile mo lefatsheng mme batho ba ratile lefifi go na le lesedi ka gore ditiro tsa bone di bosula. ²⁰ Gonne mongwe le mongwe yo o dirang bosula ga a rate lesedi, ebile ga a tle ko leseding gore ditiro tsa gagwe di se ka tsa senolwa. ²¹ Le fa go ntse jalo, yo o dirang boammaruri o tla ko leseding gore go tle go supafale fa ditiro tsa gagwe di dirilwe mo Modimong." ²² Morago ga se, Jeso le barutwa ba gagwe ba ne ba tsena mo lefatsheng la Jutea, ko a neng a tsaya nako ya gagwe a na le bone, a kolobetsa. ²³ Johane le ene o ne a kolobetsa ko Ainone go bapa le Salimi ka gore go ne go na le metsi a mantsi ko teng. Batho ba ne ba tla go kolobediwa kwa go ene, ²⁴ ka gore Johane o ne a ise a latlhelwe mo kgolegelong. ²⁵ Mme ga tsoga kganetsanyo magareng ga bangwe ba barutwa ba ga Johane le Mojuta mongwe ka ga moletlo wa tlhapiso. ²⁶ Ba tla kwa go Johane ba mo raya ba re, "Rabi, yo o neng o na le ene ko motsheo ga noka ya Jorotane, yo o neng o paka ka ga ene, bona, o a kolobetsa ebile batho botlhe ba ya kwa go ene." ²⁷ Johane a fetola a re, "Motho ga a ka ke a amogela sepe fa e se fela a se filwe go tswa kwa legodimong. ²⁸ Le lona le ka paka ka gore, ke rile, 'Ga ke Keresetse' mme le fa go ntse jalo, 'Ke romilwe pele ga gagwe.' ²⁹ Monyadiwa ke wa monyadi. Mme tsala ya monyadi, e e emang go bapa le ene, a mo utlwa, o itumela thata fa a utlwa lentswe la monyadi. Ke gone jaanong, boitumelo jwame bo feletseng. ³⁰ O tshwanetse gore a tsholediwe mme nna ke ngotlege. ³¹ Yo o tswang kwa godimo o ko godimo ga sengwe le sengwe. Yo o tswang mo lefatsheng o tswa mo lefatsheng ebile o bua ka lefatshe. Yo o tswang kwa legodimong o ko godimo ga botlhe. ³² O paka ka se a se boneng le se a se utlwileng, mme ga go na ope yo o amogelang bopaki jwa gagwe. ³³ Yo o amogetseng bopaki jwa gagwe o rurifatsa fa Modimo a le boammaruri. ³⁴ Gonne yo Modimo a mo romileng o bua mafoko a Modimo. Ka gore Modimo ga o neele Mowa ka go lekanyetsa. ³⁵ Rara o rata Morwa gape o mo neetse dilo tsotlhe mo seatleng. ³⁶ Yo o dumelang mo go Morwa o na le botshelo jo bo sa khutleng. Mme yo o sa utlweng Morwa ga a ka ke a bona botshelo, mme bogale jwa Modimo bo mo go ene."